កាលពីពេលថ្មីៗនេះ នាយករដ្ឋមន្ត្រីចាំផ្ទះថៃបានប្រកាសពីការរៀបចំកិច្ចប្រជុំរដ្ឋមន្ត្រីការបរទេសអាស៊ាន ជុំវិញបញ្ហារបបយោធាកាន់អំណាចរបស់ប្រទេសមីយ៉ាន់ម៉ា នៅឯកិច្ចចរចាសន្តិភាពក្នុងតំបន់ក្រៅផ្លូវការ។ នេះបើតាមការចុះផ្សាយពី Reuters។
យ៉ាងណា សមាជិកអាស៊ានសំខាន់ៗជាច្រើនបានបដិសេធមិនចូលរួមកិច្ចប្រជុំមួយនេះ និងទទួលបានការរិះគន់ជាខ្លាំង ខណៈគិតមកទល់ពេលមានមានតែប្រទេសកម្ពុជាមួយប៉ុណ្ណោះ ដែលប្រកាសជាផ្លូវការថា នឹងចូលរួមកិច្ចប្រជុំរៀបចំដោយថៃ។
ដោយឡែក ក្រសួងការបរទេសថៃបានបិទព័ត៌មានយ៉ាងជិត ដោយមិនបង្ហាញថា ប្រទេសណាខ្លះ នឹងចូលរួមកិច្ចប្រជុំរយៈពេល ២ថ្ងៃ រៀបចំនៅទីក្រុង Pattaya ដោយគេគ្រាន់តែដឹងថា រដ្ឋមន្ត្រីការបរទេស Don Pramudwinai បានផ្ញើរលិខិតអញ្ជើញរយៈពេល ៤ ថ្ងៃមុនប៉ុណ្ណោះ មុនកិច្ចប្រជុំមួយនេះកំណត់ធ្វើឡើង។
យ៉ាងណា Reuters បានរាយការណ៍ថា មានប្រទេសសមាជិកជាច្រើនដែលខកខានកិច្ចប្រជុំមួយនេះដូចជា ឥណ្ឌូណេស៊ី និងសិង្ហបុរីបដិសេធមិនចូលរួម ខណៈវៀតណាម ម៉ាឡេស៊ី និងហ្វីលីពីនក៏មិនបានបង្ហាញវត្តមាន ក្រោមហេតុផលមានភារកិច្ចសំខាន់រៀងខ្លួន៕
