ឯកឧត្ដម ហ៊ុន ម៉ានី ឧបនាយករដ្ឋមន្រ្តី រដ្ឋមន្ត្រីក្រសួងមុខងារសាធារណៈ បានលើកឡើងថា «សំណេរអង្គរ» ពិតជាបានបង្ហាញនូវឆន្ទៈស្រលាញ់អក្សរសាស្រ្តជាតិរបស់បងប្អូនប្រជាពលរដ្ឋខ្មែរទូទាំងប្រទេស។ ថ្ងៃនេះ យើងឃើញមាន បេក្ខសមណៈ និងបេក្ខជន ដែលនិមន្ត និងអញ្ជើញមកពី ២៥ រាជធានី-ខេត្ត ដែលមានអាយុចាប់ពី ៦ ឆ្នាំ រហូតដល់ ៨២ ឆ្នាំ បានមកប្រកួតប្រជែងសរសេរតាមអាន ជាភាសាខ្មែរ។ ក្រៅពីបេក្ខជន ១.២២០ អង្គ-នាក់ ដែលបានចុះឈ្មោះជាផ្លូវការ បងប្អូនដែលមិនបានចុះឈ្មោះក៏បានមកត្រង់ត្រាប់ស្តាប់អំណាន និងសាកល្បងសរសេរយ៉ាងច្រើនកុះករផងដែរ។
ឯកឧត្ដម កោតសរសើរដល់ក្រុមស្ថាបនិកព្រឹត្តិការណ៍ «សំណេរអង្គរ» ដែលបានបន្តរៀបចំកម្មវិធីនេះនៅលើទឹកដីអង្គរដ៏បវរនៃដូនតា។ ព្រឹត្តិការណ៍នេះបានបង្កើតនូវស្នាមញញឹមដែលចេញពីមុខអ្នកចូលរួមទាំងអស់ដែលតំណាងឱ្យការស្រលាញ់ចំពោះអក្សរសាស្រ្ត និងកេរមរតកវប្បធម៌ដូនតាខ្មែរដែលត្រូវបានបន្តថែរក្សាបានឋិតឋេរគង់វង្ស។ ស្នាមញញឹមមួយទៀតគឺស្នាមញញឹមរបស់ដូនតាចំពោះកូនចៅជំនាន់ក្រោយដែលបានឃើញការរីកចម្រើនលូតលាស់ក្នុងសុខសន្តិភាព ដែលស្តែងចេញតាមរយៈកិច្ចការនានាដើម្បីលើកស្ទួយកេរមរតកដូនតា។
កម្មវិធីប្រកួតប្រជែងសរសេរ តាមអានសាធារណៈថ្នាក់ជាតិ “(សំណេរអង្គរ)” លើកទី២ បានប្រព្រឹត្តទៅនៅលើស្ពានហាលនៃប្រាសាទអង្គរវត្តជាតំបន់បេតិកភណ្ឌពិភពលោក របស់ អង្គការ យូណេស្កូ នាព្រឹកថ្ងៃទី១៩ ខែមករា ឆ្នាំ២០២៥។
សំណេរអង្គរ លើកទី២ ត្រូវបានរៀបចំឡើងដោយក្រសួងអប់រំ យុវជន និងកីឡា សហការជាមួយភាគីពាក់ព័ន្ធជាច្រើនរួមមាន ក្រសួងវប្បធម៌ និងវិចិត្រសិល្បៈ អាជ្ញាធរជាតិអប្សរា សហភាពសហព័ន្ធយុវជនកម្ពុជា មូលនិធិ ម៉ានី រដ្ឋបាលខេត្តសៀមរាប និងសមាគមក្លឹបទេសចរណ៍ខេត្តសៀមរាប។ កម្មវិធីនេះ រៀបចំឡើងក្នុងគោលបំណង បំផុសស្មារតីរបស់មហាជនបច្ចុប្បន្ន ជាពិសេសយុវជនឱ្យស្រឡាញ់ ថែរក្សា និងលើកស្ទួយអក្សរសាស្ត្រជាតិខ្មែរ។
គួរបញ្ជាក់ថា សំណេរអង្គរ បានរៀបចំជាលើកដំបូងកាលពីថ្ងៃទី២១ ខែមករា ឆ្នាំ២០២៤ ដោយទទួលបានគាំទ្រយ៉ាងខ្លាំងពីសំណាក់សាធារណជនគ្រប់មជ្ឈដ្ឋាន ដែលព្រឹត្តិការណ៍នេះ បានជំរុញទឹកចិត្តឱ្យកូនខ្មែរកាន់តែស្រឡាញ់អក្សរសាស្ត្រខ្មែរ ព្រមទាំងផ្សព្វផ្សាយបន្ថែមនូវរមណីយដ្ឋានអង្គរ ក៏ដូចជាការផ្សារភ្ជាប់ទៅនឹងវប្បធម៌ដ៏ល្អល្អះរបស់ព្រះរាជាណាចក្រកម្ពុជា៕
