យ៉ាងហោចណាស់ មនុស្ស២នាក់បានស្លាប់ និង៥នាក់ទៀតរងរបួសធ្ងន់ ត្រូវបានបញ្ជូនទៅសង្គ្រោះនៅមន្ទីរពេទ្យភា្លមៗ នៅក្នុងហេតុការណ៍ឆេះក្លឹបកម្សាន្ដមួយកន្លែងឈ្មោះ«មីតណាយព្រីមៀរ» ស្ថិតចំណុចផ្លូវ៥០ម៉ែត្រ ភូមិប្រការ សង្កាត់ព្រៃស ខណ្ឌដង្កោ រាជធានីភ្នំពេញ នៅព្រឹកថ្ងៃទី៥ ខែមករា ឆ្នាំ២០២៥។
បើតាមលោកវរសេនីយ៍ឯក ព្រហ្ម យ៉ន នាយការិយាល័យនគរបាលបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ បានប្រាប់សារព័ត៌មានក្នុងស្រុកថា កម្លាំងជំនាញការិយាល័យនគរបាលបង្ការពន្លត់អគ្គិភ័យ និងសង្គ្រោះ បានយកចិត្តទុកដាក់ខ្ពស់នៅក្នុងប្រតិបត្តិការជួយសង្គ្រោះប្រជាពលរដ្ឋឲ្យបានទាន់ពេលវេលា ហើយកងកម្លាំងពន្លត់អគ្គិភ័យដែលប្រចាំការនៅគ្រប់បណ្តាលគោលដៅទាំងអស់ បានចេញជួយអន្តរាគមន៍បាញ់ទឹកពន្លត់ កុំឲ្យមានការឆាបឆេះបន្តដល់ផ្ទះប្រជាពលរដ្ឋដែលនៅក្បែរនោះ។
ការសង្គ្រោះនេះ កម្លាំងសមត្ថកិច្ចជំនាញ បានប្រើប្រាស់រថយន្តពន្លត់អគ្គិភ័យចំនួន៥៧គ្រឿង ក្នុងនោះរួមមាន រថយន្តពន្លត់អគ្គិភ័យរបស់ការិយាល័យរាជធានីភ្នំពេញ ,រថយន្តជំនួយមកពីក្រសួងមហាផ្ទៃ រថយន្តកងរាជអាវុធហត្ថរាជធានីភ្នំពេញ , រថយន្តកងពលតូចលេខ៧០ , រថយន្តស្រាបៀរកម្ពុជា , រថយន្តរបស់សួនឧស្សាហ៍កម្មកាណាឌីយ៉ា , និងរថយន្តទីក្រុងនរា ។
ដោយឡែក ចំពោះប្រភេទសំណង់ខាងលើនេះ គឺថ្មបេតុង ទំហំ (៣៥ម៉ែត្រ x៤០ម៉ែត្រ) ឆេះក្លឹបកម្សាន្ដ យីហោ «មីណាយព្រីមៀរក្លឹប» ចំនួន១ក្លឹប, ម៉ូតូចំនួន៥គ្រឿង រួមទាំងសម្ភារៈក្នុងក្លឹបអស់ទាំងស្រុង ហើយបានឆេះរាលដាលដល់បន្ទប់ផ្ទះសំណាក់ ទំហំ៣,៥ម៉ែត្រ x៥ម៉ែត្រ ចំនួន១បន្ទប់។ ចំពោះគ្រោះអគ្គិភ័យខាងលើនេះ ត្រូវបានកម្លាំងសមត្ថកិច្ចជំនាញ ធ្វើការបាញ់ឲ្យរលត់ទៅវិញ នៅវេលាម៉ោង ១និង៣០នាទីរសៀលនាថ្ងៃខែឆ្នាំដដែល។
តាមការស្រាវជ្រាវរបស់កម្លាំងសមត្ថកិច្ចជំនាញ បានធ្វើរកឃើញថា ហេតុការណ៍ឆេះនេះ គឺបណ្តាលមកពីជាងផ្សារដែកឆ្លងចរន្តអគ្គិសនី។
អត្ថបទ៖ ពុទ្ធិកា
