ឯកឧត្តម ទេព អស្នារិទ្ធ អនុរដ្ឋលេខាធិការ និងអ្នកនាំពាក្យក្រសួងព័ត៌មានបានលើកឡើងថា ការងារសាធារណមតិ មានសារៈសំខាន់ណាស់ ជាពិសេសក្នុងយុគសម័យឌីជីថល ដើម្បីគ្រប់គ្រងព័ត៌មាន រួមចំណែកធានានិរន្ដរភាពសតិអារម្មណ៍របស់ពលរដ្ឋ ពោលគឺកុំឱ្យពួកគាត់មានចិត្តច្របូកច្របល់ ដោយសារតែការទទួលបាននូវព័ត៌មានបំពុលសង្គម ជាពិសេសធ្វើយ៉ាងណាឱ្យពលរដ្ឋទទួលបាននូវព័ត៌មានត្រឹមត្រូវ មានភាពនឹងនរក្នុងចិត្ដ និងការសម្រេចចិត្តនានាប្រចាំថ្ងៃ។ ការលើកឡើងរបស់ឯកឧត្តមបែបនេះ បានធ្វើឡើងក្នុងឱកាសឯកឧត្តមអញ្ជើញដឹកនាំកិច្ចប្រជុំតម្រង់ទិសស្តីពីការងារគ្រប់គ្រងព័ត៌មាន និងសាធារណមតិជូនមន្ត្រីរាជការអគ្គនាយកដ្ឋានទីភ្នាក់ងារសារព័ត៌មានកម្ពុជា (AKP) ព្រឹកថ្ងៃទី១២ ខែកុម្ភៈ ឆ្នាំ២០២៥ នៅទីស្តីការក្រសួងព័ត៌មាន ។
ឯកឧត្ដម ទេព អស្នារិទ្ធ បានថ្លែងបញ្ជាក់ថា ក្នុងតួនាទីជាស្ថាប័នសារព័ត៌មានជាតិ យើងមានភារកិច្ចចម្បងមួយក្នុងការផ្តល់ព័ត៌មានពិត គ្រប់ជ្រុងជ្រោយ ដោយពង្រឹងតួនាទីជាប្រភពព័ត៌មានផ្លូវការ ជាសំឡេងជាតិ ដើម្បីធានាការទទួលព័ត៌មានត្រឹមត្រូវ និងជឿទុកចិត្តបានរបស់ប្រជាពលរដ្ឋ។ ឯកឧត្ដមអ្នកនាំពាក្យបានមានប្រសាសន៍បញ្ជាក់បន្ថែមទៀតថា ភារកិច្ចនេះកាន់តែមានសារៈសំខាន់ខ្លាំងថែមទៀតនៅក្នុងបរិបទសង្គមឌីជីថល ដែលសតិអារម្មណ៍របស់មហាជន មានទំនោរទៅតាមព័ត៌មានដែលទទួលបានតាមបណ្តាញទំនាក់ទំនងសង្គម ហើយថាតើអាចឱ្យសង្គមរបស់យើង មានសណ្តាប់ធ្នាប់បានដូចម្តេចទៅ ប្រសិនបើពលរដ្ឋមានការច្របូកច្របល់ដោយសារតែរឿងការផ្សព្វផ្សាយព័ត៌មានគ្រប់ប្រភេទ ទាំងពិត និងមិនពិត ល្អ និងអាក្រក់ និងព័ត៌មានបែបបំពុលនៅលាយឡំគ្នាបែបនេះ។ ឯកឧត្ដមបានបញ្ជាក់យ៉ាងដូច្នេះថា៖ «ដូច្នេះក្នុងនាមយើងជាសេនាធិការរបស់ក្រសួងព័ត៌មាន និងរាជរដ្ឋាភិបាល យើងត្រូវបន្តពង្រឹងប្រសិទ្ធភាព និងគុណភាពនៃការផលិត និងផ្សព្វផ្សាយព័ត៌មាន ដើម្បីរួមចំណែកធានាឱ្យសង្គមយើងមានសណ្ដាប់ធ្នាប់ និងស្ថិរភាព ដោយប្រជាពលរដ្ឋទទួលបានព័ត៌មានប្រកបដោយគុណភាព និងសុវត្ថិភាព»។ ឯកឧត្តមអនុរដ្ឋលេខាធិការបានគូសបញ្ជាក់ថា បច្ចុប្បន្ននេះគឺមានការប្រែប្រួលខ្លាំងក្នុងវិស័យព័ត៌មាន ដែលការប្រែប្រួលនេះដោយសារតែការផ្សព្វផ្សាយនិងទទួលព័ត៌មានតាមរយៈបណ្តាញទំនាក់ទំនងសង្គម ដែលរួមមាន ហ្វេសប៊ុក យូធូប និងតិកតុក ជាដើម ដែលតាមរបាយការណ៍របស់និយ័តករទូរគមនាគមន៍កម្ពុជា បានបង្ហាញថា កម្ពុជាគិតត្រឹមពាក់កណ្តាលឆ្នាំ២០២៤ មានអ្នកប្រើប្រាស់សេវាអ៊ីនធឺណិត ជាពិសេសការភ្ជាប់សេវាតាមរយៈស្មាតហ្វូន មានប្រមាណ ២០លានសេវា ក្នុងចំណោមប្រជាជនកម្ពុជាជាង ១៧លាននាក់។ ការណ៍នេះបានបង្ហាញពីសិទ្ធិសេរីភាពអ៊ីនធឺណិតពេញលេញរបស់អ្នកប្រើប្រាស់នៅកម្ពុជា និងការប្រើប្រាស់បណ្តាញសង្គមដោយសេរីសម្រាប់ការផ្សព្វផ្សាយ និងចែកចាយនូវព័ត៌មានដ៏សម្បូណ៍បែប ក្នុងនោះមានទាំងព័ត៌មានក្លែងក្លាយច្រើនប្រភេទ មានចរិក និងគោលបំណងផ្សេងៗគ្នាជាច្រើន។
ឯកឧត្ដមអ្នកនាំពាក្យរូបនេះបានជម្រាបជូនផងដែរថា កាលពីឆ្នាំ២០២៤កន្លងទៅ គណៈកម្មការប្រឆាំងព័ត៌មានក្លែងក្លាយរបស់ក្រសួងព័ត៌មានបានរកឃើញព័ត៌មានក្លែងក្លាយចំនួន ៣ ៦៥១ ករណី ហើយក្នុងចំណោមព័ត៌មានក្លែងក្លាយទាំងនេះ គឺមានរឿងរសើបជិត ៤០០ករណី ត្រូវបានវាយតម្លៃថាអាចបង្កផលវិបាកនិងជះឥទ្ធិពលអវិជ្ជមានដល់សង្គមជាតិ ដែលយើងបានធ្វើការឆ្លើយតបបានទាន់ពេលវេលាក្នុងក្របខ័ណ្ឌសាធារណមតិ និងក្នុងក្របខ័ណ្ឌយន្តការច្បាប់ផងដែរ ដើម្បីរក្សាប្រក្រតីភាព ស្ថិរភាព និងនិរន្តរភាពសណ្តាប់ធ្នាប់ក្នុងការរស់នៅប្រចាំថ្ងៃ។ ក្នុងឱកាសនោះ ឯកឧត្តមអនុរដ្ឋលេខាធិការ និងជាអ្នកនាំពាក្យក្រសួងព័ត៌មានបានអះអាងពីសេរីភាពសារព័ត៌មាន និងសេរីភាពនៃការបញ្ចេញមតិនៅកម្ពុជាដោយលើកឡើងថាមានលក្ខណៈល្អប្រសើរ ហើយឯកឧត្ដមក៏បានបដិសេធចំពោះការលើកឡើងក្នុងសាធារណមតិដែលថាលំហសេរីភាពសារព័ត៌មាននៅកម្ពុជាបានរួមតូច សិទ្ធិសារព័ត៌មានត្រូវបានរឹតត្បិត អ្នកសារព័ត៌មានទទួលរងការធ្វើទុក្ខបុកម្និញ គ្មានសុវត្ថិភាពក្នុងការចុះយកព័ត៌មាន អ្នកសារព័ត៌មានទទួលការគំរាមកំហែង និងច្បាប់សារព័ត៌មានមិនត្រូវបានអនុវត្ត «សោះ» ជាដើម ដែលជាការលើកឡើងដែលមានភាពលម្អៀង គ្មានតុល្យភាព មិនបានឈរលើមូលដ្ឋាននៃការពិតនិងស្ថានភាពជាក់ស្តែងក្នុងវិស័យទាំងមូល។ ការអះអាងរបស់ឯកឧត្តមអនុរដ្ឋលេខាធិការថាស្ថានភាពសេរីភាពសារព័ត៌មានមានភាពល្អប្រសើរបែបនេះ គឺបានធ្វើឡើងដោយឈរលើមូលដ្ឋាននៃការវាយតម្លៃបែបវិទ្យាសាស្ត្រដោយកម្ពុជាផ្ទាល់ក្នុងឆ្នាំ២០២៤ ដែលលទ្ធផលនៃការវាយតម្លៃត្រូវបានផ្សព្វផ្សាយយ៉ាងទូលំទូលាយទាំងក្នុងនិងក្រៅប្រទេស។
យោងតាមរបាយការណ៍របស់ក្រសួងព័ត៌មានបានឱ្យដឹងថា ក្នុងខែមករា ឆ្នាំ២០២៥នេះ មាន ២ ២៥៨ រឿង ត្រូវបានផលិតនិងផ្សព្វផ្សាយជូនសាធារណៈជនក្នុងមូលដ្ឋានរាជធានី-ខេត្តទាំង២៥ ជាទម្រង់ចម្រុះមានអត្ថបទ រូបថត សារសំឡេង និងវីដេអូ ដោយក្នុងនោះ មានប្រធានបទសាធារណមតិចំនួន ១៩៩ ករណី និងព័ត៌មានក្លែងក្លាយចំនួន ៤១ ករណី ត្រូវបានឆ្លើយតប បំភ្លឺ និងពន្យល់សាធារណជន ជម្រះការមន្ទិល ឱ្យពលរដ្ឋអស់ក្តីបារម្ភ ធានាភាពសុខសាន្តរបស់ប្រជាពលរដ្ឋ និងសណ្តាប់ធ្នាប់ល្អក្នុងសហគមន៍៕
