ផ្លូវចរាចរណ៍ទេសចរ ពីសហគមន៍អន្លង់ធំទៅកាន់ស្រះដំរី ប្រវែងប្រមាណជាង៦គីឡូម៉ែត្រ ចាប់ផ្តើមដាក់គ្រឿងចក្រជួសជុលហើយកាលពីថ្ងៃទី២៨ ខែមីនា ឆ្នាំ២០២៥ ដោយរក្សាសណ្ឋានផ្លូវដើម និងមិនឲ្យបាត់បង់គុណតម្លៃវប្បធម៌។
ការជួសជុសនេះ បានចាប់ផ្តើមឡើង បន្ទាប់ពីមានបទបញ្ជារបស់សម្តេចនាយករដ្ឋមន្ត្រី ហើយកាលពីថ្ងៃទី២៦ ខែកុម្ភ: ឆ្នាំ២០២៥ ឯកឧត្តម ប្រាក់ សោភ័ណ អភិបាលនៃគណ:អភិបាលខេត្តសៀមរាប និងឧត្តមសេនីយ៍ទោ ខេង សុហ្វីណេ មេបញ្ជាការរង កងវិស្វកម្មតេជោ ហ៊ុន សែន សៀមរាប បានចុះទៅជួបពលរដ្ឋសហគមន៍ ក្នុងគោលបំណងសាកសួរបន្ថែម អំពីចំណាប់អារម្មណ៍ និងការឯកភាពនានាក្នុងការរៀបចំ។
តាមរយៈជំនួបប្រកបដោយភាពស្និទ្ធស្នាល និងស្នាមញញឹម អាជ្ញាធរខេត្ត និងប្រជាសហគមន៍ បានឯកភាពគ្នា ក្នុងការធ្វើឱ្យប្រសើរឡើងផ្លូវពីសហគមន៍ឆ្ពោះទៅកាន់ស្រះដំរី ដែលជាផ្លូវចរាចរណ៍ទេសចរដ៏សំខាន់របស់សហគមន៍អន្លង់ធំ មានប្រវែងប្រមាណជាង ៦គីឡូម៉ែត្រ ដើម្បីផ្តល់ភាពងាយស្រួលក្នុងការធ្វើដំណើរ និងសុវត្ថិភាពដល់ភ្ញៀវទេសចរ ក៏ប៉ុន្តែការជួសជុលនេះ គឺឈរលើការថែរក្សាសណ្ឋានផ្លូវដើម ដោយមិនធ្វើឱ្យមានការប៉ះពាល់ណាមួយនោះទេ ។
ដោយឡែក ក្រោយពិភាក្សាជាមួយប្រជាពលរដ្ឋ លោកគ្រូអ្នកគ្រូ ក៏មានការឯកភាពរួមគ្នាក្នុងការសម្រេចឱ្យសាងសង់អនុវិទ្យាល័យថ្មី នៅទីតាំងថ្មី អគារថ្មីមួយខ្នងពីរជាន់ ១២បន្ទប់ ជាជំហ៊ានទីមួយ ហើយនឹងរៀបចំក្របខណ្ឌ ស្នើសុំជាវិទ្យាល័យទៅថ្ងៃក្រោយ។ បច្ចុប្បន្នគ្រឿងចក្របានដាក់ដល់ទីតាំងសម្រាប់ត្រៀមសម្អាត និងឈូសឆាយដីថ្មីតែនៅមិនទាន់អាចដំណើរការបាននោះទេ គឺត្រូវរង់ចាំជំនាញចុះមកពិនិត្យ និងបោសសម្អាតមីន និងគ្រាប់មិនទាន់ផ្ទុះសិន ដើម្បីអាចនឹងចាប់ផ្តើមការសាងសង់បាននៅពេលដ៏ខ្លីខាងមុខ។
ព្រមជាមួយគ្នា សម្តេចបវរធិបតី នាយករដ្ឋមន្ត្រី ក៏បានឯកភាពផ្តល់ជូននៅអគារទីចាត់ការមួយខ្នង អគារបណ្ណាល័យ មួយខ្នង និងអគារស្នាក់នៅលោកគ្រូអ្នកគ្រូ មួយខ្នង ដែលមាន៣បន្ទប់គេង ជូនដល់សាលាបឋមសិក្សាសម្តេចឪសម្តេចម៉ែអន្លង់ធំ ហើយបានចាប់ផ្តើមដំណើរការសាងសង់ចាប់ពីថ្ងៃទី០១ មីនា៕
អត្ថបត៖ ពុទ្ធិកា
