ឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្រ្ដីការបរទេស និងសហប្រតិបត្តិការអន្តរជាតិ បានលើកឡើងថា អង្គការក្រៅរដ្ឋាភិបាលបរទេសទាំងអស់គួរតែរក្សាភាពអព្យាក្រឹត និងជៀសវាងពីសកម្មភាពដែលផ្ទុយនឹងបទប្បញ្ញត្តិរបស់ LANGO ផងដែរ។ ឯកឧត្តមបានលើកឡើងបែបនេះ ក្នុងពិធីបើកនៃកិច្ចប្រជុំពិគ្រោះយោបល់លើកទី៣ រវាងរាជរដ្ឋាភិបាលកម្ពុជា និងអង្គការមិនមែនរដ្ឋាភិបាលបរទេស ក្រោមប្រធានបទ «ការពង្រឹងការអនុវត្តច្បាប់ស្តីពីគណនេយ្យ និងសវនកម្ម» ដោយមានអ្នកចូលរួមសរុបប្រមាណ ៣០០នាក់ មកពីក្រសួងការបរទេស និងសហប្រតិបត្តិការអន្តរជាតិ ក្រសួងស្ថាប័នពាក់ព័ន្ធ ព្រមទាំងតំណាងអង្គការមិនមែនរដ្ឋាភិបាលបរទេស នៅព្រឹកថ្ងៃទី៣ ខែឧសភា ឆ្នាំ២០២៣ នៅទីស្ដីការក្រសួង។
ឯកឧត្តម ប្រាក់ សុខុន បានមានប្រសាសន៍ថា រាជរដ្ឋាភិបាលកម្ពុជាយកចិត្តទុកដាក់យ៉ាងខ្លាំងក្នុងការរក្សាការសន្ទនាជាទៀងទាត់ជាមួយអង្គការក្រៅរដ្ឋាភិបាលបរទេសទាំងអស់ដែលកំពុងប្រតិបត្តិការនៅក្នុងប្រទេសកម្ពុជា។ ការចូលរួមចំណែករបស់អ្នកក្នុងការអភិវឌ្ឍន៍សេដ្ឋកិច្ចសង្គមរបស់ប្រទេសយើង និងសុខុមាលភាពរបស់ប្រជាជនកម្ពុជា ពិតជាសមនឹងទទួលបានការសរសើរ។
ប្រមុខការទូតកម្ពុជាបន្តថា៖ «ជាការពិតណាស់ យើងចាត់ទុកអ្នកទាំងអស់គ្នាថាជាដៃគូអភិវឌ្ឍន៍ដ៏សំខាន់ ហើយ វាជាផលប្រយោជន៍របស់យើងក្នុងការបន្តពង្រឹងភាពជាដៃគូនេះ យ៉ាងពិតប្រាកដនៅក្នុងក្របខ័ណ្ឌនៃច្បាប់ និងបទប្បញ្ញត្តិជាតិរបស់យើង ដោយចាប់ផ្តើមជាពិសេសជាមួយនឹងច្បាប់ស្តីពីសមាគម និងមិនមែនអង្គការរដ្ឋាភិបាល ដែលត្រូវបានគេស្គាល់ថាជា LANGO»។ ឯកឧត្តម ប្រាក់ សុខុន ក៏បានស្នើដល់អង្គការក្រៅរដ្ឋាភិបាលបរទេសទាំងអស់ត្រូវបន្តកិច្ចសហប្រតិបត្តិការជាមួយរដ្ឋបាលថ្នាក់ជាតិ និងថ្នាក់ក្រោមជាតិ ដើម្បីធានាថាគម្រោង និងសកម្មភាពរៀងៗខ្លួនត្រូវបានអនុវត្តយ៉ាងត្រឹមត្រូវស្របតាមច្បាប់ និងបទប្បញ្ញត្តិរបស់កម្ពុជា៕
អត្ថបទ៖ អក្ខរា
