ឯកឧត្តម អ៊ុក វុទ្ធី អនុរដ្ឋលេខាធិការ ក្នុងនាមតំណាងដ៏ខ្ពង់ខ្ពស់ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម បានចូលរួមជាមួយ ឯកឧត្តម លី ស៊ីណូ អនុរដ្ឋលេខាធិការ ឯកឧត្តម ហែល តូនី អនុប្រធានក្ដាប់រួមនៃអាជ្ញាធរទន្លេសាប និងក្រុមការងារ ព្រមទាំងមានការចូលរួមពីឯកឧត្ដម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង នៅថ្ងៃទី១៩ ខែមេសា ឆ្នាំ២០២៥ បានចុះពិនិត្យទីតាំងដែលក្រុមហ៊ុនឯកជនបានចាក់ដីចូលទន្លេសាបប្រវែងប្រមាណ ៧០ម៉ែត្រ លើកជាទំនប់ ស្ថិតក្នុងភូមិចុងកោះ សង្កាត់ផ្សារក្រោម ក្រុងកំពង់ឆ្នាំង ខេត្តកំពង់ឆ្នាំង។
ឯកឧត្តម អ៊ុក វុទ្ធី បានឱ្យដឹងថា តាមការបំភ្លឺពីតំណាងក្រុមហ៊ុនថា ការចាក់ដីលើកជាទំនប់នេះ គឺដើម្បីការពារម៉ាស៊ីនបូមទឹកពីការរំខានដោយកំប្លោកក្នុងទន្លេ សម្រាប់បូមទឹកយកមកបម្រើសេវាកម្មផ្គត់ផ្គង់ទឹកស្អាត ជូនប្រជាពលរដ្ឋក្នុងក្រុងកំពង់ឆ្នាំង ដែលខ្វះខាតទឹកស្អាតក្នុងរដូវប្រាំង ដោយពុំមានចេតនាហ៊ុមព័ទ្ធយកជាកម្មសិទ្ធិនោះទេ។
ជាវិធានការ ឯកឧត្តម អ៊ុក វុទ្ធី បានបញ្ជាក់ថា ក្រុមការងារក្រសួងតម្រូវឱ្យក្រុមហ៊ុនកាយដីដែលបានចាក់ចូលទន្លេសាបចេញ និងរៀបចំឱ្យដូចស្ថានភាពដើមវិញ ហើយក្រុមហ៊ុនត្រូវមកសុំការពិគ្រោះយោបល់បច្ចេកទេសពីក្រសួងធនធានទឹក និងឧតុនិយម។
