កម្ពុជា នឹងបញ្ជូនកងកម្លាំងរក្សាសន្តិភាពចំនួន៣កងអនុសេនាធំ ដែលមានកម្លាំងចំនួន៣៥៥នាក់ ក្នុងនោះមានកម្លាំងនារីចំនួន៨៦នាក់ ទៅចូលរួមបំពេញបេសកកម្មអង្គការសហប្រជាជាតិ នៅ៣តំបន់បេសកកម្មផ្សេងគ្នា រួមមាន
សាធារណរដ្ឋស៊ូដង់ខាងត្បូង សាធារណរដ្ឋលីបង់ និងសាធារណរដ្ឋអាហ្វ្រិកកណ្តាល ។
ពិធីជូនដំណើរកងកម្លាំងមួកខៀវកម្ពុជា ដែលត្រៀមទៅចូលរួមបេសកកម្មរក្សាសន្តិភាពរបស់អង្គការសហប្រជាជាតិ នេះបានធ្វើឡើង នាព្រឹកថ្ងៃទី០៥ ខែកុម្ភៈ ឆ្នាំ២០២៥ នៅទីស្តីការក្រសួងការពារជាតិ ក្រោមអធិបតីភាពឯកឧត្តម ឧបនាយករដ្ឋមន្ត្រី ទៀ សីហា រដ្ឋមន្ត្រីក្រសួងការពារជាតិ និងជាប្រធានគណៈកម្មាធិការជាតិ និងឯកឧត្តម ចូសិហ្វ ស៊ូអើ អ្នកសម្របសម្រួលអង្គការសហប្រជាជាតិប្រចាំកម្ពុជា។
ឯកឧត្តម ឧត្តមសេនីយ័ទោ សែម រតនា អនុប្រធានទី១គណៈកម្មាធិការជាតិ និងជាអគ្គនាយកស្តីទីមជ្ឈមណ្ឌលជាតិរក្សាសន្តិភាព បានឲ្យដឹងថា កងទាំង៣ត្រៀមចេញបេសកកម្មនេះ រួមមានកងរាជអាវុធហត្ថលេខ៨៧២ ចេញបំពេញបេសកកម្មនៅសាធារណរដ្ឋស៊ូដង់ខាងត្បូង (UNMISS) ,កងវិស្វកម្មពហុជំនាញលេខ៨៦៣ ចេញបំពេញបេសកកម្មនៅសាធារណរដ្ឋលីបង់ (UNIFIL) និងកងកម្ទេចគ្រឿងផ្ទុះលេខ៩៨ទី៣ ចេញ បំពេញបេសកកម្មនៅសាធារណរដ្ឋអាហ្វ្រិកកណ្តាល (MINUSCA)។
ជាមួយគ្នានេះ ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ក៏បានលើកឡើងថា កងកម្លាំងដែលនឹងចេញដំណើរទៅចូលរួមបេសកកម្មនៅពេលខាងមុខនេះ គឺមានជំនាញបោសសម្អាតមីន រាជអាវុធហត្ថ មន្ទីរពេទ្យកម្រិត១ កម្ទេចគ្រាប់មិនទាន់ផ្ទុះ វិស្វកម្មព្រលានយន្តហោះ វិស្វកម្មពហុជំនាញ។ ចំពោះការបញ្ជូនកងកម្លាំងទៅបេសសកម្ម UN គឺកម្ពុជាឈរលំដាប់លេខរៀងទី២៧ ក្នុងចំណោម១២០ប្រទេសបរិច្ចាគកងកម្លាំង និងលេខ៣ក្នុងសហគមន៍អាស៊ាន រីឯនារីឈរលំដាប់លេខរៀងទី១២ ក្នុងចំណោម១២០ប្រទេស និងលេខ២ក្នុងសហគមន៍អាស៊ាន។
ឯកឧត្តម នាយឧត្តមសេនីយ៍ ទៀ សីហា បានបង្ហាញជំនឿយ៉ាងមុតមាំថា ក្នុងនាមកុលបុត្រដ៏ឆ្នើមនៃកងយោធពលខេមរ ភូមិន្ទ អស់លោក លោកស្រី ជានាយទាហាន នាយទាហានរង ពលទាហាន ពិតជាប្តេជ្ញាខិតខំប្រឹងប្រែងបំពេញភារកិច្ច ក្នុងស្មារតីទទួលខុសត្រូវខ្ពស់បំផុត និងបន្តនាំមកនូវជោគជ័យ និងកិត្តិយសជូនជាតិ មាតុភូមិដ៏ល្អបវរនៃយើងជាក់ជាពុំខាន។
លោក ចូសិហ្វ ស៊ូអឺ (Joseph Scheuer) អ្នកសម្របសម្រួលអង្គការសហប្រជាជាតិប្រចាំកម្ពុជា ក៏បានបញ្ជាក់ដែរថា កងកម្លាំងរក្សាសន្តិភាពកម្ពុជា បានរក្សាប្រពៃណីដ៏ផូរផង់ប្រកបដោយមោទនភាពលើបេសកកម្មរក្សាសន្តិភាព ដោយកងកម្លាំងកម្ពុជាជិត១ម៉ឺននាក់ បានចូលរួមបំពេញបេសកកម្មជាច្រើនក្នុងប្រទេសចំនួន១០ និងជាកម្លាំងសមូហភាពមួយដែលត្រូវបានពិភពលោកទទួលស្គាល់យ៉ាងល្អទៅលើស្នាដៃរបស់ពួកគាត់៕
អត្ថបទ៖ ពុទ្ធិកា
