តាមរយៈសេចក្តីថ្លែងការណ៍ពិសេស នាយប់ថ្ងៃទី២៨ ខែមករា ឆ្នាំ២០២៥ សម្តេចបវរធិបតី ហ៊ុន ម៉ាណែត នាយករដ្ឋមន្ត្រី បានប្រកាសថា រាជរដ្ឋាភិបាល គ្រោងនឹងទទួលពាក្យស្នើសុំដី ពីពលរដ្ឋក្រីក្រដែលគ្មានដីពិតប្រាកដ និងចង់បានដីនៅក្នុងកម្មវិធីផ្តល់ដីការពារព្រៃ ដើម្បីរួមគ្នាអភិវឌ្ឍន៍ប្រកបដោយចីរភាព។ ការទទួលពាក្យគ្រោងបើកដំណើរការ ចាប់ពីខែកុម្ភៈ ឆ្នាំ២០២៥តទៅ។
សម្តេចបវរធិបតី ហ៊ុន ម៉ាណែត បានគូសបញ្ជាក់ថា ក្នុងគោលដៅដោះសា្រយតម្រូវការរបស់ប្រជាពលរដ្ឋដែលអត់ដីពិតប្រាកដ ក៏ដូចជាការចូលរួមចំណែកទប់ស្កាត់សកម្មភាពកាប់ទន្ទា្រនដីរដ្ឋ និងការកាប់ព្រៃឈើជាដើម រាជរដ្ឋាភិបាល បានដាក់ចេញកម្មវិធីផ្តល់ដីការពារព្រៃ ដើម្បីរួមគ្នាអភិវឌ្ឍន៍ប្រកបដោយចីរភាព ។
សម្តេចបវរធិបតីនាយករដ្ឋមន្ត្រី បានបន្តថា កន្លងមករាជរដ្ឋាភិបាល បានដាក់ចេញគោលនយោបាយ និងផ្តល់ដីជូនប្រជាពលរដ្ឋជាដំណាក់កាល ដូចជា ផ្តល់ដីជូនពលរដ្ឋមាតុភូមិនិវត្តន៍ពីព្រំដែនកម្ពុជា ពីឆ្នាំ១៩៩១ ដល់១៩៩៣, ផ្តល់ដីជូនអតីតកងកម្លាំងខ្មែរក្រហមនៅឆ្នាំ១៩៩៨, ផ្តល់ដីរដ្ឋជូនប្រជាពលរដ្ឋតាមការអនុវត្តបទបញ្ជា០១ នៅឆ្នាំ២០១២ បានប្រមាណ៦៩ម៉ឺនក្បាលដី ស្មើប្រមាណ១លាន២សែនហិកតា។
បន្ថែមពីនេះរដ្ឋាភិបាល ក៏បានធ្វើប្រទានកម្មដីរដ្ឋតាមរយៈសម្បទានសង្គមកិច្ច សម្រាប់អតីតកងកម្លាំងប្រដាប់អាវុធនិងគ្រួសារ គ្រួសារកងទ័ព នគរបាលជាតិតាមព្រំដែន និងប្រជាពលរដ្ឋក្រីក្រ ដែលចាប់ផ្តើមតាំងពីឆ្នាំ២០០៣ ដោយបែងចែកដីសរុបបាន ១លាន៤សែនហិកតា ជូនពលរដ្ឋសរុប ៤៩ម៉ឺនគ្រួសារ។
គួរបញ្ជាក់ថា សម្រាប់ទីតាំងដំបូងដែលរាជរដ្ឋាភិបាល ជ្រើសរើសក្នុងការផ្តល់ដីជូនប្រជាពលរដ្ឋក្រីក្រគ្មានដីពិតប្រាកដ គឺនៅចំណុចអូរសែវ ភូមិហាងសារ៉ាត ឃុំសាមឃួយ ស្រុកសេសាន ខេត្តស្ទឹងត្រែង ជាទីតាំងដំបូង ។ ជំហានទី១នេះ រាជរដ្ឋាភិបាលនឹងផ្តល់ជូនប្រជាពលរដ្ឋចំនួន ៥០០គ្រួសារ ដោយ ក្នុងមួយគ្រួសារទទួលបានដីលំនៅឋាន និងដឹកសិកម្មទំហំសរុប ៣ហិកតា។ បន្ទាប់ពីជំហានទី១នេះ ជំហានបន្ទាប់នឹងផ្តល់ជូនចំនួន ៥០០គ្រួសារ បន្ថែមទៀតនៅទីតាំងដដែល៕
អត្ថបទ៖ ពុទ្ធិកា
