ចរន្តផ្តាច់ខ្លួនពីបក្សប្រឆាំង និងសុំរួមរស់ជាមួយបក្សកាន់អំណាច កាន់តែច្រើនឡើងៗ

នៅដើមសប្តាហ៍នេះ ចរន្តផ្តាច់ខ្លួនពីបក្សប្រឆាំង និងសុំរួមរស់ជាមួយគណបក្សប្រជាជនកម្ពុជា បន្តកាន់តែច្រើនឡើងៗ។ មិនតែប៉ុណ្ណោះ ក្រៅពីការសុំចុះចូលជាមួយគណបក្សកាន់អំណាច សមាជិកបក្សប្រឆាំងទាំងនោះ ក៏បានប្រកាសថ្កោលទោសលោក សម រង្ស៊ី ដែលតែងធ្វើនោយបាយទុច្ចរិតដដែលៗប្រឆាំងប្រយោជន៍ និងការអភិវឌ្ឍរបស់កម្ពុជា។

នៅថ្ងៃទីចន្ទទី៨ ខែកក្កដានេះ សមាជិកប្រតិបត្តិ និងជាបេក្ខជនក្រុមប្រឹក្សាស្រុកបាភ្នំ ខេត្តព្រៃវែង មកពីគណបក្សឆន្ទៈខ្មែរ ២រូប បានប្រកាសផ្តាច់ខ្លួន និងគោរពស្នើសុំសម្តេចតេជោ ចូលរួមជីវភាពនយោបាយជាមួយ
គណបក្សប្រជាជនកម្ពុជា។ ក្នុងនោះ ពួកគេបានប្រកាសថ្កោលទោសទណ្ឌិតសម រង្ស៊ី ដែលតែងប្រឆាំងផលប្រយោជន៍ជាតិ ជាពិសេសប្រឆាំងនឹងគម្រោងព្រែកជីកហ្វូណនតេជោ។

នៅថ្ងៃដដែលបេក្ខជនក្រុមប្រឹក្សាសង្កាត់ព្រែកឯង​ខណ្ឌច្បារអំពៅចំនួន​១០​ រូប​និងបេក្ខជនក្រុមប្រឹក្សាសង្កាត់ព្រែកព្នៅចំនួន​០៥​ រូប​ មកពីគណបក្សភ្លេីងទៀន​បានសម្រេចចិត្តផ្ដាច់ខ្លួនពីបក្សប្រឆាំង​និងគោរពសម្តេចតេជោចូលរួមជីវភាពនយោបាយជាមួយគណបក្សប្រជាជន។

ដោយឡែក នៅខេត្តកណ្តាលវិញ សមាជិកក្រុមការងារគណបក្សភ្លើងទៀនខេត្តកណ្ដាល ១រូប, សមាជិកក្រុមការងារគណបក្សកម្លាំងជាតិ ១រូប, បេក្ខជនក្រុមប្រឹក្សាសង្កាត់ស្វាយរលំ ២រូបទៀត មកពីគណបក្សភ្លើងទៀន បាន​ប្រកាសផ្តាច់ខ្លួនពីបក្សប្រឆាំង និងគោរពស្នើ សម្តេចតេជោ សុំចូលរួមជីវភាពនយោបាយជាមួយ គណបក្សប្រជា​ជនកម្ពុជា។ ស្របពេលនេះដែរ ពួកគេបានថ្កោលទោសទណ្ឌិត សម រង្ស៊ី ដែលតែងមានគំនិតទុច្ចរិតប្រឆាំង​ផលប្រយោជន៍ជាតិ និងថ្មីៗនេះទទឹងទិសប្រឆាំងនឹងគម្រោងព្រែកជីកហ្វូណនតេជោ។

នៅថ្ងៃទី៩ ខែកក្កដានេះ នៅខេត្តកណ្ដាល មានបេក្ខជនក្រុមប្រឹក្សាសង្កាត់រកាខ្ពស់ ៨រូប មកពីគណបក្សឆន្ទៈខ្មែរ, បេក្ខជនក្រុមប្រឹក្សាសង្កាត់រកាខ្ពស់ ២រូប មកពីគណបក្សភ្លើងទៀន, សមាជិកគណៈកម្មាធិការគណបក្សភ្លើងទៀន
សង្កាត់ដើមមៀន ក្រុងតាខ្មៅ ខេត្តកណ្ដាល ចំនួន ៤រូបទៀត និងបេក្ខជនក្រុមប្រឹក្សាសង្កាត់ចំនួន​៤​ សង្កាត់ជ្រោយចង្វារ សង្កាត់កោះដាច់ សង្កាត់ព្រែកតាសេក និងសង្កាត់បាក់ខែង​សរុបចំនួន​០៩រូប មកពីគណបក្សភ្លេីងទៀន​ ក៏បានសម្រេចចិត្តផ្ដាច់ខ្លួនពីបក្សប្រឆាំង​និងគោរពសម្តេចតេជោចូលរួមជីវភាពនយោបាយជាមួយគណបក្សប្រជាជន។

ចរន្តផ្តាច់ខ្លួនពីបក្សប្រឆាំង និងសុំរួមរស់ជាមួយបក្សកាន់អំណាច កាន់តែច្រើនឡើងៗទាំងនេះ ត្រូវបានបង្ហាញឱ្យដឹងពីសម្តេចតេជោ ហ៊ុន សែន ប្រធានគណបក្សប្រជាជនកម្ពុជា នៅលើឆានែលតេឡេក្រាមផ្លូវការរបស់សម្តេច។

ទន្ទឹមគ្នានឹងចលនាផ្តាច់ខ្លួនពីមន្ត្រីជាន់ខ្ពស់ និងសមាជិកបក្សប្រឆាំងកំពុងពុះកញ្ជ្រោលទាំងក្នុងស្រុក និងក្រៅស្រុក សម្តេចតេជោ ហ៊ុន សែន ប្រធានគណបក្សប្រជាជនកម្ពុជា សង្ឃឹមថា ក្រុមប្រឆាំងនឹងបន្តផ្តាច់ខ្លួនចេញពីមេដឹកនាំក្រុមជ្រុលនិយមមកចូលរួមកសាងប្រទេសជាមួយរាជរដ្ឋាភិបាល៕

អត្ថបទ៖ អក្ខរា