ច្បាប់ប្រើប្រាស់អាវុធថ្មីនៅមីយ៉ាន់ម៉ា អនុញ្ញាតិឲ្យជនស៊ីវិលអាចប្រើប្រាស់អាវុធបានដោយសេរី ដែលវានឹងធ្វើឲ្យស្ថានការណ៍នៅប្រទេសមួយនេះ ផុងកាន់តែជ្រៅក្នុងវិបត្តិសង្គ្រាមស៊ីវិល។ នេះបើតាមព័ត៌មានផ្ដល់ឲ្យដោយអ្នកសង្កេតការ។
ដោយឡែក CNA ក៏បានរាយការណ៍ដែរថា ប្រទេសមួយនេះបានធ្លាក់ចូលភ្នក់ភ្លើងសង្គ្រាម បន្ទាប់ពីយោធាធ្វើរដ្ឋប្រហារ កាន់កាប់អំណាចកាលពីជាង ២ឆ្នាំមុន ខណៈសកម្មភាពថ្មីនេះទៀតសោត នឹងធ្វើឲ្យមានការបង្ហូរឈាមកាន់តែខ្លាំង បើទោះជាកន្លងមកធ្លាប់មានការជួយអន្តរាគមន៍ជាច្រើនក៏ដោយ។
ការផ្លាស់ប្តូរថ្មីបំផុតចំពោះច្បាប់កាំភ្លើងកាលពីខែមុន បានកើតឡើងនៅពេលដែលកងទ័ពប្រឈមមុខ នឹងសម្ពាធកាន់តែខ្លាំង ដើម្បីកម្ចាត់ក្រុមប្រឆាំងនៅក្នុងសមរភូមិជាច្រើន ស្របពេលក្រុមអ្នកសង្កេតការណ៍បាននិយាយថា ចំណាត់ការនេះគឺ មានបំណងបង្កើនអំណាចនៃអ្នកគាំទ្ររបបយោធា ដែលខ្លាចត្រូវបានវាយប្រហារ។
“ច្បាប់កាំភ្លើងថ្មីទាំងនេះហាក់ដូចជា កិច្ចខិតខំប្រឹងប្រែងដើម្បីបង្កើតយន្តការផ្លូវច្បាប់មួយ សម្រាប់ផ្តល់អាវុធដល់ប្រជាជនដែលគាំទ្ររបបយោធា ដើម្បីការពារតំបន់ដែលពួកគេបានយកមកវិញពី PDF (កងកម្លាំងការពារប្រជាជន) ឬកងកម្លាំងការពារក្នុងស្រុក”។ នេះបើតាមសម្ដីរបស់លោក Aaron Connelly អ្នកជំនាញជាន់ខ្ពស់ផ្នែកនយោបាយអាស៊ីអាគ្នេយ៍ និងគោលនយោបាយការបរទេសនៃវិទ្យាស្ថានអន្តរជាតិសម្រាប់ការសិក្សាយុទ្ធសាស្ត្រ។
ប៉ុន្តែសម្រាប់ប្រជាពលរដ្ឋវិញ ច្បាប់ថ្មីនេះគឺកាន់តែបន្ថែមភាពភ័យខ្លាចដល់ពួកគាត់មួយកម្រិតទៀត ដែលធ្វើឲ្យពួកគាត់មានអារម្មណ៍ថា មិនមានសុវត្ថិភាព សូម្បីតែនៅពេលធ្វើការងារប្រចាំថ្ងៃដូចជាការទៅផ្សារជាដើម។
សូមជម្រាបដែរថា កន្លងមកមានករណីធ្វើឃាត និងវាយប្រហារទៅលើអ្នកគាំទ្ររបបយោធា តាំងពីចែងច្បាប់អាវុធថ្មីនេះម៉្លេះ ហើយក្រោយអនុម័តច្បាប់ថ្មី ករណីឃាតកម្ម អាចនឹងកាន់តែកើតមានច្រើនថែមទៀត៕
