សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា គ្រោងស្នើតែងតាំងលោក សួង សោភ័ណ្ឌ ជារដ្ឋលេខាធិការនៃទីស្ដីការគណៈរដ្ឋមន្ត្រី ក្រោយពីប្រធានគណបក្សខ្មែរឈ្នះរូបនេះ បានប្រកាសចូលរួមជីវភាពនយោបាយជាមួយនឹងគណបក្សប្រជាជនកម្ពុជា។
នៅលើ Channel Telegram សម្ដេចតេជោ ហ៊ុន សែន បានសរសេរថា ៖ “ក្នុងនាមគណបក្សប្រជាជនកម្ពុជាខ្ញុំសូមស្វាគមន៍យ៉ាងកក់ក្តៅចំពោះលោក សួង សោភ័ណ្ឌ ដែលពេញចិត្តសុំមករួមជីវភាពនយោបាយជាមួយគណបក្សប្រជាជនកម្ពុជា។ ក្នុងនាមរាជរដ្ឋាភិបាលខ្ញុំ នឹងស្នើសុំព្រះមហាក្សត្រចេញព្រះរាជក្រិត្យតែងតាំងលោក សួង សោភណ័ ជារដ្ឋលេខាធិការទីស្តីការគណៈរដ្ឋមន្ត្រី ។ សូមជូនពរលោកសួង សោភ័ណ្ឌជួបតែសេចក្តីសុខសេចក្តីចម្រើន។“
នៅក្នុងវីដេអូក្លីបរយៈពេលជាង៣នាទីដែលសុំចូលរួមជីវភាពនយោបាយជាមួយនឹងគណបក្សប្រជាជនកម្ពុជា លោក សួង សោភណ័្ឌ បានបញ្ជាក់ថា លោកបានសម្រេចចិត្តយ៉ាងច្បាស់លាស់ស្នើសុំចូលរួមជីវភាពនយោបាយជាមួយគណបក្សប្រជា ជនកម្ពុជា និងចូលរួមជាមួយរដ្ឋាភិបាលបច្ចុប្បន្នដើម្បីបម្រើជាតិមាតុភូមិពិតប្រាកដ ដោយកន្លងមក ជំហរប្រឆាំងរបស់ លោក គឺហាក់បីដូចជា ធ្វើការងារបានផលតិចតួចណាស់ សម្រាប់ជាតិមាតុភូមិ។
លោក សួង សោភណ័្ឌ បញ្ជាក់ថា ៖”… ដោយកន្លងមក ខ្ញុំក្នុងនាមជាមនុស្សម្នាក់មានជំហរប្រឆាំង ហាក់បីដូចជាគិតថា ធ្វើការងារបានផលតិចតួចជូនជាតិមាតុភូមិ ទើបតែមកដល់ពេលនេះ ខ្ញុំបានសម្រេចចិត្តយ៉ាងច្បាស់លាស់ចូលរួមជាមួយរាជរដ្ឋាភិបាល ដោយចង់យកសមត្ថភាព មកជួយ មកចូលរួម មកបម្រើប្រជាពលរដ្ឋផ្ទាល់។ ហើយសង្ឃឹមយ៉ាងមុតមាំ ប្រជាពលរដ្ឋ យល់ពីឧត្តមគតិរបស់ខ្ញុំ …។ “
ជាមួយគ្នានេះ លោក សួង សោភណ័្ឌ ក៏ថ្លែងអំណរគុណយ៉ាងជ្រាលជ្រៅដល់ថ្នាក់ដឹកនាំគណបក្សប្រជាជនកម្ពុជា ដែល បើកភ្លើងខៀវដល់រូបលោក និងប្តេជ្ញាបំពេញការងារយ៉ាងច្បាស់លាស់ បម្រើជាតិមាតុភូមិយ៉ាងពិតប្រាកដ។
អត្ថបទ៖ សីហា
