លោកអ្នកឧកញ៉ា លាង ឃុន សហស្ថាបនិក និងជាប្រធានក្រុមប្រឹក្សាភិបាលក្រុមហ៊ុន ជីប បានបង្ហាញមោទកភាពពេលដែលបានចូលរួមចំណែកក្នុងការជួយទៅដល់អតីតយុទ្ធជន ដែលមានគុណបំណាច់ និងបានពលីកម្មបូជាសាច់ស្រស់ ឈាមស្រស់ ដើម្បីបុព្វហេតុជាតិ មាតុភូមិ និងប្រជាជន។ ការបង្ហាញមោទកភាពរបស់លោកអ្នកឧកញ៉ា បែបនេះ បានធ្វើឡើងនៅក្នុងពិធីប្រគល់ផ្ទះចំនួន១០០ខ្នង ដែលជាអំណោយដ៏ថ្លៃថ្លារបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី និងកសាងដោយក្រុមហ៊ុន ជីប ម៉ុង ដើម្បីចែកជូនអតីតយុទ្ធជន ស្ថិតក្នុងភូមិដងក្តា ឃុំក្រយា ស្រុកសន្ទុក ខេត្តកំពង់ធំ នាថ្ងៃទី១៧ ខែកុម្ភៈ ឆ្នាំ២០២៥ ។
លោកអ្នកឧកញ៉ា លាង ឃុន បានបញ្ជាក់ថា អតីតយុទ្ធជនដែលជាប្រតិបត្តិកររបស់សម្តេចតេជោ ហ៊ុន សែន បានដឹងស្រាប់ហើយថា កម្ពុជាបានឆ្លងកាត់ការ លំបាកជាច្រើនដោយសារសង្គ្រាម ហើយទើបរយៈពេល២៦ ឆ្នាំចុងក្រោយ ទើបទទួលបានសុខសន្តិភាព និងការឯកភាព តាមរយៈនយោបាយឈ្នះ ឈ្នះរបស់ សម្តេចតេជោ ហ៊ុន សែន អតីតនាយករដ្ឋមន្ត្រី ដែលមានកម្ពុជាផ្ទាល់ជាអ្នកផ្តួចផ្តើម និងជាអ្នកប្រតិបត្តិដើម្បីបញ្ចប់សង្គ្រាមទាំងស្រុងនៅកម្ពុជា។
នាឱកាសដែរនោះ ឯកឧត្តមទេសរដ្ឋមន្រ្តី គន់ គីម អនុប្រធាន និងជាអគ្គលេខាធិការសមាគមអតីតយុទ្ធជនកម្ពុជា ក៏បានលើកឡើងដែរថា អស់រយៈពេលជាង១៧ឆ្នាំមកហើយ ដែលសមាគម អតីតយុទ្ធជនកម្ពុជា ត្រូវបានបង្កើតឡើងដោយគំនិតផ្តួចផ្តើម ក្រោមការដឹកនាំរបស់សម្តេចតេជោ ហ៊ុន សែន ប្រធានសមាគមអតីតយុទ្ធជនកម្ពុជា និងជាអតីតនាយករដ្ឋមន្រ្តីដ៏ឈ្លាសវៃប្រកបដោយគតិបណ្ឌិត ធ្វើឲ្យប្រទេសជាតិ មានសុខសន្តិភាព មានស្ថិរភាពនយោបាយ មានការអភិវឌ្ឍន៍ឥតឈប់ឈរលើគ្រប់វិសយ័ និងមានកិត្យានុភាព ល្បីរន្ទឺនៅលើឆាកអន្តរជាតិ។
ក្នុងន័យនេះសម្តេចធិបតី ហ៊ុន ម៉ាណែត នាយករដ្ឋមន្រ្តី និងជាអនុប្រធានសមាគមអតីតយុទ្ធជនកម្ពុជា ជានិច្ចកាលតែងបានចុះជួបផ្ទាល់ជាមួយបងប្អូនអតីតយុទ្ធជននៅមូលដ្ឋាន ដើម្បីស្វែង យល់ពីសុខទុក្ខ និងការលំបាករបស់បងប្អូន ហើយបានរិះរកគ្រប់មធ្យោបាយ ដើម្បីជួយលើកស្ទួយជីវភាពអតីតយុទ្ធជនឱ្យទទួលបាននូវអត្ថប្រយោជន៍ជាច្រើន ដោយបានកែប្រែជីវភាពរស់នៅកាន់តែល្អប្រសើរឡើង។
ឯកឧត្តមទេសរដ្ឋមន្រ្តី បានបន្តថា ដោយមើលឃើញពីការលំបាក សម្តេចបវរធិបតី ហ៊ុន ម៉ាណែត បានសម្រេចផ្តល់អំណោយជាផ្ទះចំនួន១០០ខ្នងបន្ថែមជូនអតីតយុទ្ធជនខេត្តកំពង់ធំ។ ក្នុងនោះ ក្រោមការដឹកនាំរបស់រាជរដ្ឋាភិបាល នីតិកាលទី៧ សម្តេចធិបតី នាយករដ្ឋមន្រ្តី បានបន្តអំពាវនាវដល់សប្បុរជនចូលរួមក្នុងការសាងសង់ផ្ទះដល់អតីតយុទ្ធជនផ្សេងទៀតដែលកំពុងមានតម្រូវការ។
ឯកឧត្តមទេសរដ្ឋមន្រ្តី ក៏រម្លឹកដែរថា គិតមកដល់ថ្ងៃនេះមានរយៈពេលជាង១ឆ្នាំហើយនៃរាជរដ្ឋាភិបាលក្រោមការដឹកនាំរបស់សម្តេចបវរធិបតី ហ៊ុន ម៉ាណែត នាយករដ្ឋមន្រ្តី ដែលសមាគមអតីតយុទ្ធជនកម្ពុជា បានបន្តគោលការណ៍ និងប្រតិបត្តិ យ៉ាងខ្ជាប់ខ្ជួនចំពោះសុខទុក្ខរបស់អតីតយុទ្ធជន ព្រមទាំងពិនិត្យ និងវាយតម្លៃដល់អតីតយុទ្ធជនដែលជួបការលំបាកឱ្យទទួលបានអាទិភាពមុនគេ ក្នុងការទទួលអំណោយផ្ទះ និងដីរបស់រាជរដ្ឋាភិបាល ក៏ដូចជាការចុះជួបសួរសុខទុក្ខ ជាប់ជាប្រចាំជាមួយបងប្អូនអតីតយុទ្ធជនគ្រប់បណ្តារាជធានី-ខេត្ត ៕
