សម្តេចបវរធិបតី និងលោកជំទាវបណ្ឌិត ប្រកាសគ្រោងរៀបចំដំណើរកម្សាន្តជូនសិស្ស​​​នៃ​វិទ្យាល័​យ​អប់រំពិ​សេស​ភ្នំពេញថ្មី ទៅលេង​ខេត្តព្រះសីហនុ

ក្នុងឱកាសឆ្នាំថ្មីនេះ សម្តេចបវរធិបតី ហ៊ុន ម៉ាណែត នាយករដ្ឋមន្ត្រី និងលោកជំទាវបណ្ឌិត ពេជ ចន្ទមុន្នី គ្រោងរៀបចំដំណើរកម្សាន្តជូនដល់សិស្សានុសិស្សពិការភ្នែក និងគថ្លង់នៃវិទ្យាល័យអប់រំពិសេសភ្នំពេញថ្មី ទៅលេងនៅខេត្តព្រះសីហនុ នាពេលឆាប់ៗខាងមុខ ដើម្បីលើកចិត្តដល់សិស្សានុសិស្សពិការភ្នែក និងគថ្លង់។

ការប្រកាសពីគម្រោងរៀបចំដំណើរកម្សាន្តនេះ បានធ្វើឡើងជួបសំណេះសំណាល និងពិសាអាហារថ្ងៃត្រង់ ជាមួយលោកគ្រូអ្នកគ្រូ និងសិស្សានុសិស្សពិការភ្នែក និងគថ្លង់នៃវិទ្យាល័យអប់រំពិសេសភ្នំពេញថ្មី ប្រមាណ៣៥០នាក់ បានធ្វើឡើងកាលពីនៅថ្ងៃអាទិត្យ ទី៥ មករា ២០២៥ ស្ថិតនៅភូមិបាយ៉ាប សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។

ក្នុងពិធីសំណេះសំណាលនេះ សម្តេចធិបតី ហ៊ុនម៉ាណែត បានពាំនាំការសួរសុខទុក្ខ និងក្តីនឹករលឹក ពីសំណាក់សម្តេចតេជោ ហ៊ុន សែន និងសម្តចកិត្តិព្រឹទ្ធបណ្ឌិត ជូនចំពោះលោកគ្រូ អ្នកគ្រូ និងសិស្សានុសិស្ស ពិការភ្នែកនិងគថ្លង់ ដែលកំពុងសិក្សានៅវិទ្យាល័យអប់រំពិសេសភ្នំពេញថ្មី ។ កន្លងៗមកសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត តែងតែអញ្ជើញមកជួប និងជួយឧបត្ថម្ភគាំទ្រជាសម្ភារៈសិក្សា គ្រឿងឧបភោគបរិភោគ និងថវិកាជាប្រចាំ។

ក្រៅសួរសុខទុក្ខអំពីស្ថានភាពរស់នៅ និងការសិក្សារៀនសូត្រ សម្តេចបវរធិបតី ហ៊ុនម៉ាណែត ក៏ក្រើនរម្លឹកដល់សិស្សានុសិស្ស ត្រូវខិតខំប្រឹងប្រែងរៀនសូត្រ ស្ដាប់ដំបូន្មានរបស់លោកគ្រូ អ្នកគ្រូ ដើម្បីជាសិស្សល្អ កូនល្អ នៅក្នុងសង្គម។

ជាមួយគ្នានេះ លោក ម៉ៅ ផាត នាយកវិទ្យាល័យអប់រំពិសេសភ្នំពេញថ្មី បានថ្លែងអំណរគុណ ចំពោះសម្តេចបវរធិបតី ហ៊ុន ម៉ាណែត និងលោកជំទាវបណ្ឌិត ដែលតែងតែបានយកចិត្តទុកដាក់ចំពោះសុខទុក្ខ ការសិក្សារស់នៅ និងសុខភាពរបស់ដល់សិស្សានុសិស្សពិការភ្នែកនិងគថ្លង់នៃវិទ្យាល័យអប់រំពិសេសភ្នំពេញថ្មី នេះ។ ជាពិសេសកន្លងមកតែងតែចុះជួបសំណេះសំណាល ផ្ដល់ចំណីអាហារ សម្ភារសិក្សា និងការព្យាបាលជំងឺមាត់ធ្មេញ តាមរយៈក្រុមគ្រូពេទ្យ TYDA ជូនដល់សិស្សានុសិស្ស និងបុគ្គលិកនៅក្នុងវិទ្យាល័យនេះ។

គួរបញ្ជាក់ថា វិទ្យាល័យអប់រំពិសេសភ្នំពេញថ្មី បង្កើតឡើងជាដំបូងក្នុងឆ្នាំ១៩៩១ មានឈ្មោះជាអង្គការគ្រួសារថ្មី ក្នុងគោលបំណងចិញ្ចឹមបីបាច់ថែរក្សាកុមារកំព្រា និងកុមារដែលត្រូវគេបោះបង់ចោលនៅជំរំភៀសខ្លួនសាយធូ ដើម្បីធ្វើមាតុភូមិនិវត្តមកកម្ពុជាវិញ។

ក្រោយមក អង្គការគ្រួសារថ្មីក៏ត្រូវបានអភិវឌ្ឍន៍ជាបន្តបន្ទាប់ ក្លាយជាសាលាសម្រាប់ថែរក្សា និងបណ្ដុះបណ្ដាលកុមារកំព្រា ដែលមានពិការភាព រហូតដល់ថ្ងៃទី២ ខែកក្កដា ឆ្នាំ២០១៩ សាលាក៏បានប្តូរឈ្មោះមកជា «វិទ្យាល័យអប់រំពិសេសភ្នំពេញថ្មី» វិញ ដោយផ្ទេរការគ្រប់គ្រង មកនៅក្រោមក្រសួងអប់រំ យុវជន និងកីឡា៕

អត្ថបទ៖ ពុទ្ធិកា