កាលពីពេលថ្មីៗនេះ អាជ្ញាធរខេត្តជាប់ព្រំដែនវៀតណាម បានដុតកម្ទេចចោលជើងមាន់ខូចគុណភាព ដែលនាំចូលខុសច្បាប់ជាង ១០០តោន។ ទំនិញជើងមាន់ទាំង ៤កុងតឺន័រ មានទម្ងន់សរុប ១០២តោន,៦០០គីឡូក្រាម ត្រូវបានឈ្មួញលួចនាំចូលដោយខុសច្បាប់ពីប្រទេសវៀតណាម ហើយត្រូវបានសមត្ថកិច្ចចម្រុះបង្ក្រាបបានកាលពីថ្ងៃទី៣១ ខែមករា ឆ្នាំ២០២៤ នៅចំណុចភូមិអកនាគ សង្កាត់សង្ឃ័រ ក្រុងស្វាយរៀង។
អាជ្ញាធរពិនិត្យឃើញថា ទំនិញជើងមាន់ទាំង ៤កុងតឺន័រនេះ គ្មានឯកសារនាំចូលត្រឹមត្រូវ និងទំនិញទាំងនោះសុទ្ធសឹងតែធ្វើឱ្យប៉ះពាល់ដល់សុខភាពអ្នកប្រើប្រាស់ ពិសេសប៉ះពាល់សុខភាពប្រជាពលរដ្ឋ ដែលទិញយកពិសារប្រចាំថ្ងៃ។
មិនទាន់អស់នោះទេ, ព័ត៌មានពីព្រំដែនបាវិតដែលត្រូវបានគេចែកចាយព្រោងព្រាតពេញបណ្តាញសង្គមនៅថ្ងៃទី៨ ខែកុម្ភៈ ឆ្នាំ២០២៤នេះ បានឲ្យដឹងថា បន្ទាប់ពីសមត្ថកិច្ចនិងអាជ្ញាធរខេត្តស្វាយរៀងស្ទាក់ចាប់បានជង្គង់មាន់បង្កក៤កុងតឺន័រ ទម្ងន់ជាង១០០តោនយកទៅដុតបំផ្លាញចោលឈ្មួញទុច្ចរិតមិនបានដកថយទេ។ ផ្ទុយទៅវិញម្សិលម៉ិញឈ្មួញនាំជង្គង់មាន់បង្កកនេះឆ្លងកាត់ប៉ុស្តិ៍ត្រួតពិនិត្យខាងវៀតណាមមកនៅចំណុចសព្រំដែនកម្ពុជា-វៀតណាមបាវិតចំនួន៥កុងតឺន័រ និងនៅសល់៤កុងតឺន័រ ទៀតស្ថិតនៅក្នុងទឹកដីវៀតណាមនៅឡេីយ។
ប្រភពដដែលបានឲ្យដឹងទៀតថា ឈ្មួញកំពុងរត់ការសុំការនាំចូលជាថ្មីប៉ុន្តែរហូតមកដល់ពេលនេះមិនទាន់មានពន្លឺពីមន្ត្រីពាក់ព័ន្ធខាងកម្ពុជាថាគួរឲ្យចូលទៀតឬអត់ទេ? យ៉ាងណាមិញ អ្នកលេងបណ្តាញសង្គមសង្ឃឹមថា មន្ត្រីគយនិងសមត្ថកិច្ចពាក់ព័ន្ធនៅព្រំដែនមិនធ្វេសប្រហែសអោយកេីតមានកំហុសជាលេីកទី២នោះទេ។ ការបណ្តែតបណ្តាយឲ្យឈ្មួញទុច្ចរិតនាំចូលសត្វបង្កកគ្មានគុណភាព អាចនិយាយបានថា ជាឃាតករមួយរូប ដែលសម្លាប់ប្រជាពលរដ្ឋខ្លួនឯង។
សូមបញ្ជាក់ថា ប្រមុខរាជរដ្ឋាភិបាលកម្ពុជា សម្តចធិបតី ហ៊ុន ម៉ាណែត បានដាក់បទបញ្ជាក់ឲ្យរឹតបន្តឹងការនាំចូលទំនិញតាមច្រកព្រំដែន។ទំនិញនាំចូល ដែលសម្តេចធិបតីបានណែនាំទៅកាន់មន្ត្រីពាក់ព័ន្ធពង្រឹងឲ្យបានម៉ត់ចត់លើការនាំចូលនូវចំណីអាហារ ដែលខូចគុណភាពប៉ះពាល់ដល់សុខភាព និងត្រូវកំណត់ទ្វារព្រំដែនកំណត់ច្រកទ្វារព្រំដែនដែលអនុញ្ញាតឲ្យមានការនាំចូលសាច់ជ្រូកបង្កក មាន់ ស៊ុត និងត្រី ដើម្បីបង្កភាពងាយស្រួលក្នុងការគ្រប់គ្រង និងទប់ស្កាត់ការនាំចូលខុសច្បាប់ក្នុងរូបភាពផ្សេងៗ។
លើសពីនេះ សម្តេចធិបតី ហ៊ុន ម៉ាណែត ក៏បានណែនាំឱ្យធ្វើវិសោធនកម្មអនុក្រឹត្យ ស្ដីពីការដាក់ឲ្យប្រើប្រាស់បញ្ជីទំនិញហាមឃាត់ និងទំនិញជាប់កម្រិតកំណត់។ ការណែនាំរបស់ប្រមុខរាជរដ្ឋាភិបាល បានធ្វើឡើងនៅក្នុងវេទិការាជរដ្ឋាភិបាលនិងផ្នែកឯកជន លើកទី១៩ នៅថ្ងៃទី១៣ ខែវិច្ឆិកា ឆ្នាំ២០២៣៕
អត្ថបទ៖អក្ខរា
