ពន្ធនាគារខេត្តសៀមរាប បានចេញមកបដិសេធការចុះផ្សាយ ថាអតីតឧញ៉ា ឡេង ចាន់ណា បានលួចលាក់ប្រើប្រាស់ទូរស័ព្ទក្នុងពន្ធនាគារ ហើយបានលុបសារទាក់ទងនៅTelegram ដែលខ្លួនធ្លាប់សន្ទានកន្លងមក។
យោងលិខិតបំភ្លឺ នៅថ្ងៃទី១៣ ខែកុម្ភៈ ឆ្នាំ២០២៥ ពន្ធនាគារខេត្តសៀមរាប បានបញ្ជាក់ថា «ករណី Account Facebook ឈ្មោះ សុខ វិសាល បានចុះផ្សាយថា “ នៅតែក្នុងគុកទេ តែអាចលេងទូរស័ព្ទបាន ឥឡូវលុបឆាតទំនាក់ទំនងឯងចោលទៀត ចង់បំបាត់ភស្តុកាំងមែន”, Account Facebook ឈ្មោះ អវតារ ស. បានចុះផ្សាយថា «ទទួលឆបោកធម្មតា! មុខគេមេគុក សៀមរាប ឆ្លើយមក?» និង Account Facebook ឈ្មោះ អង្រុតពត៌មានAngrot News បានចុះ ផ្សាយថា អ្នក.ចាញ់.របោ/ក.អតីតឧញ៉ាឡេង ចាន់ណា ១.ម្លា.យថា ៖ នៅតែក្នុង.គុ/ក.ទេ តែអាចលេង ទូរស័ព្ទបាន ឥឡូវលុបឆាតទំនាក់ទំនងឯងចោលទៀត ចង់.បំ.បា.ត់.កស្តុតាងមែន។» ដែលករណីនេះជាប់ពាក់ព័ន្ធជាមួយជនត្រូវចោទឈ្មោះ ឡេង ចាន់ណា ភេទស្រី អាយុ ៣៦ឆ្នាំ ចូលពន្ធនាគារ កាលពីថ្ងៃទី១៣ ខែមីនា ឆ្នាំ២០២៤ បទល្មើស ឆបោកដោយចេតនាមាន ស្ថានទម្ងន់ទោស(ជាក្រុមមានការចាត់តាំង) និងបទ សម្អាតប្រាក់។
ក្រោយពីបានពិនិត្យលើការចុះផ្សាយរបស់ Account Facebook ទាំងបីខាងលើ ពន្ធនាគារខេត្តសៀមរាប បានអះអាងថា តាមរយៈខ្លឹមសារ ដែល Account Facebook ទាំងបីបានបង្ហោះ និងចែកចាយនេះ គឺបានបង្ហាញថាសារឆ្លើយឆ្លងចុង ក្រោយដែលមាននៅក្នុងខ្លឹមសារនេះគឺនៅថ្ងៃទី៩ ខែកុម្ភៈ (មិនបញ្ជាក់ឆ្នាំណា)។ ដោយឡែកពន្ធនាគារ បានទទួលឃុំខ្លួនឈ្មោះ ឡេង ចាន់ណា យោងតាមដីការបង្គាប់ឱ្យឃុំខ្លួន ចុះនៅថ្ងៃទី១៣ ខែមីនា ឆ្នាំ២០២៤ របស់ចៅក្រមសាលាដំបូងខេត្តសៀមរាប។
ពន្ធនាគារខេត្តសៀមរាប បន្តថា ក្នុងចំណុចនេះបានបង្ហាញឱ្យច្បាស់ថាសារទំនាក់ទំនងនេះ គឺកើតឡើងមុនជនជាប់ឃុំរូបនេះចូលពន្ធនាគារមកម្លេះ ។ ដោយឡែកពាក់ព័ន្ធទៅនឹងខ្លឹមសារដែលលើកឡើងថាសាមីខ្លួនបានធ្វើការលុបខ្លឹមសារ Telegram នេះ ពន្ធនាគារខេត្តសៀមរាប ក៏បានបញ្ជាក់ថា យោងតាមច្បាប់ស្តីពីពន្ធនាគារ ជនជាប់ឃុំមិនអនុញ្ញាតឱ្យប្រើប្រាស់ទូរស័ព្ទចល័តលក្ខណៈឯកជនបានឡើយ ហើយជាលទ្ធផល ក្រោយការឆែកឆេរបន្ទប់ឃុំខ្លួន ពន្ធនាគារខេត្តសៀមរាបពុំបានរកឃើញទូរស័ព្ទដែលជននេះលួច លាក់ក្នុងការប្រើប្រាស់នោះទេ ជនត្រូវចោទរូបនេះក៏បានបញ្ជាក់ថា Telegram ដែលខ្លួនប្រើប្រាស់ មុនចូលពន្ធនាគារកន្លងមកក៏មានក្រុមការងាររបស់ខ្លួនជាអ្នកគ្រប់គ្រងប្រើប្រាស់ផងដែរ។
ពន្ធនាគារខេត្តសៀមរាប សង្កត់ធ្ងន់ថា ចំពោះការលើកឡើងការចោទប្រកាន់ថាសារទំនាក់ទំនង Telegram នេះត្រូវបានជនត្រូវចោទជាអ្នកលុបនោះគឺជារឿងមិនត្រឹមត្រូវឡើយ៕
អត្ថបទ៖ ពុទ្ធិកា
