គណៈកម្មាធិការជាតិរៀបចំបុណ្យជាតិ-អន្តរជាតិ នឹងរៀបចំប្រារព្ធពិធីមីទ្ទិញអបអរសាទរខួបអនុស្សាវរីយ៍លើកទី៤៦ នៃទិវាជ័យជម្នះ ៧មករា នៅទីធ្លាមុខសាលមហោស្រពកោះពេជ្រ ស្ថិតក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ នៅវេលាម៉ោង ០៧:៣០នាទី ថ្ងៃទី០៧ ខែមករា ស្អែកនេះ។
ដើម្បីឲ្យការប្រារព្ធអង្គមីទ្ទិញប្រព្រឹត្តទៅដោយរលូន រក្សាបាននូវសន្តិសុខ សុវត្ថិភាព សណ្តាប់ធ្នាប់ និង របៀបរៀបរយសាធារណៈ ព្រមទាំងបញ្ចៀសបាននូវការកកស្ទះចរាចរ អាជ្ញាធររាជធានីភ្នំពេញ នឹងបញ្ចៀសចរាចរ ចំពោះយានយន្តគ្រប់ប្រភេទលើកំណាត់មហាវិថីសម្តេចសុធារស ចាប់ពីស្តុបជលផល ដល់វិថីឧកញ៉ាឈុន, កំណាត់តីរវិថីព្រះស៊ីសុវត្ថិ ចាប់ពីរង្វង់មូលសម្តេចសង្ឃជួនណាត ដល់វិថីឧកញ៉ាឈុន, កំណាត់មហាវិថី ព្រះសុរាម្រឹត និងកំណាត់មហាវិថីព្រះសីហនុ ចាប់ពីវិមានឯករាជ្យ ដល់ស្តុបនាគបាញ់ទឹក។
ទន្ទឹមនឹងនេះ អាជ្ញាធរក៏ផ្អាកដំណើរការកំពង់ចម្លង ជ្រោយចង្វារ-ភ្នំពេញ និងកំពង់ចម្លងអរិយក្សត្រ-ភ្នំពេញ ជាបណ្តោះអាសន្នផងដែរ ចាប់ពីម៉ោង៥នាទីព្រឹក រហូត ដល់បញ្ចប់កម្មវិធី។
អាជ្ញាធររាជធានីភ្នំពេញ ក៏សូមក្តីយោគយល់អធ្យាស្រ័យ និងសូមឲ្យបញ្ចៀសការធ្វើដំណើរឆ្លងកាត់កំណាត់ផ្លូវ និងកំពង់ចម្លងខាងលើ តាមកាលបរិច្ឆេទ ដោយអនុគ្រោះ ផុតរយៈពេលហាមឃាត់បណ្ដោះអាសន្ននេះ អាជ្ញាធរនឹងបើកឱ្យធ្វើចរាចរជាធម្មតាវិញ៕
អត្ថបទ៖ ពុទ្ធិកា
