អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ ឯកឧត្តម ឃឹម ហ្វីណង់ បានឲ្យដឹងនៅថ្ងៃទី១៦ ខែមករាថា ថ្លៃស្រូវអូអឹម(៥៤៥១)នៅតាមរោងម៉ាស៊ីនក្នុងខេត្តព្រៃវែង និងខេត្តត្បូងឃ្មុំ កើនឡើង៣លេខ(៣០៛) ក្នុងថ្ងៃនេះ បើធៀបទៅនឹងថ្លៃក្នុងថ្ងៃម្សិលមិញ ស្របពេលដែលការនាំចេញស្រូវក៏បានហក់ឡើងវិញ៣ថ្ងៃជាប់ៗគ្នា គួរឱ្យកត់សម្គាល់ រហូតដល់កម្រិតខ្ពស់បំផុតក្នុងខែមករា ឆ្នាំ២០២៥។
ការកើនឡើងថ្លៃភ្លាមៗនេះ ឯកឧត្តម នៅមិនទាន់ច្បាស់ថាមកពីមូលហេតុអ្វីនៅឡើយ អាចថាមកពីការសម្រុកទិញពីឈ្មួញកណ្តាលក្នុងតម្លៃថោកក៏ថាបាន ឬក៏មកពីកត្តាផ្សេងៗទៀត ប៉ុន្តែទីផ្សារកសិផលគឺដូច្នេះហើយ ចួនឡើងភ្លាមៗ ហើយក៏ចុះវិញភ្លាមៗ ភាគច្រើនអាស្រ័យទៅតាមតុល្យភាពនៃការផ្គត់ផ្គង់និងតម្រូវការ ដែលគេពិបាកស្មានដឹងទុកជាមុន។ តែទោះជាយ៉ាងណា នេះគឺជាសញ្ញាល្អមួយសម្រាប់បងប្អូនកសិករដែលត្រៀមប្រមូលផលស្រូវអូអឹមដែរ។
ជាមួយគ្នានេះ អ្នកនាំពាក្យក្រសួងកសិកម្ម ក៏បានបង្ហាញតម្លៃស្រូវអូអឹម(ដឹកដល់រោងម៉ាសុីន) នៅតាមរោងម៉ាស៊ីន ក្នុងខេត្តព្រៃវែង និងខេត្តត្បូងឃ្មុំ សម្រាប់ថ្ងៃទី១៦ ខែមករា ឆ្នាំ២០២៥ ៖
- រោងម៉ាស៊ីន ឈុន ធំ ៨៦០៛-៨៧០៛/គ.ក
- រោងម៉ាស៊ីន រស់ ណេង ៨៦០៛/គ.ក
- រោងម៉ាស៊ីន ឈិត ប៊ុនថន ៨៧០៛/គ.ក
- រោងម៉ាស៊ីន វិញ ជាង ៨៣០៛-៨៤០៛/គ.ក
- រោងម៉ាស៊ីន កិនស្រូវ ថន ជា ៨៤០៛-៨៦០៛/គ.ក
- ថ្លៃស្រូវអូអឹមជាមធ្យមនៅទីវាល៖ ៨២០៛
មួយរយៈពេលចុងក្រោយនេះ កសិករកំពុងប្រឈមបញ្ហាតម្លៃស្រូវ ជាពិសេសតម្លៃស្រូវ OM ដែលមានការធ្លាក់ថ្លៃយ៉ាងគំហុក។ ជុំវិញបញ្ហានេះ ក្នុងរូបភាពដើម្បីជួយដោះស្រាយបញ្ហាស្រូវធ្លាក់ថ្លៃដល់កសិករ ក្រសួងកសិកម្មបានកំពុងសម្របសម្រួលជាមួយរោងម៉ាស៊ីនមួយចំនួនឱ្យបង្កើនការទិញស្រូវប្រាំងពីកសិករ។ ក្នុងនោះ ក្រុមហ៊ុន Amru Rice ដែលជារោងម៉ាសុីនកិនស្រូវនិងជាអ្នកនាំចេញអង្ករកម្ពុជាធំជាងគេមួយទៅកាន់ទីផ្សារអន្តរជាតិបានប្រកាសប្រមូលទិញស្រូវអូអឹមចំនួន ១២០០០តោន ក្នុងតម្លៃ៨៨០រៀល ដែលជាតម្លៃលើសទីផ្សារផងដែរ៕
អត្ថបទ៖ អក្ខរា
