នៅលើបណ្តាញសង្គមនៅថ្ងៃទី១៣ ខែកុម្ភៈ ឆ្នាំ២០២៥ នេះ សម្តេចតេជោ ហ៊ុន សែន ប្រធានព្រឹទ្ធសភា បានចែករំលែកនូវព័ត៌មានតូចមួយនៃផែនការភេវកម្មដែលប៉ុនប៉ងធ្វើឃាតលើសម្តេច និងក្រុមគ្រួសារ។
ក្នុងសំណេរភ្ជាប់ជាមួយវីដេអូសារសំលេងនិយាយពីផែនការធ្វើឃាត ចំនួន២វីដេអូ សម្តេចតេជោ ហ៊ុន សែន សរសេរបញ្ជាក់ថា សម្តេចបានដឹងមេធំរបស់គេជាអ្នកណាហើយនៅទីណា ប៉ុន្តែសម្តេចមិនទាន់បញ្ចេញនៅពេលនេះទេ ព្រោះត្រូវកំចាត់ពួកជ្រុលនិយម និងហិង្សានិយមឲ្យអស់សិន។
សម្តេចតេជោ ហ៊ុន សែន បានចោទជាសំនួរថា «តើប្រទេសដែលអួតខ្លួនថាប្រជាធិបតេយ្យនិងគោរពសិទ្ធមនុស្សគាំទ្រអំពើបែបនេះនិងឲ្យជនទាំងនេះស្នាក់នៅក្នុងប្រទេសខ្លួនឬទេ?។ យើងរង់ចាំមើលបណ្តាបក្សនយោបាយ និងអ្នកនយោបាយណាខ្លះ ដែលចេញមុខថ្កោលទោសឬនៅស្ងៀមឬគាំទ្រចំពោះទង្វើបែបនេះ?។»
ជាមួយគ្នានេះ សម្តេចតេជោ ហ៊ុន សែន ក៏ប្រកាសកំចាត់ចោលអ្នកណាក៏ដោយដែលចង់សម្លាប់សម្តេច និងក្រុមគ្រួសារផងដែរ។
គួរបញ្ជាក់ថា នៅក្នុងពិធីសម្ពោធអគារសិក្សា និងសមិទ្ធផលនានា នៅបរិវេណវត្តព្រះឥន្ទសាមគ្គីធម៌ ស្ថិតនៅភូមិត្រពាំងក្រពើ ឃុំក្រាំងម្កាក់ ស្រុកអង្គស្នួល ខេត្តកណ្តាល កាលថ្ងៃទី១១ ខែកុម្ភៈ ឆ្នាំ២០២៥ សម្តេចតេជោ ហ៊ុន សែន ប្រធានព្រឹទ្ធសភា បានទម្លាយថា នៅប៉ុន្មានសប្តាហ៍មកនេះ មានការរៀបចំផែនការដើម្បីវាយប្រហារដោយយន្តហោះ(ដ្រូន) ចូលទៅក្នុងភូមិគ្រឹះរបស់សម្តេចនាក្រុងតាខ្មៅ ក្នុងគោលបំណងផ្តាច់ជីវិតរបស់សម្តេច។
ផែនការនេះត្រូវបានសម្តេចដឹងជាមុន តាមរយៈសារសំឡេងសម្ងាត់ ដែលសម្តេចទទួលបាន ហើយសម្តេចបានស្នើដល់បរទេសទាំងអស់ ឱ្យមានការប្រុងប្រយ័ត្នចំពោះការគាំទ្រណាមួយ ចំពោះសកម្មភាពភេរវកម្ម ៕
អត្ថបទ៖ ពុទ្ធិកា
