អ្នកឧកញ៉ា ហ៊ុន តូ បានច្រានចោលរាល់រឿងក្លែងប្រឌិតរបស់អតីតអ្នកឧកញ៉ា ហេង សិទ្ធី ដែលបានផ្សព្វផ្សាយ តាមបណ្តាញសង្គមនានា និងត្រៀមប្តឹងបកត្រឡប់ទៅវិញ ។ ក្នុងសេចក្តីបញ្ជាក់ជូនសាធារណជន នៅថ្ងៃទី០៨ ខែមករា ឆ្នាំ២០២៥ អ្នកឧកញ៉ា ហ៊ុន តូ លើកឡើងថា រាល់ទង្វើ ផ្សព្វផ្សាយ តាមបណ្តាញសង្គមនានា របស់បុគ្គលឈ្មោះហេង សិទ្ធី សុទ្ធសឹងជាការក្លែងប្រឌិត ផ្ទុយពីការពិត បំភាន់មតិសាធារណៈជន ក្នុងចេតនាទុច្ចរិតចោទប្រកាន់ ទំលាក់កំហុស មកលើរូបអ្នកឧកញ៉ា។
អ្នកឧកញ៉ា ហ៊ុន តូ បានលើកឡើងបន្តថា មួយរយៈកន្លងទៅនេះ មានការក្លែងប្រឌិតអង្គហេតុ ចោទប្រកាន់ដោយគ្មានភស្តុតាង ព្រមទាំង គំរាមសម្លាប់មកលើរូបអ្នកឧកញ៉ាពីសំណាក់បុគ្គលម្នាក់ឈ្មោះ ហេង សិទ្ធី ។ អំពើជាបន្តបន្ទាប់របស់បុគ្គលឈ្មោះ ហេង សិទ្ធី បានផ្សព្វផ្សាយតាមបណ្តាញសង្គមនានា ពិតជាបានបង្ហាញនូវចេតនាទុច្ចរិត បំពានច្បាប់ និង បានធ្វើឱ្យប៉ះពាល់យ៉ាងធ្ងន់ធ្ងរដល់កិត្តិយស សិទ្ធិប្រកបមុខរបរ សិទ្ធិការពារដោយច្បាប់ របស់រូបអ្នកឧកញ៉ា ។
ជាមួយគ្នានេះ អ្នកឧកញ៉ា ហ៊ុន តូ ក៏បានត្រៀមរួចជាស្រេច ក្នុងការប្តឹងបកត្រឡប់ទៅវិញ និងតតាំងក្តី ជាមួយបុគ្គលឈ្មោះហេង សិទ្ធី ដើម្បីការពារសិទ្ធិ ភាពត្រឹមត្រូវនៅចំពោះមុខច្បាប់ ហើយចាត់ទុកទង្វើរបស់បុគ្គលឈ្មោះ ហេង សិទ្ធី មិនត្រឹមតែប៉ះពាល់ដល់សិទ្ធិបុគ្គលរបស់ខ្ញុំទេ តែថែមទាំង បានប៉ះពាល់ធ្ងន់ធ្ងរដល់ ផលប្រយោជន៍សង្គមកម្ពុជាផងដែរ៕
