សម្ដេចបវរធិបតី ហ៊ុន ម៉ាណែត នាយករដ្ឋមន្រ្តី និងលោកជំទាវបណ្ឌិត ពេជ ចន្ទមុន្នី បានចាត់ឯកឧត្តមមែ ស៊ីថន ជំនួយការផ្ទាល់របស់សម្តេច នាំយកសារលិខិតចូលរួមរំលែកមរណទុក្ខ និងថវិកាឧបត្ថម្ភគ្រួសារសព ៤០លានរៀលក្នុងមួយគ្រួសារជូនដល់គ្រួសារនៃសព លោក អឿន ចាន់ដារ៉ា និងលោក ពៅ នេពីន ជាកងកម្លាំងនៃមជ្ឈមណ្ឌលសកម្មភាពកំចាត់មីនកម្ពុជា (CMAC) ដែលបានពលីក្នុងឧបទ្ទវហេតុផ្ទុះគ្រាប់មីនតោន អំឡុងពេលកំពុងប្រតិបត្តិការបោសសម្អាតមីន នៅភូមិត្រពាំងប្រីយ៍ ឃុំបាក់អន្លង ស្រុកត្រពាំងប្រាសាទ ខេត្តឧត្តរមានជ័យ។
ឯកឧត្តម ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយកនៃមជ្ឈមណ្ឌលសកម្មភាពកំចាត់មីនកម្ពុជា (CMAC) គោរពសម្តែងនូវកតញ្ញូតាធម៌ដ៏ខ្ពង់ខ្ពស់បំផុតគោរពជូន សម្ដេចបវរធិបតី និងលោកជំទាវបណ្ឌិត ដែលបានចូលរួមរំលែកមរណទុក្ខក្នុងវេលាប្រកបដោយក្ដីសោកសង្រេង ដែលនេះជាសក្ខីភាពបញ្ជាក់ពីការយកចិត្តទុកដាក់ ការលើកទឹកចិត្ត និងការផ្ដល់នូវកិត្តិយសដ៏ធំធេងរបស់ សម្ដេចបវរធិបតី និងលោកជំទាវបណ្ឌិត ចំពោះទឹកចិត្តដ៏សប្បុរសធម៌ដ៏ថ្លៃថ្លាបំផុតដល់កងកម្លាំងអង្គភាព CMAC និងជាពិសេសគ្រួសារនៃសព ដែលយើងខ្ញុំទាំងអស់គ្នានឹងចងចាំនិងគោរពដឹងគុណជានិច្ច។
សូមជម្រាបថា បុគ្គលិកបោសសម្អាតមីនពីររូប នៃមជ្ឈមណ្ឌលសកម្មភាពកំចាត់មីនកម្ពុជា បានស្លាប់បាត់បង់ជីវិតក្នុងហេតុការផ្ទុះមីនតោន នៅក្នុងប្រតិបត្តិការបោសសម្អាតមីន នាម៉ោង ៧ និង ៤៥នាទីព្រឹក ថ្ងៃទី១៦ ខែមករា ឆ្នាំ២០២៥ ស្ថិតក្នុងភូមិត្រពាំងប្រិយ៍ ឃុំបាក់អន្លូង ស្រុកត្រពាំងប្រាសាទ ខេត្តឧត្តរមានជ័យ។ មន្ត្រី (CMAC) ទាំងពីរនាក់ បានពលីជីវិតនៅក្នុងឧបទ្ទវហេតុផ្ទុះមីនតោន ក្នុងពេលកំពុងបំពេញប្រតិបត្តិការបោសសម្អាតមីន រំដោះដីស្រែរបស់ប្រជាពលរដ្ឋ នៅក្នុងភូមិ ឃុំកើតហេតុខាងលើ។
ក្រោយជួបឧបទ្ទវហេតុដ៏គួរឱ្យរន្ធត់នេះ ថ្នាក់ដឹកនាំកំពូលៗ ក្រសួងស្ថាប័ន និងអង្គភាពCMAC ទាំងមូល បានសម្តែងការសោកស្ដាយជាពន់ពេក និងបានចូលរួមរំលែកមរណទុក្ខដ៏ក្រៀមក្រំបំផុតនេះ ជាមួយក្រុមគ្រួសារសព លោក ពៅ នេពីន និងលោក អឿន ចាន់ដារ៉ា ដែលបានបាត់បង់ជីវិតនៅក្នុងឧបទ្ទវហេតុផ្ទុះមីនតោន ពេលបំពេញភារកិច្ចរំដោះដីស្រែជូនប្រជាពលរដ្ឋ៕
