អ្នកនាំពាក្យ និងក្រុមការងារប្រតិកម្មរហ័ស នៃស្នងការដ្ឋាននគរបាលខេត្តឧត្តរមានជ័យ បំភ្លឺព័ត៌មានករណីបុគ្គលិកជនជាតិបរទេស ៥៧នាក់ រត់ចេញពីកាស៊ីណូអូរស្មាច់រីសត ក្នុងខេត្តឧត្តរមានជ័យ។
អ្នកនាំពាក្យ និងក្រុមការងារប្រតិកម្មរហ័ស បានឲ្យដឹងថា នៅថ្ងៃទី០៥ ខែ មករា ឆ្នាំ២០២៥ វេលាម៉ោង ១៤ និង ៤០ នាទី មានបុគ្គលិកជនជាតិបរទេស របស់ ក្រុមហ៊ុនក្នុងកាស៊ីណូអូរស្មាច់រីសត ចំនួន ៥៧ នាក់ ជនជាតិ ប៉ាគីស្ថាន ទាំង ៥៣ នាក់ (ស្រី ០២នាក់) និង ណេប៉ាល់ ០៤ នាក់ បានធ្វើការតវ៉ា និងនាំគ្នាដើរចេញពីក្រុមហ៊ុន ហើយត្រូវបានកម្លាំងនៃស្នងការដ្ឋាននគរបាលខេត្តឧត្តរមានជ័យ ចុះទៅសម្របសម្រួល និងនាំពួកគាត់ទាំង ៥៧ នាក់ មកស្នងការដ្ឋានដើម្បីសាកសួរ។
បើតាមអ្នកនាំពាក្យ និងក្រុមការងារប្រតិកម្មរហ័ស ជនជាតិបរទេសទាំងនោះ ពួកគាត់បានមកធ្វើការនៅប្រទេសកម្ពុជា ក្នុងក្រុមហ៊ុនមួយ នៅខេត្តព្រះសីហនុ រយៈពេលពី ០២-០៣ ខែ មកហើយ ដោយមិនទទួលបានប្រាក់ខែនោះទេ និងត្រូវបានក្រុមហ៊ុនបញ្ជូនពួកគាត់ ឲ្យមកធ្វើ ការនៅក្រុមហ៊ុនក្នុងកាស៊ីណូអូរស្មាច់វីសត ក្នុងខេត្តឧត្តរមានជ័យ វិញ ។
ក្រោយពួកគាត់បានមកធ្វើការនៅក្រុមហ៊ុនក្នុងកាស៊ីណូអូរស្មាច់រីសត បានរយៈពេល ១០ ថ្ងៃ ត្រូវអ្នក គ្រប់គ្រងជនជាតិចិន (មិនស្គាល់ឈ្មោះ) ឲ្យពួកគាត់ធ្វើការគ្មានថ្ងៃសម្រាក និងដោយភ័យខ្លាចថាខ្លួនមិនបានទទួលប្រាក់ខែ ដូចក្រុមហ៊ុននៅឯខេត្តព្រះសីហនុ ទើបពួកគាត់នាំគ្នាតវ៉ា ហើយដើរចេញពីក្រុមហ៊ុន ដោយក្នុងដៃមានកាន់ដំបងឈើ ក្នុង គោលបំណង តវ៉ាឲ្យមានពេលឈប់សម្រាកគ្រប់គ្រាន់ ខ្លះចង់បន្តការងារនៅកន្លែងដដែល ខ្លះចង់ទៅធ្វើការនៅក្រុមហ៊ុន ក្នុងខេត្តព្រះសីហនុ ខ្លះទៀតចង់ត្រឡប់ទៅប្រទេសកំណើតវិញ។
ក្រោយធ្វើការសាកសួរភទៅលើជនបរទេសទាំង ៥៧នាក់ នោះរួច ស្នងការនគរបាលខេត្ត បានបញ្ជូនជនជាតិ ប៉ាគីស្ថាន ទាំង ៥៣ នាក់ (ស្រី ០២នាក់) និង ណេប៉ាល់ ០៤ នាក់ ទៅស្នាក់ការ នៃអគ្គនាយកដ្ឋានអន្តោប្រវេសន៍ ប្រចាំ ខេត្តសៀមរាប ដើម្បីបន្តនីតិវិធី។
តាមរយៈការបំភ្លឺនេះ អ្នកនាំពាក្យ និងក្រុមការងារប្រតិកម្មរហ័ស នៃស្នងការដ្ឋាននគរបាលខេត្តឧត្តរមានជ័យ អំពាវនាវដល់សាធារណជន អ្នកសារព័ត៌មាន ពិសេសអ្នកនិយមតាមដាន ព័ត៌មាននៅលើបណ្តាញទំនាក់ទំនងសង្គម Facebook សូមកុំមានការភ័ន្តច្រឡំ តាមអត្ថបទ សារព័ត៌មាន ក្នុង និងក្រៅប្រទេស ដែលបានចុះផ្សាយ ដោយមិនបានប្រមូលនូវព័ត៌មានឲ្យបានគ្រប់ជ្រុងជ្រោយច្បាស់លាស់ ព្រមទាំង វាយប្រហារធ្វើឲ្យប៉ះពាល់នូវកិត្តិយស សេចក្តីថ្លៃថ្នូររបស់ថ្នាក់ដឹកនាំ ក៏ដូចកងកម្លាំងនគរបាលជាតិ៕
