ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានលើកឡើងថា STEAM ជាកាតាលីករដែលអាចជំរុញកម្ពុជាឱ្យក្លាយជាប្រទេសរីកចម្រើននាពេលអនាគត ជាពិសេសតាមរយៈការអភិវឌ្ឍមូលធនមនុស្ស ដូចជាវិស្វករ និងអ្នកវិទ្យាសាស្ត្រសម្រាប់ឧស្សាហកម្មផ្សេងៗ។ ការលើកឡើងបែបនេះ បានធ្វើឡើងនៅក្នុងជំនួបសំណេះ សំណាលជាមួយក្រុមយុវជនដែលទទួលបានជ័យលាភីក្នុងការប្រកួតពានរង្វាន់វិទ្យាសាស្ត្រអាស៊ាន+៣ នៅប្រទេសកូរ៉េ កាលពីថ្ងៃទី៦ ខែមករា ឆ្នាំ២០២៥ ។
STEAM ជាបណ្តុំមុខវិជ្ជាដូចជា វិទ្យាសាស្ត្រ (Science) បច្ចេកវិទ្យា (Technology) វិស្វកម្ម (Engineering) សិល្បៈ (Art) និងគណិតវិទ្យា (Mathematic) សំខាន់សម្រាប់ការសិក្សាក្នុងបរិបទនៃការរីកចម្រើនឌីជីថលនាពេលបច្ចុប្បន្ន និងសម្រាប់ទីផ្សារការងារនាពេលអនាគត។ ឯកឧត្តម ហែម វណ្ណឌី បានបន្ថែមថា មាតាបិតាកាន់តែច្រើនបានទទួលស្គាល់ពីសារៈសំខាន់នៃការអប់រំជំនាញ STEAM និងលើកទឹកចិត្តកូនៗឱ្យសិក្សាជំនាញនេះ។
ថ្លែងទៅកាន់ក្រុមយុវជនដែលយុវជនដែលទទួលបានជ័យលាភី ហើយភាគច្រើនជាសិស្សសាលារៀនជំនាន់ថ្មី វិទ្យាល័យព្រះស៊ីសុវត្ថិ ឯកឧត្តមរដ្ឋមន្ត្រី បានបញ្ជាក់ថា “នេះជាមោទនភាពសម្រាប់ប្រទេសកម្ពុជា សម្រាប់គ្រួសារ និងប្អូនៗក្នុងនាមជាសិស្ស ហើយក៏បង្ហាញថា ជោគជ័យកើតឡើងដោយការខិតខំប្រឹងប្រែងពិតប្រាកដ មិនថាប្អូនៗរៀននៅសាលារដ្ឋ ឬសាលាឯកជនទេ។
ឯកឧត្តមក៏បានលើកទឹកចិត្តជ័យលាភី និងយុវជនទាំងអស់ឱ្យខិតខំបន្តទៀត ធ្វើជាបុគ្គលគំរូ និងជានវានុវត្តន៍ករនាពេលអនាគត ដើម្បីអភិវឌ្ឍបច្ចេកវិទ្យា និងដំណោះស្រាយថ្មីៗ ដែលអាចប្រើប្រាស់បាននៅទូទាំងពិភពលោក។
គួរបញ្ជាក់ថា ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានជ្រើសរើសគ្រូបង្រៀន២នាក់ និងសិស្ស៨នាក់ ដើម្បីចូលរួមក្នុងកម្មវិធីប្រកួតប្រជែងវិទ្យាសាស្ត្រ ASEAN+3 for the Gifted in Science លើកទី១៤ ដែលរួមមានកម្មវិធីបណ្តុះបណ្តាល សិក្ខាសាលា និងដំណើរទស្សនកិច្ចសិក្សា ក្នុងគោលបំណងលើកកម្ពស់ចំណេះដឹង និងជំនាញផ្នែកវិទ្យាសាស្ត្រ ការផ្លាស់ប្តូរវប្បធម៌ និងកិច្ចសហប្រតិបត្តិការក្នុងតំបន់៕
អត្ថបទ៖ ពុទ្ធិកា
