ខណៈដែលមានការប្រឌិតព័ត៌មានក្លែងក្លាយផ្សាយឈ្មោះនិងរូបភាពសង្ស័យថាពាក់ព័ន្ធជាមួយឈ្មោះ លី រតនរស្មី នៅថ្ងៃទី១៧ ខែមករា ឆ្នាំ២០២៥នេះ ឯកឧត្តម ឃ្លាំង ហួត អភិបាលរងរាជធានីភ្នំពេញ បានប្រកាសថា មិនដែលស្គាល់ និងមិនដែលមានអ្វីពាក់ព័ន្ធសូម្បីតែបន្តិចជាមួយឈ្មោះ លី រតនរស្មី នោះឡើយ ។
ដោយឡែកចំពោះករណីថាសំឡេងបែកធ្លាយនោះ ឯកឧត្តម ឃ្លាំង ហួត បានអះអាងថា សំឡេងនោះមិនមែនជាសំឡេងពិតរបស់សម្តេចតេជោហ៊ុនសែនទេ គឺជាសំឡេងដែលបង្កើតឡើងដោយបញ្ញាសិប្បនិម្មិតAIប៉ុណ្ណោះ ។
ឯកឧត្តម ឃ្លាំង បានគូសបញ្ជាក់ថា ចំពោះការបង្កើតសំឡេងAIខាងលើ គឺក្រុមពួកប្រឆាំងទទួលបាននូវអត្ថប្រយោជន៍សំខាន់ចំនួន ០២ គឺ៖ទី១-បង្កាច់បង្ខូចកេរ្តិ៍ឈ្មោះ និងកិត្តិយសរបស់សម្តេចតេជោ
ទី២-ក្រុមប្រឆាំងដែលកំពុងរស់នៅទីក្រុងបាងកក ត្រូវបានអង្គការក្រៅរដ្ឋាភិបាលរៀបចំបញ្ជូនឱ្យទៅរស់នៅប្រទេសទី៣ ដូចជា៖ សហរដ្ឋអាមេរិក និងកាណាដា សមតាមបំណងរបស់ពួកគេ ។
ជានិច្ចកាលក្រុមពួកប្រឆាំងបានដាក់គោលដៅដើម្បីបំផ្លាញសម្តេចតេជោហ៊ុនសែនតាមគ្រប់រូបភាព ព្រោះសម្តេចតេជោ គឺជាគ្រឹះដ៏រឹងមាំរបស់ប្រទេស និងគណបក្សប្រជាជនកម្ពុជា។ ដូច្នេះអ្នកដែលបង្កើតសំឡេងAI គឺមានចេតនាទុច្ចរិតចង់បំផ្លាញសម្តេចតេជោ និងបំផ្លាញប្រទេសជាតិ ។
ឯកឧត្តម ឃ្លាំង ហួត បានសង្កត់ធ្ងន់ថា ដោយឡែកពាក់ព័ន្ធនឹងករណីឃាតកម្មលើលោក លិម គឹមយ៉ា នៅទីក្រុងបាងកក ផ្អែកតាមការបញ្ជាក់របស់សមត្ថកិច្ចថៃ គឺជាករណីទំនាស់ផ្ទាល់ខ្លួន មិនពាក់ព័ន្ធនឹងរឿងនយោបាយក្រៅប្រទេសនោះទេ ។
ឯកឧត្តមក៏អំពាវនាវដល់បងប្អូនជនរួមជាតិខ្មែរទាំងអស់ សូមរួបរួមសាមគ្គីគ្នាជាធ្លុងមួយ និងប្តេជ្ញាការពារសុខសន្តិភាពឱ្យបានគង់វង្ស ទោះត្រូវបង់តម្លៃណាក៏ដោយ ៕
អត្ថបទ៖ ពុទ្ធិកា
