ថ្មីទៀតហើយពីកំពូលតារាចម្រៀង ខេមរៈ សិរីមន្ត « តាលុងខេមរៈខ្មែរ West Side » រំលេចចង្វាក់ភ្លេងខ្មែរ ល្បែងប្រជាប្រិយ និងទេសភាពយ៉ាងស្រស់ស្អាតនៅលើទឹកដីអង្គរ 

លើកនេះកាន់តែប្លែក និងអស្ចារ្យជាងពេលមុនទៅទៀត កំពូលតារាចម្រៀង ខេមរៈ សិរីមន្ត មិនបានធ្វើឱ្យអ្នកគាំទ្ររបស់ខ្លួនខកចិត្តឡើយ ដោយលោកបានចេញបទចម្រៀងថ្មីមួយបទទៀតដែលមានចំណងជើងថា « តាលុងខេមរៈខ្មែរ West Side » ដែលមានបញ្ចូលនូវឧបករណ៍ និងចង្វាក់ភ្លេងខ្មែរ ដ៏ជក់ចិត្តឌិតអារម្មណ៍ ជាពិសេក្នុង MV ចម្រៀងនេះបានរំលេចនូវទេសភាពយ៉ាងស្រស់ស្អាតនៅលើទឹកដីអង្គរ ។

MV ចម្រៀង « តាលុងខេមរៈខ្មែរ West Side » របស់កំពូលតារាចម្រៀង ខេមរៈ សិរីមន្ត បានចេញជាផ្លូវការនៅលើផេកផ្លូវការរបស់ផលិតកម្ម Galaxy Navatra កាលពីព្រឹកថ្ងៃទី ២៦ ខែ មីនា ឆ្នាំ ២០២៥ កន្លងមកនេះ ។ បទចម្រៀងមួយបទនេះមិនត្រឹមតែពិរោះរណ្តំចិត្តជាមួយឧបករណ៍តន្រ្តីខ្មែរប៉ុណ្ណោះទេ មហាជនអាចរាំលេងកម្សាន្តជាមួយបទចម្រៀងមួយបទនេះនៅក្នុងពិធីជួបជុំ ក្នុងឱកាសបុណ្យចូលឆ្នាំថ្មីប្រពៃណីខ្មែរនិងគ្រប់កម្មវិធីតែម្តង ជាក់ស្តែងដូចដែលទស្សនិកជនបានឃើញ ក្នុង MV ចម្រៀង MV ចម្រៀង « តាលុងខេមរៈខ្មែរ West Side » ស្រាប់ មើលទៅត្រជាក់ភ្នែក និងទាក់ទាញបំផុត ដែលផលិតឡើងយ៉ាងសម្រិតសម្រាំងពីក្រុមការងាររបស់ផលិត ហ្គាឡាក់ស៊ី ណាវ៉ាត្រា ។

លើសពីនេះទៅទៀតក្នុង MV ចម្រៀង « តាលុងខេមរៈខ្មែរ West Side » របស់កំពូលតារាចម្រៀង ខេមរៈ សិរីមន្ត បានជ្រើសរើសទីតាំងថតយ៉ាងស្រស់ស្អាតនៅមុខអង្គរវត្តដែលជាទឹកដីអច្ឆរិយ ដោយមានការរាំលេងកម្សាន្ត និងលេងល្បែងប្រជាប្រិយជាច្រើន មើលទៅត្រជាក់ភ្នែក ធ្វើឱ្យអ្នកទស្សនា ចង់ទៅលេងកម្សាន្តនៅទឹកដីខេត្ត សៀមរាប គ្រប់ៗគ្នា ។  

កំពូលតារាចម្រៀង ខេមរៈ សិរីមន្ត បាននិយាយថា MV ចម្រៀង « តាលុងខេមរៈខ្មែរ West Side » ជារសជាតិថ្មីមួយបែបទៀត ជូនជាការដូសម្រាប់បងប្អូនប្រជាជនខ្មែរក្នុងឱកាសបុណ្យចូលឆ្នាំថ្មី ។ លោកសង្ឃឹមថាពុកម៉ែបងប្អូនដែលនិយមចូលចិត្តនូវចង្វាក់តាលុង នឹងពេញចិត្ត ហើយរាំលេងកម្សាន្តយ៉ាងសប្បាយរីករាយនៅក្នុងឱកាសបុណ្យចូលឆ្នាំថ្មី ។ 

តោះទៅទស្សនា MV ចម្រៀង « តាលុងខេមរៈខ្មែរ West Side » ទាំងអស់គ្នាថា ប្លែក និងអស្ចារ្យ កម្រិតណា ៕