លោក វ៉ាង វិនប៊ិន ឯកអគ្គរដ្ឋទូតចិនប្រចាំកម្ពុជា បានប្រកាសជូនពរឱ្យប្រទេសកម្ពុជាមានសុខសន្តិភាព ស្ថិរភាព និងវិបុលភាពជានិរន្តរ នៅចំថ្ងៃរាជរដ្ឋាភិបាលប្រារព្ធទិវាសន្តិភាពនៅកម្ពុជាទី២៦ ជាការរំលឹកដឹងគុណនៃសុខសន្តិភាព តាមរយៈនយោបាយឈ្នះឈ្នះរបស់សម្ដេចតេជោ ហ៊ុន សែន។
លោក វ៉ាង វិនប៊ិន នៅលើបណ្តាញសង្គមផ្ទាល់ខ្លួន បានសរសេរយ៉ាងដូច្នេះថា៖ អបអរសាទរ”ទិវាសន្តិភាព” នៅកម្ពុជា! សម្ដេចធិបតី ហ៊ុន ម៉ាណែត បានកំណត់យកថ្ងៃទី ២៩ ខែធ្នូ ជា “ទិវាសន្តិភាពនៅកម្ពុជា” ដើម្បីជាការអបអរសាទរដល់ការស្តារឡើងវិញនូវសុខសន្តិភាពពេញលេញរបស់ព្រះរាជាណាចក្រកម្ពុជា ដែលជាមូលដ្ឋានគ្រឹះសម្រាប់សមិទ្ធផលនានារបស់កម្ពុជាដែលទទួលបាននាថ្ងៃនេះ។
ទន្ទឹមជាមួយគ្នានេះ លោកសូមជូនពរឱ្យប្រទេសកម្ពុជាមានសុខសន្តិភាព ស្ថិរភាព និងវិបុលភាពជានិរន្តរ។
គួរឲ្យដឹងថា ចិនជាប្រទេសដ៏ធំមួយដែលតែងតែប្រកាសបង្កើនកិច្ចសហប្រតិបត្តិការជាមួយកម្ពុជាឱ្យកាន់តែខ្លាំងដើម្បីពង្រឹងសន្តិភាព និងសន្តិសុខក្នុងតំបន់។ ទន្ទឹមនឹងការពង្រឹងសន្តិភាពក្នុងតំបន់ ចិនក៏បេ្តជ្ញាប្រឆាំងសកម្មភាពជ្រៀតជ្រែកចូលកិច្ចការផ្ទៃក្នុងរបស់ប្រទេសទាំងពីរពីកម្លាំងខាងក្រៅ និងលើកកម្ពស់កិច្ចសហប្រតិបត្តិការលើគ្រប់វិស័យ ដើម្បីធ្វើឱ្យទំនាក់ទំនងរវាងកម្ពុជា-ចិនក្លាយជាទំនាក់ទំនងត្បូងពេជ្រ។
ចិនក៏ប្តេជ្ញាកៀរគរអ្នកវិនិយោគរបស់ខ្លួនឱ្យមកបន្តបោះទុនវិនិយោគបន្ថែមនៅក្នុងប្រទេសកម្ពុជា ហើយចិនក៏នឹងពង្រើកទីផ្សារនាំចូលផលិតផលកសិកម្មរបស់កម្ពុជាទៅកាន់ទីផ្សារប្រទេសចិនឱ្យទូលំទូលាយជាងមុនដែរ ខណៈចិននឹងជំរុញការកសាងច្រករបៀងអភិវឌ្ឍន៍ឧស្សាហកម្ម និងច្រករបៀងត្រី និងសូ្រវផងដែរ៕
