ថ្ងៃចូលឆ្នាំខ្មែរ! ឯកឧត្តម ជា លីសែ អំពាវនាវឱ្យប្រើប្រាស់ផ្ទិល ត្រឡោកជាមួយពាង ឬធុងទឹក ជំនួសកាំភ្លើងបាញ់ទឹក

ឯកឧត្តម ជា លីសែ អនុរដ្ឋលេខាធិការក្រសួងព័ត៌មាន បានអំពាវនាវដល់យុវជនពិចារណាក្នុងការប្រើប្រាស់ផ្ទិល ត្រឡោក ជាមួយពាង ឬធុងទឹក ជាអត្តសញ្ញាណខ្មែរ ជំនួសកាំភ្លើងបាញ់ទឹកដែលជាផលិតផលនាំចូលពីបរទេស។ ការអំពាវនាវនេះ បានធ្វើឡើងនៅលើគណនីហ្វេសប៊ុកផ្លូវការរបស់ឯកឧត្តមនៅរសៀលថ្ងៃទី២ ខែមេសា ឆ្នាំ២០២៥ ខណៈពិធីបុណ្យចូលឆ្នាំថ្មីប្រពៃណីជាតិខ្មែរដែលនឹងខិតជិតមកនាពេលដ៏ខ្លីខាងមុខនេះ។

គួរកត់សម្គាល់ថា ការ​លេង​បាញ់​ទឹក​ និង​ប៉ាត​ម្សៅ ​ដែល​មិន​មែន​ជា​ប្រពៃ​ណី ​វប្បធម៌​ខ្មែរ​ តែ​បែរ​ជា​ពេញ​និយម​ខ្លាំង​ពី​ស្រទាប់​យុវ​ជន​ខ្មែរ​ក្នុង​ស្រុក បើទោះបីជាក្រសួងអប់រំ អាជ្ញារាជធានីភ្នំពេញ និងអាជ្ញាធរ​ខេត្ត​មួយចំនួន បានចេញ​បម្រាម មិនឲ្យ​លេង​បាញ់ទឹក និង​ប៉ាត​ម្សៅ នៅតាមគ្រឹះស្ថានសិក្សាសាធារណៈ និងឯកជន រួមទាំងនៅតាមទីកន្លែងកម្សាន្តនានា នៅក្នុង​ឱកាស​បុណ្យ​ចូល​ឆ្នាំ​ខ្មែរនេះ​ក៏ដោយ។

ការ​ដែលហាម​លេង​ល្បែង​ទាំងនោះ គឺដោយសារតែ​ការលេង​បាញ់ទឹក​អាចបង្កជា​គ្រោះ​ថ្នាក់​ដល់​អ្នក​ធ្វើ​ដំណើរ និងមិនបង្ហាញពីអត្តសញ្ញាណខ្មែរនោះឡើយ។ ជាងនេះទៅទៀត ការ​ប្រើ​ប្រាស់​សម្ភារៈ​ទាំងនេះ គឺ​បានផលចំណេញ​សេដ្ឋកិច្ច​ទៅលើប្រទេសជិតខាងជាអ្នក​ផលិត ខណៈកាំភ្លើងបាញ់ទឹក និងម៉្សៅ គឺសុទ្ធតែជារបស់នាំចូល ហើយ​ពលរដ្ឋ​ខ្មែរ​ជា​អ្នកចំណាយ។

ទោះបីការបាញ់ទឹកខ្លាំងៗ តាមដងផ្លូវ ដាក់គ្នាមិន​ត្រូវបានអនុញ្ញាត​កន្លងមកកម្មវិធីសង្ក្រាន្តថ្នាក់ខេត្ត-រាជធានី មានរៀបចំកន្លែងលេងជះទឹក នៅទីតាំងសមរម្យមួយដែលគេរៀបចំ និងឲ្យឈ្មោះថា “តំបន់ត្រជាក់ចិត្ត” ធ្វើឲ្យបងប្អូនប្រជាពលរដ្ឋខ្មែរអាចចូលរួមលេងទឹកបានដោយរីករាយ និងគ្មានហានិភ័យ ដូចការលេងគប់ទឹក បាញ់ទឹកតាមដងផ្លូវ ដែលផ្ទុយនឹងបំរាមរបស់អាជ្ញាធរ៕

អត្ថបទ៖ អក្ខរា