តាមរយៈដំណើរទស្សនកិច្ចរបស់សម្តេចបវរធិបតី ហ៊ុន ម៉ាណែត , ប្រធានាធិបតីហ្វីលីពីន បានប្តេជ្ញាពន្លឿនការរៀបចំអនុស្សារណៈយោគយល់គ្នា ស្តីពីការនាំចេញអង្ករក្រោមក្របខណ្ឌរវាងរដ្ឋនិងរដ្ឋ។ នេះបើតាមការបញ្ជាក់របស់ឯកឧត្តម សូ ណារ៉ូ រដ្ឋមន្ត្រីប្រតិភូអមនាយករដ្ឋមន្ត្រី ក្នុងសន្និសីទសារព័ត៌មាន ស្តីពីលទ្ធផលនៃដំណើរទស្សនកិច្ចរបស់សម្តេចបវរធិបតី ហ៊ុន ម៉ាណែត នៅប្រទេសហ្វីលីពី នៅល្ងាចថ្ងៃទី១១ ខែកុម្ភៈ ឆ្នាំ២០២៥ ។
ឯកឧត្តម សូ ណារ៉ូ បានបន្តថា តាមរយៈដំណើរទស្សនកិច្ចលើកនេះ សម្តេចបវរធិបតី ហ៊ុន ម៉ាណែត និងប្រធានាធិបតីហ្វីលីពីន ក៏ប្តេជ្ញាអនុវត្តឲ្យអស់លទ្ធភាពនៃអនុស្សារណៈយោគយល់គ្នា ស្តីពីកិច្ចសហប្រតិបត្តិការលើវិស័យកសិកម្ម កសិ-ពាណិជ្ជកម្មផងដែរ។
បន្ថែមពីនេះដែរ សម្តេចបវរធិបតី នាយករដ្ឋមន្ត្រី បានលើកពីសក្ដានុពលនៃពាណិជ្ជកម្មផលិតផលកសិកម្ម ជាពិសេសអង្ករកម្ពុជា ជូនថ្នាក់ដឹកនាំ និងអ្នកធុរកិច្ចហ្វីលីពីន និង អំពាវនាវដល់ធុរជនហ្វីលីពីននាំចូលអង្ករខ្មែរដោយផ្ទាល់ ធ្វើការវិនិយោគទំនើបកម្ម ចង្វាក់តម្លៃអង្ករកម្ពុជា និងយុទ្ធសាស្រ្តទីផ្សារអង្ករកម្ពុជានៅលើទីផ្សារហ្វីលីពីន។
គួរបញ្ជាក់ថា ក្នុងរយៈពេល ១២ខែ នៃឆ្នាំ២០២៤ កម្ពុជាបាននាំចេញអង្ករបានចំនួន ៦៥១ ៥២២តោន (អង្ករចំនួន ៦៤៥ ៨៧២ តោនបានឆ្លងកាត់ការស្នើសុំការបញ្ជាក់ឯកសារនាំចេញពីអជ្ញាធរមានសមត្ថកិច្ច) តាមរយៈក្រុមហ៊ុននាំចេញអង្ករចំនួន ៥៧ក្រុមហ៊ុនទៅកាន់គោលដៅចំនួន៦៨។
ចំពោះប្រភេទអង្ករ បាននាំចេញអង្ករក្រអូបចំនួន ៧៦.១៥% ប្រភេទអង្ករស ធម្មតា ១៨.៧០% អង្ករចំហ៊ុយ ៣.១០% អង្ករសរីរាង្គចំនួន ១.៧៨% និងអង្ករផ្សេងៗចំនួន ០.២៧%។
ប្រទេសកម្ពុជា ក៏បាននាំចេញស្រូវចំនួន ៥ ១៨០ ១៥៥ តោនស្រូវសើម ដែលគិតជាទឹកប្រាក់បានប៉ាន់ប្រមាណ ១ ៤៩៦ លានដុល្លារសហរដ្ឋអាមេរិក ដែលក្នុងនោះ ៨៩% បាននាំចេញដោយឆ្លងកាត់ការស្នើសុំការបញ្ជាក់ឯកសារនាំចេញ ពីអាជ្ញាធរមានសមត្ថកិច្ច៕
អត្ថបទ៖ ពុទ្ធិកា
