សៀវភៅដែលមានចំណងជើងថា «ពេជ ចន្ទមុន្នី ភរិយានាយករដ្ឋមន្រ្តីទី៣៧ នៃកម្ពុជា» ត្រូវបានចេញផ្សាយ នៅសប្តាហ៍នេះ ដើម្បីចូលរួមនៅក្នុងពិព័រណ៍សៀវភៅកម្ពុជាលើកទី១១ នាថ្ងៃទី១៩ ដល់ទី២២ ខែធ្នូ ឆ្នាំ២០២៤ នេះ។
ឯកឧត្ដមបណ្ឌិត ឆាយ សុផល រដ្ឋលេខាធិការក្រសួងព័ត៌មាន និងជាអ្នកសារព័ត៌មានជើងចាស់មួយរូប បានឲដឹងថា សៀវភៅដែលមានកម្រាស់ប្រមាណជា៤០០ទំព័រនេះ ត្រូវបានបោះពុម្ពចំនួនជាង៣ម៉ឺនច្បាប់ ដើម្បីទុកចែកជូនយុវជន ឱ្យបានយល់ដឹងពីការខិតខំប្រឹងប្រែង របស់ភរិយានាយករដ្ឋមន្ត្រីទី៣៧ នៃកម្ពុជា គឺ សម្តេចមហាបវរធិបតី ហ៊ុន ម៉ាណែត។
បើតាមការឱ្យដឹងពីឯកឧត្ដម សៀវភៅនេះបានបង្ហាញពីជីវិតពិតរបស់លោកជំទាវបណ្ឌិត ពេជ ចន្ទមុន្នី តាំងពីកុមារភាព មរហូតក្លាយជាស្រ្តីទី១ នៃកម្ពុជា។ សៀវភៅក៏បានរំលេចខ្លះៗពីជីវិតរបស់លោកឪពុក និងអ្នកម្តាយរបស់លោកជំទាវផងដែរ។
នៅក្នុងសៀវភៅបានសរសេរថា ឈ្មោះ «ពេជ ចន្ទមុន្នី» ជាឈ្មោះទី៣ ដែលលោកឪពុក និងអ្នកម្តាយបានប្រាប់អ្នកនិពន្ធថា ជាឈ្មោះអច្ឆរិយៈ ព្រោះឈ្មោះនេះ ដាក់ដោយចៃដន្យ ដែលនឹកស្មានមិនដល់។
ពេជ ចន្ទមុន្នី បានចូលរៀន និងចេះចាំតាំងពីអាយុបាន២ឆ្នាំ ហើយពូកែស្ទើរគ្រប់មុខវិជ្ជា ចាប់ពីអាយុ៦ឆ្នាំ ជាពិសេសខ្លាំងខាងគណិតវិទ្យា ដូចលោកឪពុក និងអ្នកម្តាយរបស់ខ្លួន កាលពីនៅសិក្សាដែរ។
បន្ទាប់ពីបានបញ្ចប់មធ្យមសិក្សាទុតិយភូមិ (បាក់ឌុប) ចន្ទមុន្នី បានប្រឡងជាប់លេខ១ ចូលរៀននៅសាកលវិទ្យាល័យវិទ្យាសាស្រ្តសុខាភិបាល នៅក្នុងវ័យ១៥ឆ្នាំ។ ដោយជានិស្សិតក្មេងជាងគេ ហើយប្រឡងបានចំណាត់ថ្នាក់លេខ១ នៅសាកលវិទ្យាល័យនេះ ទើបលោក និងលោកស្រី Fujimoto ជនជាតិជប៉ុន និងជាស្ថាបនិកមូលនិធិ A&H Fujimoto (A&H Fujimoto Foundation) សម្រេចផ្តល់អាហារូបករណ៍ឱ្យ ចន្ទមុន្នី ហើយលោកទាំងពីរ ក៏បានសុំ ចន្ទមុន្នី ធ្វើជាកូនចិញ្ចឹម និងបន្តផ្តល់អាហារូបករណ៍ឱ្យ ចន្ទមុន្នី សិក្សារហូតដល់បញ្ចប់ថ្នាក់បណ្ឌិត ដោយគាំទ្រឱ្យទៅរៀននៅសាលាល្អៗ នៅក្នុងពិភពលោក។
ជាងនេះទៅទៀត ដោយសារតែនិស្ស័យផង លោកនិងលោកស្រី Fujimoto ដែលជាអ្នកជំនួញដែរនោះ ក៏បានសម្រេចចិត្តផ្តល់កេរមរតក ជូនកូនចិញ្ចឹម ចន្ទមុន្នី ទុកជាទ្រព្យសម្បត្តិ នេះបើតាមការឱ្យដឹងពីអ្នកនិពន្ធ។
បើតាមការរៀបរាប់របស់អ្នកនិពន្ធ គឺលោកជំទាវបណ្ឌិត ពេជ ចន្ទមុន្នី ជាស្រ្តីទី១ដំបូងគេនៅកម្ពុជា ដែលបានបញ្ចប់ការសិក្សាថ្នាក់បណ្ឌិតនៅឯចក្រភពអង់គ្លេស និងមានជំនាញផ្នែកសុខភាពសាធារណៈ ហើយថា បើទោះបីជាប្រសូតនៅក្នុងត្រកូលបញ្ញវន្ត និងមានជីវភាពសមរម្យ ហើយក្រោយមក ក៏ក្លាយជាបញ្ញវន្តជាន់ខ្ពស់ មានឪពុកក្មេកជានាយករដ្ឋមន្រ្តី រហូតដល់ស្វាមីក្លាយជានាយរដ្ឋមន្រ្តីក៏ដោយ ក៏លោកជំទាវបណ្ឌិត នៅតែរក្សាបានចរិយាសម្បត្តិ សុភាព រាបសា រួសរាយ រាក់ទាក់ និងបន្តធ្វើការងារសង្គម និងមនុស្សធម៌ជាធម្មតា ដោយគ្មានការរើសអើង និងប្រកបដោយការទទួលខុសត្រូវ។
គួរបញ្ជាក់ថា នេះជាសៀវភៅទី២១ហើយ ដែលឯកឧត្ដមបណ្ឌិត ឆាយ សុផល បានសរសេរ និងផ្សព្វផ្សាយជាសាធារណៈ នេះមិនទាន់គិតពីសៀវភៅដែលលោកបានជួយកែសម្រួលឱ្យគេនោះទេ។
ឯកឧត្ដមបណ្ឌិត ឆាយ សុផល បានបញ្ជាក់ដែរថា សៀវភៅនេះក៏នឹងចែកជូននៅពិព័រណ៍សៀវភៅកម្ពុជាលើកទី១១ នាថ្ងៃទី១៩ ដល់ទី២២ ខែធ្នូ ឆ្នាំ២០២៤ នេះដែរ នៅឯកោះពេជ្រ និងដាក់តាមបណ្ណាល័យជាតិ និងបណ្ណាល័យ នៃសាកលវិទ្យាល័យមួយចំនួនដែរទាំងនៅរាជធានី និងខេត្ត។ សៀវភៅនេះក៏មានបំណងចូលរួមអបអរនៃខួបអាពាហ៍ពិពាហ៍របស់លោកជំទាវបណ្ឌិត និងសម្តេចធិបតី នាថ្ងៃទី៧ ខែមករា និងខួបកំណើតរបស់លោកជំទាវបណ្ឌិត នាថ្ងៃទី២២ ខែមករា ដែរ។
បើតាមការឱ្យដឹងពីលោកបណ្ឌិត គឺក្រុមការងាររបស់លោកកំពុងរៀបចំអានដោយថតជាអូឌ្យូ (សំឡេង) និងរៀបចំបកប្រែជាភាសាអង់គ្លេស ដើម្បីបោះពុម្ពផ្សាយ នាពេលឆាប់ៗនេះ សម្រាប់មិត្តអ្នកអានបរទេស៕
