ក្នុងជំនួបសម្តែងការគួរសម និងពិភាក្សាការងាជាមួយឯកឧត្តម UENO Atsushi ឯកអគ្គរាជទូតវិសាមញ្ញ និងពេញសមត្ថភាព នៃប្រទេសជប៉ុនប្រចាំកម្ពុជា រសៀលថ្ងៃទី១៣ ខែមករា ឆ្នាំ២០២៥ នៅទីស្តីការក្រសួងទេសចរណ៍ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ ស្នើឯកអគ្គរាជទូជប៉ុនប្រចាំកម្ពុជាជួយបង្កើនការផ្សព្វផ្សាយអំពីសក្តានុពលនៃវិស័យទេសចរណ៍នៃប្រទេសទាំងពីរ កម្ពុជា-ជប៉ុន ព្រមទាំងជួយផ្សព្វផ្សាយអំពីសភាពការណ៍ពិតនៅកម្ពុជាទៅកាន់ប្រជាជននិងភ្ញៀវទេសចរជប៉ុន ក្នុងទាក់ទាញឱ្យមកទស្សនាកម្ពុជាកាន់តែច្រើនឡើងបន្ថែមទៀត។ ជាពិសេសការជំរុញឱ្យមានទស្សនកិច្ចសិក្សា (FAM Trip) នៃជំនួបផ្លាស់ប្ដូរធុរកិច្ចរវាងវិស័យឯកជនក្នុងវិស័យទេសចរណ៍ ក៏ដូចជាសមាគមទេសចរណ៍នៃប្រទេសទាំងពីរ ដើម្បីជំរុញឱ្យមានការផ្សព្វផ្សាយ និងការទិញលក់កញ្ចប់ទស្សនកិច្ចឱ្យបានកាន់តែច្រើនឡើង។
ឯកឧត្តមរដ្ឋមន្ត្រី ធ្លាប់បានគូសបញ្ជាក់ថា ប្រជាជនកម្ពុជាតែងតែចងចាំ និងថ្លែងអំណរគុណចំពោះជំនួយ និងការគាំទ្ររបស់ប្រទេសជប៉ុន និងប្រជាជនជប៉ុនក្នុងការកសាងអភិវឌ្ឍប្រទេសក្រោយទទួលបានសុខសន្តិភាពពេញលេញ។ ប្រជាពលរដ្ឋខ្មែរគោរពស្រឡាញ់រាប់អាន និងរីករាយរង់ចាំស្វាគមន៍ប្រជាជនជប៉ុន ដោយសារទាំងប្រជាជនកម្ពុជា និងប្រជាជនជប៉ុន មានអត្តចរិតស្លូតបូត សុភាពរាបសារ គោរពគ្នាទៅវិញទៅមក និងរួសរាយរាក់ទាក់។ លើសពីនេះទៀត ប្រជាពលរដ្ឋកម្ពុជា ក៏ចូលចិត្តម្ហូបជប៉ុន និងនិយមប្រើប្រាស់ផលិតផលពីប្រទេសជប៉ុន ដោយសារមានគុណភាពល្អនិងតម្លៃសមរម្យ។
តាមរបាយការណ៍ពីក្រសួងទេសចរណ៍ សម្រាប់រយៈពេល ១០ខែ ដើមឆ្នាំ២០២៤ កម្ពុជា ទទួលបានទេសចរអន្តរជាតិ ចំនួនប្រមាណ ៥លាន ៣៧ម៉ឺននាក់ កើនឡើង ២២% ក្នុងនោះភ្ញៀវ ទេសចរជប៉ុន មានចំនួនជិត ៩ម៉ឺននាក់ កើនឡើង ៣៤% បើធៀបនឹងរយៈពេលដូចគ្នាឆ្នាំ ២០២៣។ ដោយឡែក ក្នុងក្របខណ្ឌពាណិជ្ជកម្ម រយៈពេល ២៥ឆ្នាំចុងក្រោយនេះ ទំហំវិនិយោគរបស់ជប៉ុននៅកម្ពុជា បានកើនឡើងដល់ជាង ២,៥ពាន់លានដុល្លារ ស្មើនឹង ១៣៧គម្រោង ហើយបច្ចុប្បន្នកម្ពុជា មានពាណិជ្ជករជប៉ុនប្រមាណ ១ពាន់ ៧រយនាក់៕
អត្ថបទ៖ អក្ខរា
