ច្រើនឆ្នាំមកហើយដែលតារាសម្តែង ចម្រៀង ប៊េប៊ី បានបាត់មុខពីសិល្បៈ ដើម្បីងាកទៅពង្រឹងអាជីពលក់កាហ្វេវិញ ដោយឡែកថ្មីៗនេះស្រាប់តែតារាស្រីរូបនេះបានទៅហាងកែសម្ផស្សដើម្បីកែខ្ទង់ច្រមុះថ្មី បន្ទាប់ពីច្រមុះចាស់របស់ខ្លួនមានបញ្ហា ។
ឆ្នាំ ២០២៣នេះមានសិល្បករសិល្បការិនីជាច្រើន បាននាំគ្នាទៅកែខ្ទង់ច្រមុះថ្មីបន្ទាប់ពីច្រមុះពួកគេជួបបញ្ហា ដូចជាតារាចម្រៀង ទេព បូព្រឹក្ស , តារាសម្តែង នី មុន្នីនាថ និងតារាបង្ហាញម៉ូដជាដើម…។ ចំណែក តារាសម្តែង ប៊េប៊ី ក៏មិនខុសពីតារាផ្សេងៗទៀតដែរ កន្លងមកនាងធ្លាប់ឆ្លងកាត់ការវះកាត់កែច្រមុះច្រើនលើកមកហើយ តាំងពីនាងប្រលូកក្នុងវិស័យសិល្បៈដំបូង ។ សម្រាប់ឆ្នាំ ២០២៣ នេះវិញ ប៊េប៊ី ក៏បានសម្រេចចិត្តវះកាត់កែខ្ទង់ច្រមុះថ្មី ដើម្បីបន្ថែមសម្រស់ថ្មីឱ្យសមតាមសម័យបច្ចេកទេសថ្មី ផងដែរ ដោយសារតែច្រមុះចាស់របស់នាងមានបញ្ហា ។
ប៊េប៊ី បាននិយាយដោយមិនលាក់បាំងថា នាងពិតជាបានទៅកែខ្ទង់ច្រមុះថ្មីយ៉ាងពិតប្រាកដមែន ច្រមុះថ្មីនេះកាន់តែធ្វើឱ្យនាងមានទំនុកចិត្តជាងច្រមុះចាស់ ដូចដឹងស្រាប់ហើយថា សម័យបច្ចេកទេសថ្មី គឺធ្វើស្អាតជាងសម័យចាស់ ។
ប៊េប៊ី មិនត្រឹមតែទៅកែចម្រុះឱ្យស្រួចស្អាតបន្ថែមសម្រស់ប៉ុណ្ណោះទេ នាងថែមទាំងមានគម្រោងនឹងទៅកែសម្ផស្សបន្ថែមទៀត ប្រសិនបើមើលឃើញថា ខ្លួនមានចំណុចខ្វះខាតត្រង់ណាមួយ ហើយនាងក៏មិនមានអារម្មណ៍អៀនខ្មាស់ក្នុងការបង្ហាញប្រាប់ទស្សនិកជនពីរឿងកែសម្ផស្សដែរ ដូចដឹងស្រាប់ហើយថា សម័យនេះគេចូលចិត្តបង្ហាញ ច្រើនជាងលាក់បាំង ។
ប៊េប៊ី កាន់តែមានទំនុកចិត្តលើខ្លួនឯងបន្ទាប់ពីទៅវះកាត់កែចម្រុះថ្មី ហើយនាងក៏ត្រៀមនឹងទទួលការងារថ្មីឡើងវិញដែរ បន្ទាប់ពីស្ងប់ស្ងាត់ក្នុងវិស័យសម្តែង និង ច្រៀង អស់ពេលជាច្រើនឆ្នាំ ។
គួររំលឹកផងដែរថា ប៊េប៊ី ជាតារាសម្តែងលេចធ្លោរមួយរូបកាលពីប៉ុន្មានឆ្នាំមុន តែដើម្បីតាមរកក្តីស្រមៃខ្លួននាងបានបោះបង់អាជីពសម្តែងចោល ដើម្បីឈោងចាប់អាជីព ចម្រៀង និង ពិធីករ ប៉ុន្តែនាងបែរជាបរាជ័យក្នុងអាជីពទាំង ២ នេះទៅវិញ រហូតនាងសម្រេចចិត្តងាកទៅបើកហាងកាហ្វេ ដើម្បីរកប្រាក់ចិញ្ចឹមជីវិតវិញ ។ តែទោះជាយ៉ាងនេះក្តី ប៊េប៊ី នៅតែស្រឡាញ់វិស័យចាស់ ហើយថែមទាំងមានបំណងវិលត្រឡប់មកវិញនេះក្នុងពេលឆាប់ៗខាងមុន ជាមួយមុខមាត់ថ្មី និង ការងារថ្មី ៕
