តារាសម្តែង ញ៉ែម សុគន្ធ បានផ្អាកពីអាជីពសម្តែងជាង៦ឆ្នាំមកហើយបន្ទាប់ពីលោករៀបការមានគ្រួសារនិងមានកូន២នាក់ជាចំណងដៃ លើសពីនេះទៅទៀតលោកទទួលបន្ទុកមើលថែឪពុកម្តាយចាស់ជរា ។
ទស្សនិកជនជាច្រើននៅតែទន្ទឹងចង់មើលស្នាដៃសម្តែងរបស់បុរសសង្ហា ញ៉ែម សុគន្ធ ពីព្រោះលោកគឺជាតារាសម្តែងប្រុសដ៏មានទេពកោលស្យ និងមានឈ្មោះល្បីល្បាញកាលពីជាង៦ឆ្នាំមុន ប៉ុន្តែគួរឱ្យស្តាយពេលដែលសម្រេចចិត្តរៀបការមានគ្រួសារ លោក ញ៉ែម សុគន្ធ បានផ្អាកទាំងស្រុងចំពោះអាជីពសម្តែង ដោយលោកងាកមកពង្រឹងការងារជាពិធីករវិញ ។
ជួបជាមួយលោក ញ៉ែម សុគន្ធ នៅក្នុងការថតពិធីចូលឆ្នាំថ្មីប្រពៃណីខ្មែររបស់សមាគមទូរទស្សន៍កម្ពុជា លោកបានបញ្ជាក់ប្រាប់ថា លោកពិតជាបានផ្អាកពីអាជីពសម្តែងអស់ពេលជាង៦ឆ្នាំមកហើយ ដោយសារជាប់ធុរៈផ្ទាល់ខ្លួន ត្រូវមើលថែរក្សាគ្រួសារនិងកូនតូចៗ ព្រមទាំងទទួលបន្ទុករាប់រងមើលថែឪពុកម្តាយចាស់ជរា ។ ថ្វីដ្បិតតែជាប់បន្ទុកច្រើនបែបនេះក្តី លោកបែរជាសប្បាយចិត្តដែលបានមើលថែមនុស្សជាទីស្រឡាញ់របស់ខ្លួន ផ្ទុយទៅវិញលោកកាន់តែមានកម្លាំងចិត្តរកប្រាក់ចំណូលដើម្បីគ្រួសារតូចរបស់ខ្លួន ។
ទោះបីជាលោក ញ៉ែម សុគន្ធ មិនទទួលការងារថតដូចមុន ប៉ុន្តែលោកអាចរកប្រាក់ចំណូលបានច្រើនគួរសមពីអាជីពពិធីករ និងច្រៀងតាមពិធីជប់លៀង និងមង្គលការនានា …។ លោកថា ការងារសម្តែងនៅតែស្រឡាញ់ តែបើឱ្យត្រឡប់ទៅថតវិញគឺលំបាកបន្តិច ពីព្រោះការងារសម្តែងត្រូវចំណាយពេលវេលាថតយូរ និងទៅតាមខេត្តឆ្ងាយៗ លោកមិនអាចចោលអ្នកផ្ទះបានឡើយ ៕
