សម្តេចតេជោ ហ៊ុន សែន ប្រធានព្រឹទ្ធសភាកម្ពុជា និងជាប្រធានគណបក្សប្រជាជនកម្ពុជា នៅថ្ងៃទី៣១ ខែមករា ឆ្នាំ២០២៥ បានទម្លាយសារសំឡេងឆ្លើយឆ្លងរវាងយុវជនមួយរូបរហ័សនាម Mr. Seth ដែលធ្វើការនៅប្រទេសជប៉ុន រឿងស្នើសុំតំណែងពេលត្រឡប់មកស្រុកខ្មែរវិញ។
ការស្នើសុំតំណែងនេះ ត្រូវបានសម្តេចតេជោបដិសេធ ព្រោះយុវជនរូបនេះ រៀនចប់ត្រឹមថ្នាក់ទី៧ ដែលមិនគ្រប់ខណ្ឌក្នុងក្របខណ្ឌរដ្ឋ ដើម្បីបម្រើការងារនៅតាមក្រសួងស្ថាប័ន ឬនគរបាល ដែលត្រូវឆ្លងកាត់ការប្រឡង។
សម្តេចតេជោ បានគូសបញ្ចាក់ក្នុងខំមិនដូច្នេះថា៖ «ធ្វើនគរបាលក៏ត្រូវប្រឡងដែរតែគាត់ច្បាស់ជាមិនគ្រប់លក្ខខណ្ឌចូលប្រឡងទេ ព្រោះគេតម្រូវឲ្យរៀនចប់ថ្នាក់ទី ១២ តែគាត់រៀនថ្នាក់ទី៧។
គាត់ស្រែកខ្លាំងៗថា ចង់បានសង្គមស្អាតស្អំនិងយុត្តិធម៌ តែគាត់មកសុំឲ្យខ្ញុំធ្វើខុសពីសង្គមស្អាតស្អំនិងយុត្តិធម៌ទៅវិញ»។
តាមរយៈបណ្តាញសង្គមសម្តេចតេជោបានឲ្យដឹងថា សម្តេចបានជួយឧបត្ថម្ភក្មេងនេះ ទៅឪពុកម្តាយដើម្បីមានដើមទុនរកសុី ហើយក្មេងមួយនេះបានផ្ញើសារសុំលុយជាបន្តតែសម្តេចមិនឆ្លើយ។ ចុងក្រោយសុំការងារធ្វើតែសម្តេចបានពន្យល់យុវជនមួយនេះដូចមានសំឡេងក្នុងនេះស្រាប់។ មិនបានប៉ុន្មានស្រាប់តែយុវជននេះចេញវាយប្រហារច្រើនគោលដៅ។
សម្តេចបានហៅយុវជនរូបនេះថា ជាក្មេងពាល ដែលកែមិនឡើងដោយពោលពាក្យថា «ពាក្យចាស់តែងនិយាយថា កុំពត់ស្រឡៅកុំប្រដៅក្មេងពាលពិតជាត្រឹមត្រូវ»។ សម្តេចបានបញ្ជាក់បន្ថែមថា «កន្លងមកដោយមានការសម្របសម្រួលតុលាការបានពន្យារពេបណ្តោះអាសន្នលើរឿងក្តី១៨សីហា២០២៤។ ពេលនេះខ្ញុំមិនស្នើសុំពន្យារពេលសម្រាប់រឿងក្តីនេះទៀតទេ ព្រោះសាមីខ្លួនបានចាកចេញពីការសន្យារបស់ខ្លួនហើយ។ បញ្ជាក់កន្លងមកខ្ញុំស្នើសុំត្រឹមពន្យារពេលកាត់ក្តីប៉ុណ្ណោះមិនមែនលើកលែងការចោទប្រកាន់នោះឡើយ។ សូមមិត្តជប៉ុនស្តាប់សំឡេងកូនប្រុសម្នាក់នេះឲ្យច្បាស់តើគាត់សមនឹងទទួលបានការអនុគ្រោះឲ្យនៅប្រទេសជប៉ុនឬទេបន្ទាប់ពីអស់រយៈពេលស្នាក់នៅ»៕
