មហាវិថីសម្តេចតេជោ ឬ ផ្លូវ៦០ម៉ែត្រ លាតសន្ធឹងឆ្លងកាត់សង្កាត់ចំនួន ៣ គឺសង្កាត់ចាក់អង្រែលើនិងសង្កាត់ចាក់អង្រែក្រោម ខណ្ឌមានជ័យ និង សង្កាត់ជើងឯក ខណ្ឌដង្កោ រាជធានីភ្នំពេញ។ មួយរយៈចុងក្រោយនេះ ផ្លូវធំទំនើបមួយខ្សែនេះ តែងកើតមានគ្រោះថ្នាក់ចរាចរណ៍ជារឿយៗ និងកំពុងបង្កការព្រួយបារម្ភដល់អ្នកបើកបរ។
នារសៀលថ្ងៃអាទិត្យ ទី១២ ខែមករា ឆ្នាំ២០២៥ ឯកឧត្តម ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន និង ឯកឧត្តម ឃួង ស្រេង អភិបាល នៃគណៈអភិបាលរាជធានីភ្នំពេញ បានដឹកនាំថ្នាក់ដឹកនាំក្រសួង និងក្រុមការងារបច្ចេកទេស ចុះពិនិត្យមើលស្ថានភាពចរាចរណ៍មហាវិថីសម្តេចតេជោ ៦០ម ដេីម្បីសិក្សាតម្លើងកាមេរ៉ាចាប់ល្បឿន តម្លើងបន្ថែមស្លាកសញ្ញាចរាចរណ៍ តម្លេីងបន្ថែមភ្លើងស្ដុប និងព្រមទាំងអ៊ុតគំនូសសញ្ញាចរាចរណ៍បន្ថែម។
លោក សាំ ពិសិដ្ឋ ប្រធានមន្ទីរសាធារណការ និងដឹកជញ្ជូនរាជធានីភ្នំពេញ បានឲ្យដឹងថា រដ្ឋមន្រ្តីក្រសួងសាធារណការ និងអភិបាលរាជធានីភ្នំពេញ បានឯកភាពគ្នាបង្កើនកម្លាំងនគរបាលចរាចរណ៍ ដើម្បីត្រួតពិនិត្យការអនុវត្តច្បាប់ចរាចរណ៍ និងការផាកពិន័យ ចំពោះអ្នកបើកបរលើសល្បឿនកំណត់ ពោលគឺកម្លាំងត្រូវអនុវត្តការងារដោយភាពទទួលខុសត្រូវ និងតឹងរឹងជាងមុន។ បន្ថែមពីនេះ ត្រូវគូសគំនូសសញ្ញាចរាចរណ៍ជាថ្មី និងដាក់ភ្លើងស្តុបថ្មីបន្ថែមទៀត ហើយក៏នឹងបន្ថែមចំណាំងផ្លាតលើផ្លូវនេះ ដើម្បីកាត់បន្ថយគ្រោះថ្នាក់ចរាចរណ៍ និងផ្ដល់ភាពងាយស្រួលក្នុងការធ្វើដំណើរទាំងពេលយប់ទាំងថ្ងៃ។
ប្រធានមន្ទីរសាធារណការ បានបន្តថា ការដាក់កាមេរ៉ាសុវត្ថិភាព ដាក់ផ្លាកសញ្ញាកំណត់ល្បឿន ដោយចាប់ពីភ្លើងស្តុបមែកសឺដែស ដល់ស្ពានអាកាស «មរតកតេជោ» អាចបើកបរក្នុងល្បឿន ៤០គីឡូម៉ែត្រ ក្នុងមួយម៉ោង។ ចាប់ពីផ្លូវជាតិលេខ២ មកដល់ភ្លើងស្តុបមែកសឺ ដែស កំណត់ល្បឿន ៦០គីឡូម៉ែត្រក្នុងមួយម៉ោង។
សូមជម្រាបថា ផ្លូវ ៦០ ម៉ែត្រជាផ្លូវដែលមានចរាចរណ៍ដ៏មមាញឹកមួយនិងប្រកបដោយសក្តានុពលសេដ្ឋកិច្ច ក្រុមហ៊ុននិងគម្រោងអចលនទ្រព្យធំៗជាច្រើនសុទ្ធតែស្ថិតនៅតាមបណ្តោយផ្លូវ ៦០ ម៉ែត្រនេះ ក្នុងនោះរួមមានផ្សារទំនើប អ៊ីអន មានជ័យ (អ៊ីអន ៣) ផងដែរ។ តែយ៉ាងណា ផ្លូវដ៏ធំទូលាយនេះ មិនមានដាក់របាំងខណ្ឌចែកទ្រូងផ្លូវនោះទេ។ ចំណុចនេះ អាជ្ញាធរបានបញ្ជាក់ថា មូលហេតុដែលមិនដាក់របាំងចែកទ្រូងផ្លូវ ដោយសារផ្លូវដែលមានប្រវែង៩គីឡូម៉ែត្រ និងទទឹង៦០ម៉ែត្រនេះ មានលទ្ធភាពទុកជាកន្លែងចុះចត ឬជួយសង្រ្គោះយន្តហោះ ដែលមានបញ្ហាជាយថាហេតុ៕
អត្ថបទ៖ អក្ខរា
