រាជរដ្ឋាភិបាល បានសម្រេចពង្រីកវិសាលភាពរបបសន្តិសុខសង្គមផ្នែកថែទាំសុខភាព ដើម្បីផ្តល់សេវាព្យាបាលនិងថែទាំវេជ្ជសាស្ត្រ សម្រាប់និស្សិតនគរបាលនិងសិស្សនគរបាល ដែលកំពុងសិក្សានិងហ្វឹកហាត់នៅបណ្ឌិត្យសភានគរបាលកម្ពុជា និងសាលានគរបាលជាតិភូមិភាគ ។
យោងតាមអនុក្រឹត្យចុះថ្ងៃទី២៧ ខែធ្នូ ឆ្នាំ២០២៤ រាជរដ្ឋាភិបាល បានកំណត់បែបបទ និងនីតិវិធីនៃការចុះបញ្ជី ការបង់ភាគទាន និងអត្រាភាគទានរបបសន្តិសុខសង្គមផ្នែកថែទាំសុខភាព សម្រាប់បុគ្គលជានិស្សិតនគរបាលនិងសិស្សនគរបាល ត្រូវអនុវត្តតាមបទប្បញ្ញត្តិជាធរមាន។ ហើយត្រូវបានកំណត់យកប្រាក់បៀវត្សមូលដ្ឋានស្មើឋានន្តរស័ក្តិអនុសេនីយ៍ត្រី សម្រាប់និស្សិតនគរបាល និង ប្រាក់បៀវត្សមូលដ្ឋានស្មើឋានន្តរស័ក្តិព្រឹន្ទបាលទោ សម្រាប់សិស្សនគរបាល ជាប្រាក់បៀវត្សជាប់ភាគទាន ក្នុងការគណនាភាគទានរបបសន្តិសុខសង្គមផ្នែកថែទាំសុខភាព ។
រាជរដ្ឋាភិបាល ក៏កំណត់ឲ្យបណ្ឌិត្យសភានគរបាលកម្ពុជា ត្រូវមានកាតព្វកិច្ចផ្តល់និងធ្វើបច្ចុប្បន្នភាពទិន្នន័យនិស្សិតនគរបាលនិងសិស្សនគរបាល ជូនបេឡាជាតិសន្តិសុខសង្គម (ប.ស.ស.) ជារៀងរាល់ខែ យ៉ាងយូរត្រឹមថ្ងៃទី១៥ នៃខែនីមួយៗ។ សម្រាប់របបសន្តិសុខសង្គមផ្នែកថែទាំសុខភាព សម្រាប់និស្សិតនគរបាលនិងសិស្សនគរបាល ត្រូវដាក់ឱ្យអនុវត្ត និងបង់ភាគទានចាប់ពីខែមករា ឆ្នាំ២០២៥។
អត្ថបទ៖ ពុទ្ធិកា
