កញ្ញា អូ ដាវី ក៏ជាបេក្ខភាព Miss Grand Cambodia 2023 លេចធ្លោមួយរូបផងដែរក្នុងចំណោមបេក្ខភាពទាំង ២៥ រូបដែលតំណាងឱ្យខេត្តក្រុងនានា តែអ្វីដែលកាន់តែគួរឱ្យចាប់អារម្មណ៍នោះ គឺកៀកថ្ងៃប្រកួតវគ្គសំខាន់ៗមកដល់ ស្រាប់តែកញ្ញា អូ ដាវី បង្ហាញពីផ្ទះថ្មីមួយខ្នងដែលទើបតែសាងសង់រួចរាល់ ដែលកើតឡើងពីការខំប្រឹងតស៊ូរបស់នាងជាច្រើនឆ្នាំក្នុងវិស័យសិល្បៈ ។
កញ្ញា អូ ដាវី បានបង្ហោះរូបភាពឈរនៅមុខផ្ទះថ្មីរបស់ខ្លួនអមដោយសារមួយចំនួនថា « បង្កើតក្តីសុបិនអោយខ្លួនឯងដោយហត្ថាទាំងទ្វេ និងញើសឈាមខ្លួនឯង នេះគឺជាខ្ញុំ ។ ស្វាគមន៍សមាជិកថ្មីកូនស្រីធំពេញចិត្តនូវអ្វីដែលខ្ញុំមាន រស់ដោយមិនបំពានអ្នកដទៃទើបជីវិតមានក្តីសុខពិតប្រាកដ ! » ។ ទាំងមិត្តសិល្បៈ និង អ្នកគាំទ្រជាច្រើន ពេលឃើញ អូ ដាវី បង្ហោះបែបនេះ ម្នាក់ៗបានសម្តែងការអបអរ និងជូនពរនាងហេងហេងគ្រប់ៗគ្នា ។
អូ ដាវី នៅពុំទាន់រើសពេលវេលាល្អដើម្បីរៀបចំពិធីឡើងផ្ទះថ្មីរបស់ខ្លួននៅឡើយទេ ដោយសារតែពេលនេះនាងកំពុងមមាញឹក និងត្រៀមខ្លួនដើម្បីប្រកួតក្នុងកម្មវិធី Miss Grand Cambodia 2023 ។
កញ្ញា អូ ដាវី មិនត្រឹមតែជាបេក្ខភាព Miss Grand Cambodia 2023 ដ៏លេចធ្លោប៉ុណ្ណោះទេ នាងក៏ជាតារាសម្តែង និងបង្ហាញម៉ូដល្បីឈ្មោះមួយរូបផងដែរ ដែលបានលេចមុខក្នុងរឿងភាគជាច្រើន ។ ឆ្លងកាត់ការតស៊ូក្នុងវិស័យសិល្បៈអស់ពេលជាច្រើន អូ ដាវី មិនដែលចុះចាញ់ក្នុងជីវិតឡើយ នាងបានតស៊ូតយ៉ាងលំបាក តាំងពីសម្តែងតួអង្គតូចតាច រហូតដល់ក្លាយជាតួលេចធ្លោ និងមានតម្លៃខ្លួនខ្ពស់គួរសម ។
ពេលនេះជីវភាព អូ ដាវី កាន់តែល្អប្រសើរច្រើន នាងមិនត្រឹមតែមានផ្ទះធំផ្ទាល់ខ្លួនប៉ុណ្ណោះទេនាង ថែមទាំងត្រៀមបើកអាជីវកម្មមួយចំនួនផងដែរ ។
គួររំលឹកផងដែរថា ដោយសារតែអាជីពសម្តែងទើបធ្វើឱ្យ អូ ដាវី មានមុខមាត់ខ្លួនក្នុងវិស័យសិល្បៈ ហើយចុងក្រោយនេះ នាងបានដាក់ពាក្យចូលរួមប្រកួតប្រជែងក្នុងវិស័យបវរកញ្ញា ដើម្បីបង្កើនប្រជា ប្រិយភាពផង និងដើម្បីបំពេញក្តីស្រមៃរបស់ខ្លួនផង ។ មិនថាការប្រកួតនេះជោគជ័យ ឬ បរាជ័យ នាងទទួលយកទាំងក្តីរីករាយ ៕
