បុរសម្នាក់ត្រូវបានសមត្ថកិច្ច និងរថយន្តសង្រ្គោះដឹកបញ្ជូនទៅកាន់មន្ទីរពេទ្យកាល់ម៉ែត្រ ភា្លមៗ ក្រោយពីបានប៉ុនប៉ងធ្វើអត្តឃាត ដោយដុតខ្លួនឯង កាលពីវេលាម៉ោង០៧និង២០នាទីព្រឹក ថ្ងៃទី០២ ខែកុម្ភៈ ឆ្នាំ២០២៥ នៅចំណុចពហុកីឡដ្ឋានជាតិអូឡាំពិក(ដំបូលបី) សង្កាត់វាលវង់ ខណ្ឌ៧មករា រាជធានីភ្នំពេញ។
បុរសរងគ្រោះ មានឈ្មោះ កែវ សុខពៅ ភេទ ប្រុសអាយុ ៤០ឆ្នាំ ជនជាតិខ្មែរ មុខរបរនៅផ្ទះ ។ ទីលំនៅបច្ចុប្បន្ន នៅ ផ្លូវលេខ១៦១ ភូមិ០៣ សង្កាត់វាលវង់ ខណ្ឌ៧មករា ។
សមត្ថកិច្ច បានឲ្យដឹងថា បុរសរងគ្រោះ ត្រូវបានប្រជាពលរដ្ឋដើរហាត់ប្រាណប្រទះឃើញបានធ្វើសកម្មភាពដុតខ្លួនឯង ខណៈនោះប្រជាពលរដ្ឋ ក៏បាននាំគ្នាជួយសង្រ្គោះនិងបានទំនាក់ទំនងសមត្ថកិច្ចហៅរថយន្តពេទ្យដើម្បីសង្រ្គោះ។
សមត្ថកិច្ច បានឲ្យដឹងទៀតថា បើយោងតាមការបំភ្លឺរបស់ឈ្មោះ កែវ ស្រីតូច ភេទស្រី អាយុ៤៦ឆ្នាំ ត្រូវជាបងស្រីបុរសនោះថាប្អូនប្រុសរបស់គាត់ មានជំងឺផ្លូវចិត្ត និងធ្លាប់ប្រើប្រាស់គ្រឿងញៀន ហើយបានចេញបាត់ពីផ្ទះ០២ថ្ងៃកន្លងមកហើយ ។
បច្ចុប្បន្នបុរសនោះកំពុងសង្គ្រោះបន្ទាន់នៅមន្ទីរពេទ្យកាល់ម៉ែត្រ។ បើតាមការបញ្ជាក់ពីគ្រូពេទ្យឲ្យដឹងថាបុរសខាងលើក៏ធ្លាប់ធ្វើសកម្មភាពដុតខ្លួនឯង ម្តងរួចមកហើយ នៅម្តុំវិមានឯករាជ្យ៕
អត្ថបទ៖ ពុទ្ធិកា
