ភ្លាមៗក្រោយមានហេតុការណ៍បាក់ច្រាំងទន្លេ ចំនួន៣ទីតាំង នៅក្នុងមូលដ្ឋាន ខណ្ឌជ្រោយចង្វារ អភិបាលរាជធានីភ្នំពេញ ឯកឧត្តម ឃួង ស្រេង បានបញ្ជាឲ្យមន្ត្រីជំនាញ ដាក់គ្រឿងចក្រជាបន្ទាន់ ដោយបូមដីចាក់លុប ដើម្បីទប់ស្កាត់ការបាក់ច្រាំងទន្លេ កុំឲ្យរាលដាលបន្ត និងចុះជួយរុះរើសំណង់ផ្ទះប្រជាពលរដ្ឋដែលខូចខាត។
ទីតាំងច្រាំងទន្លេដែលបានបាក់រួមមាន៖ទី១ គឺបាក់ស្រុតច្រាំង ទន្លេ មេគង្គ ប្រវែងប្រមាណ៣០ម៉ែត្រនៅចំណុច ផ្សារក្រមួន ស្ថិតនៅភូមិខ្ទរ សង្កាត់ព្រែកលៀប ,ទីតាំងទី២ នៅចំណុចមុខវត្តបាក់ខែង សង្កាត់បាក់ខែង និងទីតាំងទី៣ នៅចំណុចមុខអនុវិទ្យាល័យចំបក់មាស សង្កាត់បាក់ខែង ។
ក្នុងដំណើរចុះពិនិត្យជាក់ស្តែង នៅទីតាំងដែលបាក់ស្រុត នាព្រឹកថ្ងៃទី០២ ខែកុម្ភៈ ឆ្នាំ២០២៥ ឯកឧត្ដមឃួង ស្រេង អភិបាលរាជធានីភ្នំពេញ ក៏បានណែនាំបន្ថែមឱ្យឯកឧត្ដមឯក ឃុនដឿន អភិបាលរងរាជធានីភ្នំពេញ ដែលទទួលបន្ទុកលើការងារនេះ ធ្វើលិខិតស្នើទៅក្រសួងធនធានទឹកនិងឧតុនិយម សុំមន្ត្រីជំនាញរបស់ក្រសួងចុះមកសិក្សានៅទីតាំង ដើម្បីបង្វែផ្លូវទឹកធ្វើយ៉ាងណាកុំឲ្យទឹកហូរមកបុកទីតាំងនេះបន្តទៀត។
គូរបញ្ជាក់ថា៖ កាលពីនារសៀលថ្ងៃទី ០១ ខែកុម្ភះ ឆ្នាំ២០២៥ មានករណីបាក់ស្រុតច្រាំងទន្លេ ប្រវែងប្រមាណ៣០ម៉ែត្រ ជិតដល់ផ្លូវបេតុង នៅចំណុច ផ្សារក្រមួន ស្ថិតនៅភូមិខ្ទរ សង្កាត់ព្រែកលៀប ខណ្ឌជ្រោយចង្វា ដែលបានធ្វើឱ្យប៉ះពាល់ផ្ទះប្រជាពលរដ្ឋ៣ខ្នង ។ សំណង់ដែលបានបាក់ស្រុតនេះ ជាប្រភេទសំណង់ថ្មី បានសាងសង់រួចប្រហែល១ឆ្នាំ ហើយទីតាំងដែលសាងសង់សំណង់នេះដែរជាទីតាំងចាក់សំរាម ហើយម្ចាស់សំណង់បានចាក់ដីនិងខ្សាច់ធ្វើសំណង់ជាបន្ទប់ជួល បើទោះបី អាជ្ញាធរសង្កាត់ធ្វើការណែនាំយ៉ាងណាក៏ដោយក៏ពួកគាត់នៅតែបន្តការសាង់សង់ និងជួលឲ្យប្រជាពលរដ្ឋស្នាក់នៅដដែល ទើបបង្កឱ្យមានហានិភ័យបែបនេះ៕
អត្ថបទ៖ ពុទ្ធិកា ,រូបភាព៖ រដ្ឋបាលរាជធានីភ្នំពេញ
