ក្រសួងអប់រំ យុវជន និងកីឡា នឹងជួយបន្តគាំទ្រដល់គ្រូបង្រៀននៃសាលាមត្តេយ្យសិក្សាសហគមន៍ ដោយនឹងរៀបចំឱ្យមានការទទួលស្គាល់ ការបណ្តុះបណ្តាល គ្រូមត្តេយ្យសិក្សាសហគមន៍ ជាបន្តបន្ទាប់ទៀតផងដែរ។ នេះបើតាមការលើកឡើងរបស់ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា ក្នុងពេលទស្សនកិច្ចសាលាមត្តេយ្យសិក្សាសហគមន៍ ភូមិសំរោង២ នៅឃុំលាងដៃ ស្រុកអង្គរធំ ខេត្តសៀមរាប កាលពីព្រឹកថ្ងៃទី១៨ ខែមករា ឆ្នាំ២០២៥។
ឯកឧត្តមបណ្ឌិតសភាចារ្យ បានកោតសរសើរ និងថ្លែងអំណរគុណយ៉ាងជ្រាលជ្រៅដល់ក្រុមការងារពាក់ព័ន្ធ ជាពិសេសអង្គការភ្លែន ដែលបានចូលរួមគាំទ្រ និងបន្តអភិវឌ្ឍន៍សាលាមត្តេយ្យសិក្សាសហគមន៍នេះ រហូតដល់មានការរៀបចំហេដ្ឋារចនាសម្ព័ន្ធបានល្អគ្រប់គ្រាន់នៅក្នុងការរៀនសូត្រ និងការលេងសម្រាប់កុមារ ចូលរួមចំណែកក្នុងការជួយអភិវឌ្ឍការអប់រំក្នុងប្រទេសកម្ពុជាឱ្យប្រសើរឡើងថែមមួយកម្រិតទៀត។
ទន្ទឹមនឹងនេះ ឯកឧត្តមបណ្ឌិតសភាចារ្យ បានគូសបញ្ជាក់ថា ការអប់រំកុមារតូចគឺជាមូលដ្ឋានគ្រឹះដ៏សំខាន់ដ៏រឹងមាំសម្រាប់សិស្សានុសិស្ស ឱ្យទទួលបានទាំងជំនាញរឹងនិងជំនាញទន់ ការសិក្សាពេញមួយជីវិត និងបំណិនសតវត្សទី២១ ដូចជាការគិតសុីជម្រៅ ជំនាញដោះស្រាយបញ្ហាជាដើម ចេះចែករំលែក ចេះធ្វើការងារជាក្រុម ដែលទាំងអស់នេះនឹងក្លាយជាស្ពាន ឈានទៅរកភាពជោគជ័យក្នុងការសិក្សាបន្តបន្ទាប់ទៀត។
ឯកឧត្តមរដ្ឋមន្ត្រី ក៏បានលើកឡើងពីវិធីសាស្ត្របង្រៀនកុមារតូចថ្មីពោលគឺ “ការរៀនតាមរយៈការលេង” ដោយការលេងនេះគឺគោរពទៅតាមគោលការណ៍នៃការអភិវឌ្ឍកុមារទាំងប្រាជ្ញា បំណិនសង្គម និងការអភិវឌ្ឍរាងកាយជាដើម ដោយទាំងអស់ជួយឱ្យពួកគាត់ មានបំណិនក្នុងការសិក្សាពេញមួយជីវិត និងបំណិនសង្គម ដូចជាមានភាពក្លាហាន ចេះចែករំលែក ចេះធ្វើការងារជាក្រុម ឈានទៅរកភាពជោគជ័យក្នុងការសិក្សាបន្តបន្ទាប់ទៀត ទាំងក្នុងកម្រិតថ្នាក់បឋមសិក្សា មធ្យមសិក្សា ឧត្តមសិក្សា ក៏ដូចជាការសិក្សាពេញមួយជីវិតផងដែរ។
ជាថ្មីម្តងទៀត រដ្ឋមន្ត្រីក្រសួងអប់រំ បានលើកទឹកចិត្តឱ្យបន្តខិតខំបន្ថែម ដោយក្រសួងនឹងរៀបចំគោលនយោបាយដាក់សំណើថវិកាដើម្បីអភិវឌ្ឍសាលាបន្ថែម និងបានផ្តល់អនុសាសន៍ដល់ក្រុមការងារជំនាញ ឱ្យត្រូវមានគណកម្មការគ្រប់គ្រងដើម្បីប្រើប្រាស់ថវិកាឱ្យចំគោលដៅ និងត្រូវមានការចូលរួមពីលោកគ្រូ អ្នកគ្រូ និងសហគមន៍ទាំងមូល ដើម្បីធានាបានថា កុមារី និងកុមារាទាំងអស់ នឹងទទួលបានការអប់រំកម្រិតមត្តេយ្យសិក្សា ដោយការថែទាំ និងការអភិវឌ្ឍកុមារតូចប្រកបដោយគុណភាព ដើម្បីពួកគាត់ត្រៀមខ្លួនរួចជាស្រេចសម្រាប់ការអប់រំកម្រិតបឋមសិក្សា ក្លាយខ្លួនជាធនធានមនុស្ស ឆ្លើយតបនឹងចក្ខុវិស័យរបស់រាជរដ្ឋាភិបាល៕
