ឯកឧត្តម ហួត ហាក់ សមាជិកគណៈកម្មាធិការកណ្តាល គណបក្សប្រជាជនកម្ពុជា និងជាប្រធានលេខាធិការដ្ឋាន នៃយុវជនគណបក្សថ្នាក់កណ្តាល បានអញ្ជើញជាអធិបតីក្នុងពិធីប្រគល់~ទទួលសៀវភៅ «កូនប្រុសច្បងដ៏មានឥទ្ធិពល» និងសៀវភៅ «កម្ពុជាសម័យតេជោ» នៅថ្ងៃទី២៥ ខែមេសា ឆ្នាំ២០២៤ ជូនតាមបណ្តាផ្នែកចំណុះ នៃយុវជនគណបក្សថ្នាក់កណ្តាល ក្រុមការងារយុវជនគណបក្សក្រសួង-ស្ថាប័ន រាជធានី-ខេត្ត និងក្រុមការងារចំពោះកិច្ច ទទួលការងារបដិសណ្ឋារកិច្ច នៃយុវជនគណបក្សថ្នាក់កណ្តាល សរុបចំនួន ៩១០ក្បាល ដោយមានការអញ្ជើញចូលរួមពី ឯកឧត្តម លោកជំទាវ លោក លោកស្រី ជាអនុប្រធាន សមាជិក សមាជិកា និងជំនួូយការបណ្តាផ្នែកចំណុះ នៃយុវជនគណបក្សថ្នាក់កណ្តាល ក្រុមការងារយុវជនគណបក្សក្រសួង-ស្ថាប័ន រាជធានី-ខេត្ត និងក្រុមការងារចំពោះកិច្ច ទទួលការងារបដិសណ្ឋារកិច្ច នៃយុវជនគណបក្សថ្នាក់កណ្តាលសរុបចំនួន ៧៥នាក់ នៅទីស្នាក់ការកណ្តាលគណបក្សប្រជាជនកម្ពុជា (វិមាន ៧មករា)។
សៀវភៅ «កូនប្រុសច្បងដ៏មានឥទ្ធិពល» រៀបរៀងដោយឯកឧត្តម ពៅ សុខ សមាជិកក្រុមប្រឹក្សាភិបាលសមាគមអ្នកនិពន្ធខ្មែរ។ សៀវភៅនេះមានកម្រាស់៣៩០ទំព័រ និងឧបត្ថម្ភបោះពុម្ពផ្សាយដោយសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន និយាយរៀបពីដំណើរជីវិតរបស់សម្តេចធិបតី ហ៊ុន ម៉ាណែត តាំងពីថ្ងៃចាប់កំណើត និងកុមារភាព រហូតដល់លោកចូលប្រឡូកក្នុងសមរភូមិនយោបាយ និងសង្រ្គាមបង្ខូចកិត្តិយស ដ៏ក្តៅគគុករបស់ក្រុមអ្នកប្រឆាំង។ សម្តេចធិបតី ហ៊ុន ម៉ាណែត បានយកឈ្នះលើសមរភូមិ នៃព្យុះនយោបាយ សង្រ្គាមលាបពណ៌ និងបង្ខូចកេរ្ត៍ឈ្មោះទាំងនៅតំបន់អឺរ៉ុប សហរដ្ឋអាមេរិក ហើយធ្វើបក្សប្រឆាំងក្រៅប្រទេសចុះខ្សោយ និងសាបរលាបទៀតផង។
ក្រៅពីការបង្ហាញពីចំណេះដឹង ទេពកោសល្យនៃការដឹកនាំរបស់សម្តេចធិបតី ហ៊ុន ម៉ាណែត សៀវភៅនេះក៏មានរៀបរាប់អំពីសកម្មភាពការងារដ៏មមាញឹក សឹងតែគ្មានពេលសម្រាករបស់សម្តេចធិបតី ជាពិសេសសេសសកម្មភាពដ៏លេចធ្លោរនានា។
ចំណែក សៀវភៅ «កម្ពុជាសម័យតេជោ» ក៏ត្រូវបានរៀបរៀងដោយឯកឧត្តម ពៅ សុខ ផងដែរ ដែលមានកម្រាស់ជិត ៧០០ទំព័រ។ សៀវភៅ «កម្ពុជាសម័យតេជោ» ពុំជាកម្រងឯកសារដែលឯកឧត្តមចងក្រងរៀបរាប់ពីសមិទ្ធផលដ៏ធំធេងមហាសាលនានាក្រោមម្លប់សន្តិភាពនៃសម្តេចតេជោ បិតាសន្តិភាពរបស់កម្ពុជា ដែលព្យាយាមធ្វើឱ្យមានឡើងវិញពីកម្ពុជាគ្មានអ្វីសោះ ឬអាចហៅថា កម្ពុជា នៃការកើតឡើងវិញពីគំនរផេះផង់ពីចំណុចសូន្យរហូតមានអ្វីៗគ្រប់យ៉ាង រាប់ចាប់ពីសេរីភាពនៃជំនឿសាសនា ការជ្រើសរើសគូស្រករ ការនិយាយស្តី ឬហៅថា សេរីភាពនៃការបញ្ចេញមតិ និងលទ្ធិប្រជាធិបតេយ្យដូចបណ្តាប្រទេសនានានៅលើលោកដែរ៕
អត្ថបទ៖ អក្ខរា
