រដ្ឋមន្ត្រីក្រសួងការពារជាតិអ៊ុយក្រែន Oleksii Reznikov ចង់ឲ្យអាល្លឺម៉ង់ និងអង់គ្លេសប្រញាប់បញ្ជូនយន្តហោះចំបាំង Eurofighter Typhoon ដើម្បីប្រយុទ្ធតបតជាមួយការវាយប្រហារតាមដែនអាកាសពីរុស្ស៊ី។ នេះបើតាមការចុះផ្សាយពី CNA។
“បើសិនជាអង់គ្លេស និងអាល្លឺម៉ង់ អាចផ្គត់ផ្គង់រួមគ្នានូវយន្តហោះចំបាំង Eurofighter របស់ពួកគេ នោះនឹងក្លាយជាជំហានដ៏សំខាន់មួយសម្រាប់ពួកយើង”។ នេះបើតាមការឲ្យដឹងពីលោក Oleksii។
គួររំលឹកដែរថា អ៊ុយក្រែនធ្លាប់ទទួលបានការសន្យាពីសម្ព័ន្ធមិត្តលោកខាងលិច ក្នុងការទទួលបានជំនួយយន្តហោះចំបាំង F-16 ដែលសាងសង់ឡើងដោយសហរដ្ឋអាមេរិក ប៉ុន្តែអាល្លឺម៉ង់ និងអង់គ្លេស ធ្លាប់បានប្រកែកមិនបញ្ជូនយន្តហោះចំបាំងដល់អ៊ុយក្រែនឡើយ ក្រោមហេតុផលថា ពួកគេគ្មានយន្តហោះម៉ូដែល F-16 ដែលអ៊ុយក្រែនចង់បានទេ។
ដោយឡែក សម្រាប់យន្តហោះ Eurofighter Typhoon វិញ ពួកគេត្រូវបង្វឹកអ្នកបើកបរ និងក្រុមជំនួយការផ្សេងៗ ទើបអាចបញ្ជូនយន្តហោះចំបាំងនេះដល់អ៊ុយក្រែនបាន មិនមែនចេះតែបញ្ជូនទៅភ្លាមៗឡើយ៕
