ក្រសួងវប្បធម៌ និងវិចិត្រសិល្បៈ នៅថ្ងៃទី៣១ ខែតុលា ឆ្នាំ២០២៣នេះ អបអរសាទរទីក្រុងបាត់ដំបងដែលត្រូវបានអង្គការយូណេស្កូចុះក្នុង «បណ្តាញទីក្រុងច្នៃប្រតិដ្ឋ» (UNESCO Creative Cities Network ឬហៅកាត់ថា UCCN) ផ្នែកម្ហូបអាហារ (Gastronomy)។
ទីក្រុងបាត់ដំបង ត្រូវបានរាជរដ្ឋាភិបាលកម្ពុជាដាក់បេក្ខភាព ចូលជាសមាជិកបណ្តាញទីក្រុងដែលមានភាពច្នៃប្រឌិតរបស់អង្គការយូណេស្កូ (UNESCO Creative Cities Network) «ក្នុងប្រភេទទីក្រុងដែលមានភាពច្នៃប្រឌិតលើផ្នែកម្ហូបអាហារ» កាលពីឆ្នាំ២០២១។
ការចូលជាសមាជិកបណ្តាញនេះ នឹងអនុញ្ញាតឲ្យកម្ពុជាមានសិទ្ធិប្រើប្រាស់និម្មិតសញ្ញា (Logo) របស់បណ្តាញ ដើម្បីធ្វើការផ្សព្វផ្សាយសក្តានុពល និងភាពពិសេសៗរបស់ទីក្រុងខ្លួនទៅកាន់ទីក្រុងនានាជាសមាជិកបណ្តាញ និងក្នុងក្របខណ្ឌរបស់អង្គការយូណេស្កូ ក្នុងការលើកស្ទួយនូវវប្បធម៌ សក្តានុពលទេសចរណ៍ទីក្រុង និងមុខមាត់របស់ទីក្រុងជ័យលាភី ក៏ដូចជាប្រទេសជាតិទាំងមូល ពិសេសការតម្រង់ឆ្ពោះទៅរកការផ្សព្វផ្សាយទេសចរណ៍ម្ហូបអាហារ (Gastronomy Tourism) ដែលជានិន្នាការថ្មីរបស់ពិភពលោក ហើយដែលកម្ពុជា ពិសេសទីក្រុងបាត់ដំបងតែម្តង មានសក្តានុពលសម្បូរបែប។
សេចក្តីប្រកាសរបស់យូណេស្កូ បានឲ្យដឹងថា នៅថ្ងៃទិវាទីក្រុងពិភពលោក ទីក្រុងចំនួន ៥៥ ចូលរួមជាមួយបណ្តាញទីក្រុងច្នៃប្រឌិតរបស់អង្គការយូណេស្កូ (UCCN) បន្ទាប់ពីការចាត់តាំងរបស់ពួកគេដោយអគ្គនាយកអង្គការយូណេស្កូ អ្នកស្រី Audrey Azoulay ។
អ្នកស្រី Audrey Azoulay អគ្គនាយកអង្គការយូណេស្កូមានប្រសាសន៍ថា “ទីក្រុងនៅក្នុងបណ្តាញទីក្រុងច្នៃប្រឌិតរបស់យើងកំពុងឈានមុខគេនៅពេលនិយាយអំពីការបង្កើនលទ្ធភាពទទួលបានវប្បធម៌ និងការពង្រឹងថាមពលនៃភាពច្នៃប្រឌិតសម្រាប់ភាពធន់ និងការអភិវឌ្ឍន៍ទីក្រុង”។
បណ្តាញទីក្រុងច្នៃប្រឌិតដែលបានជ្រើសរើសថ្មីទាំង៥៥នោះ ត្រូវបានអញ្ជើញឱ្យចូលរួមក្នុងសន្និសីទប្រចាំឆ្នាំ២០២៤ UCCN (១-៥ កក្កដា ២០២៤) នៅទីក្រុង Braga ប្រទេសព័រទុយហ្គាល់។
បើតាមយូណេស្កូ, ទីក្រុងថ្មីត្រូវបានទទួលស្គាល់ចំពោះការប្តេជ្ញាចិត្តយ៉ាងមុតមាំរបស់ពួកគេក្នុងការទាញយកវប្បធម៌ និងភាពច្នៃប្រឌិតជាផ្នែកនៃយុទ្ធសាស្ត្រអភិវឌ្ឍន៍របស់ពួកគេ និងការបង្ហាញការអនុវត្តប្រកបដោយភាពច្នៃប្រឌិតក្នុងការរៀបចំផែនការទីក្រុងដែលផ្តោតលើមនុស្ស។ ទីក្រុងទាំងនោះតំណាងឱ្យវិស័យច្នៃប្រឌិតចំនួន ៧៖ សិប្បកម្ម និងសិល្បៈប្រជាប្រិយ ការរចនា ភាពយន្ត ម្ហូបអាហារ អក្សរសាស្ត្រ សិល្បៈប្រព័ន្ធផ្សព្វផ្សាយ និងតន្ត្រី។
គួរបញ្ជាក់ថា បណ្តាញទីក្រុងដែលមានភាពច្នៃប្រឌិតរបស់អង្គការយូណេស្កូ ត្រូវបានបង្កើតឡើងក្នុងឆ្នាំ២០០៤ ក្នុងគោលបំណងលើកកម្ពស់កិច្ចសហប្រតិបត្តិការ ក្នុងចំណោមទីក្រុងមានភាពច្នៃប្រឌិតលើសមាសភាពសំខាន់ៗមួយចំនួន ដែលជាកត្តាគន្លឹះសម្រាប់ការអភិវឌ្ឍទីក្រុងប្រកបដោយចីរភាព៕
អត្ថបទ៖ អក្ខរា
