សម្តេចតេជោ ហ៊ុន សែន ប្រធានព្រឹទ្ធសភានៃកម្ពុជា ផ្ញើសារលិខិតជូនពរបណ្តាមេដឹកនាំចិន និងវៀតណាម ក្នុងឱកាសបុណ្យចូលឆ្នាំថ្មីប្រពៃណីចិន-វៀតណាម។ ពិធីបុណ្យចូលឆ្នាំប្រពៃណីចិន និងវៀតណាមសម្រាប់ឆ្នាំ២០២៥នេះ មានរយៈពេល៣ថ្ងៃគឺនៅថ្ងៃទី២៩-៣០-៣១ ខែមករា និងថ្ងៃសែនគឺថ្ងៃទី២៨ ខែមករានេះ។
ក្នុងសារលិខិត សម្តេចតេជោ ហ៊ុន សែន ជូនពរ ឯកឧត្ដម ស៊ី ជីនពីង (Xi Jinping) ប្រធានាធិបតី និងជាអគ្គលេខាធិការ គណៈកម្មាធិការមជ្ឈឹមបក្សកុម្មុយនីស្តចិន បានលើកឡើងថា “ក្នុងឱកាសប្រកបដោយនក្ខត្តឫក្សដ៏ឧត្តមនៃពិធីបុណ្យនិទាឃរដូវ ឬបុណ្យចូលឆ្នាំប្រពៃណីជាតិចិន ខ្ញុំ រីករាយសូមសម្តែងនូវគារវកិច្ចយ៉ាងកក់ក្តៅបំផុត និងសូមប្រសិទ្ធិពរជ័យជូនចំពោះ ឯកឧត្តម និងប្រជាជនចិនជាទីរាប់អានទាំងអស់”។
ក្នុងពេលដែលកម្ពុជា និងចិនកំពុងសហការគ្នាយ៉ាងជិតស្និទ្ធនិងសកម្ម ដើម្បីកសាងសហគមន៍វាសនា រួមប្រកបដោយគុណភាពខ្ពស់ កម្រិតខ្ពស់ និងស្តង់ដាខ្ពស់ សម្តេចតេជោ មានជំនឿមុតមាំថា ឆ្នាំថ្មី នឹងបន្ថែមសន្ទុះ ថ្មីក្នុងការបន្តពង្រឹងមិត្តភាពដែកថែបរបស់យើង និងធ្វើឱ្យកាន់តែស៊ីជម្រៅថែមទៀតនូវកិច្ចស ប្រតិបត្តិការនៃភាពជាដៃគូយុទ្ធសាស្ត្រគ្រប់ជ្រុងជ្រោយរវាងប្រទេសយើងទាំងពីរ។
ក្រៅពីសារជូនពរប្រធានាធិបតីចិន សម្តេចតេជោ បានផ្ញើសារលិខិតដាច់ដោយឡែកជូនពរដល់ឯកឧត្ដម វ៉ាង ហ៊ូនីង (Wang Huning) ប្រធានគណៈកម្មាធិការជាតិ សភាប្រឹក្សានយោបាយប្រជាជនចិន ក្នុងឱកាសបុណ្យចូលឆ្នាំថ្មីប្រពៃណីចិន, ឯកឧត្ដម ចាវ ឡឹជឺ (Zhao Leji) គណៈកម្មាធិការអចិន្ត្រៃយ៍ សភាតំណាងប្រជាជនចិន (NPC) ក្នុងឱកាសបុណ្យចូលឆ្នាំថ្មីប្រពៃណីចិន និងឯកឧត្ដម លី ឈាង (Li Qiang) នាយករដ្ឋមន្ត្រីនៃសាធារណរដ្ឋប្រជាមានិតចិនផងដែរ។
បន្ថែមពីនេះសម្តេចតេជោប្រធានព្រឹទ្ធសភា ក៏បានផ្ញើសារលិខិតជូនពរបណ្តាមេដឹកនាំវៀតណាមផងដែរ រួមមាន៖ ឯកឧត្ដម តូ ឡឹម (To Lam) អគ្គលេខាធិការគណៈកម្មាធិការមជ្ឈិមបក្សកុម្មុយនីស្តវៀតណាម, ឯកឧត្ដម លឿង គឿង (Luong Cuong) ប្រធានរដ្ឋនៃសាធារណរដ្ឋសង្គមនិយមវៀតណាម, ឯកឧត្ដម ត្រិន ថាញ់មិន (Tranh Tanh Man) ប្រធានរដ្ឋសភានៃសាធារណរដ្ឋសង្គមនិយមវៀតណាម និងឯកឧត្ដម ផាម មិនជីញ (Pham Minh Chinh) នាយករដ្ឋមន្ត្រីនៃសាធារណរដ្ឋសង្គមនិយមវៀតណាម ក្នុងឱកាសពិធីបុណ្យចូលឆ្នាំថ្មីប្រពៃណីវៀតណាម។
ក្នុងសារលិខិត សម្តេចតេជោ ហ៊ុន សែន ជឿជាក់ថា ឆ្នាំថ្មីនេះ នឹងជាកម្លាំងជំរុញប្រទេសទាំងពីរ (កម្ពុជា-វៀតណាម) ក្នុងការធ្វើឱ្យកាន់តែស៊ីជម្រៅបន្ថែម ទៀតនូវមិត្តភាពជាប្រពៃណី ភាពជាអ្នកជិតខាងល្អ សាមគ្គីភាព ការជឿទុកចិត្ត ការយោគយល់គ្នាទៅ វិញទៅមក និងកិច្ចសហប្រតិបត្តិការឈ្នះ-ឈ្នះ ដើម្បីជាឧត្តមប្រយោជន៍របស់ប្រជាជន និងប្រជាជាតិទាំងពីរ៕
អត្ថបទ៖ អក្ខរា
