ឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពល បានព្រមានថា នឹងដកអាជ្ញាបណ្ណពីសេវាករអគ្គិសនី រូបណាដែលយកថ្លៃសេវាខុសគោលការណ៍ ឬលើសការកំណត់ ដូចជាការបង្ខំឱ្យទិញខ្សែ ទិញបរិក្ខារអគ្គិសនី ដូរកុងទ័រ ដូរឌីសង់ទ័រយកលុយ យកថ្លៃសេវាភ្ជាប់ចរន្តឡើងវិញខុសគោលការណ៍ជាដើម។ ការព្រមានរបស់ឯកឧត្តមរដ្ឋមន្ត្រី ដូចនេះ បានធ្វើឡើងនៅក្នុងពិធីបើកសន្និបាតបូកសរុបលទ្ធផលការងារឆ្នាំ២០២៤ និងលើកទិសដៅការងារ ឆ្នាំ២០២៥ របស់អាជ្ញាធរអគ្គិសនីកម្ពុជា នាថ្ងៃទី៣ ខែកុម្ភៈ ឆ្នាំ២០២៥។
ឯកឧត្តម កែវ រតនៈ បានលើកឡើងថា រាជរដ្ឋាភិបាលមិនដែលណែនាំ ឲ្យមានការយកលុយក្រៅផ្លូវការនោះទេ ហើយក្នុងឆ្នាំ២០២៥នេះ ត្រូវចាត់វិធានការឱ្យបានម៉ឺងម៉ាត់ និងលុបបំបាត់ ការយកថ្លៃសេវាក្រៅខុសគោលការណ៍របស់រាជរដ្ឋាភិបាល ឬភាពអសកម្មទាំងឡាយ ពាក់ព័ន្ធនឹងការភ្ជាប់ចរន្តឱ្យអ្នកប្រើប្រាស់គ្រប់ប្រភេទ ជាពិសេសអ្នកប្រើប្រាស់សម្រាប់ប្រភេទឧស្សាហកម្ម សិប្បកម្ម កសិកម្ម ។
«យើងមិនយករបៀបនេះមកជជែកដដែលៗទេ ការយកលុយលើស ការកៀបគេ រឿងសម្ភារ ឧបករណ៍ខុសនីតិវិធីនេះ ជាបញ្ហាដែលនឹងត្រូវដោះស្រាយ មិនចាំបាច់លើកដដែលៗទេ បើល្មើសច្រើនដងមិនស្តាប់ (សេវាករផ្គត់ផ្គង់អគ្គិសនី) ស្នើសុំនីតិវិធីដកអាជ្ញាបណ្ណ ដោះស្រាយផលប៉ះពាល់ ហើយបញ្ជូនអគ្គិសនីកម្ពុជា ទៅប្រតិបត្តិការទីតាំងដែលត្រូវដកអាជ្ញាបណ្ណតែម្តង ដើម្បីធ្វើយ៉ាងណាកុំឱ្យដាច់ចរន្តអគ្គិសនី ផ្គត់ផ្គង់ជូនប្រជាពលរដ្ឋនោះទេ»។ នេះជាបញ្ជាក់បន្ថែមរបស់ឯកឧត្តមរដ្ឋមន្ត្រី។
ទន្ទឹងនឹងនេះ ឯកឧត្តមរដ្ឋមន្ត្រី បានសង្កត់ធ្ងន់ថា នេះជាទិសដៅមុចស្រួចមួយរបស់រាជរដ្ឋាភិបាល ដែលប្តេជ្ញាធ្វើយ៉ាងណាឲ្យបម្រើសេវាជូនប្រជាពលរដ្ឋឲ្យបានល្អប្រសើរ។
បើតាមអាជ្ញាធរអគ្គិសនី បញ្ហាយកថ្លៃសេវាខុសគោលការណ៍ ឬលើសការកំណត់ នៅតែកើតមាន ប៉ុន្តែនៅមានចំនួនតិចតួច និងកើតមាននៅតំបន់របស់អ្នកផ្គត់ផ្គង់មួយចំនួនតូចប៉ុណ្ណោះ។ បញ្ហាទាំងនោះ រួមមាន ការបង្ខំឱ្យទិញខ្សែ ទិញ បរិក្ខារអគ្គិសនី ដូរកុងទ័រ ដូរឌីសង់ទ័រយកលុយ យកថ្លៃសេវាភ្ជាប់ចរន្តឡើងវិញ ខុសគោលការណ៍ ។
ជាក់ស្តែង សម្រាប់ឆ្នាំ២០២៤ មានករណីយកថ្លៃសេវាខុសគោលការណ៍ ឬលើសការកំណត់ ចំនួន ១៨ ករណី កើតមាននៅតំបន់ផ្គត់ផ្គង់ចំនួន ១៤ ហើយជាវិធានការណ៍ នៅពេលរកឃើញថា អ្នកផ្គត់ផ្គង់អនុវត្តខុស អាជ្ញាធរអគ្គិសនីកម្ពុជា តម្រូវឱ្យសងលុយទៅអ្នកប្រើប្រាស់ ចេញទាំងលិខិតណែនាំ លិខិតព្រមាន និងឈានទៅធ្វើការពិន័យជាប្រាក់ បើនៅតែប្រព្រឹត្តខុសទៀត៕
អត្ថបទ៖ ពុទ្ធិកា
