ស្ពានដែកបេឡេ ដែលសម្តេចបវរធិបតី ហ៊ុន ម៉ាណែត នាយករដ្ឋមន្ត្រី បានផ្តល់ជូនប្រជាពលរដ្ឋស្រុកលំផាត់ និងស្រុកកូនមុំ ក្នុងខេត្តកាលពីថ្ងៃទី២៤ តុលា ២០២៤ នៅពេលនេះបានសម្រេចការសាងសង់ ១០០% និងបានដាក់ឱ្យប្រើប្រាស់ជាបណ្ដោះអាសន្ន។
លើបណ្តាញទំនាក់ទំនងសង្គមនាព្រឹកថ្ងៃទី១០ ខែកុម្ភៈ ឆ្នាំ២០២៥នេះ សម្តេចបវរធិបតី ហ៊ុន ម៉ាណែត នាយករដ្ឋមន្ត្រី បានបញ្ជាក់ថា ស្ពានដែកបេឡេនេះ នៅចំណុចអូរទទឹង ស្ថិតក្នុងភូមិសាស្រ្ត ភូមិសាមខា ឃុំជ័យឧត្តម ស្រុកលំផាត់ និងភូមិនាងដី ឃុំសិរីមង្គលស្រុកកូនមុំ ខេត្តរតនគិរី គឺជាសមិទ្ធផលថ្មីមួយទៀត សម្រាប់ខេត្តរតនគិរី ពីព្រោះថាផ្លូវនេះមានសារសំខាន់ខ្លាំងណាស់ សម្រាប់បម្រើដល់វិស័យសាធារណៈ និងបម្រើសេចក្តីត្រូវការរបស់ ប្រជាពលរដ្ឋនៅក្នុងមូលដ្ឋានផ្ទាល់ ក្នុងការធ្វើដំណើរឆ្លងកាត់ ចេញចូល ការប្រកបរបរកសិកម្ម ការដឹកជញ្ជូនទំនិញ និងកសិផលនានា ពីទីជនបទដាច់ស្រយាល ទៅកាន់ទីប្រជុំជន ជាពិសេស ការធ្វើដំណើរនៅក្នុងរដូវវស្សា លែងជួបការលំបាក ដូចពេលមុនទៀតហើយ ។
សម្តេចបរវធិបតី នាយករដ្ឋមន្ត្រី ក៏អរគុណចំពោះក្រសួងអភិវឌ្ឍន៍ជនបទ កងវិស្វកម្មសម្ដេចតេជោខេត្តសៀមរាប និងរដ្ឋបាលខេត្តរតនគិរី ដែលបានសហការគ្នាធ្វើការសាងសង់ស្ពាននេះបានយ៉ាងឆាប់រហ័ស តាមបទបញ្ជារបស់ខ្ញុំដើម្បីជាផលប្រយោជន៍ជូនប្រជាពលរដ្ឋ។
អត្ថបទ៖ ពុទ្ធិកា
