តារាសម្តែង វណ្ណៈ បូរមី បានប្រកាសផ្អាកពីអាជីពសិល្បៈមួយរយៈ បន្ទាប់ពីសម្រស់ខ្លួនធ្លាក់ខ្លាំងធ្វើឱ្យនាងមិនជឿជាក់លើខ្លួនឯង ។
រយៈពេលមួយឆ្នាំមកហើយដែលតារាសម្តែង និង បង្ហាញម៉ូដ វណ្ណៈ បូរមី បានបាត់មុខពីសិល្បៈនាងពុំមានស្នាដៃថ្មីណាមួយបង្ហាញទស្សនិកជនឡើយ រហូតមានព័ត៌មានថា នាងបានរៀបការមានគ្រួសារស្ងាត់ៗទៅហើយ ។
ជូបជាមួយតារាសម្តែង វណ្ណៈ បូរមី កាលពីពេលថ្មីៗនេះនាងបានបញ្ជាក់ប្រាប់ថា នាងពិតជាផ្អាកពីអាជីពសម្តែងយ៉ាងពិតប្រាកដ ដោយសារតែនាងមានបញ្ហាសម្រស់ ម្យ៉ាងវិញទៀតពេលនេះនាងកំពុងពត់ធ្មេញផង ។ ដោយសារតែមិនជឿជាក់លើសម្រស់របស់ខ្លួន ទើបធ្វើឱ្យនាងផ្អាកមិនទទួលថតរឿង និងការងារសិល្បៈទាំងអស់ ។
ថ្វីដ្បិតតែបាត់មុខពីពិភពសិល្បៈប៉ុន្តែ វណ្ណៈ បូរមី បានងាកទៅធ្វើការងារនៅក្នុងក្រុមហ៊ុនឯកជនវិញ នាងថា ការងារនៅក្នុងក្រុមហ៊ុនអាចរកចំណូលបានច្រើនជាងការងារសិល្បៈ ។
វណ្ណៈ បូរមី នឹងត្រឡប់មកកាន់វិស័យសិល្បៈវិញនៅឆ្នាំក្រោយនៅពេលដែលនាងថែរក្សាសម្រស់ឱ្យស្រស់ស្អាតឡើងវិញ នាងរំពឹងថាពេលត្រឡប់មកវិញ ទស្សនិកជននៅតែគាំទ្រនាងដូចដើម ។
វណ្ណៈ បូរមី ធ្លាប់ជាស្រីស្អាតដែលបានប្រលងក្នុងកម្មវិធីធំៗជាច្រើន ឆ្នាំក្រោយនាងមានគម្រោងនឹងត្រឡប់មកកាន់វិស័យបវរកញ្ញាជាថ្មីម្តងទៀត ដើម្បីកសាងកេរ្តិ៍ឈ្មោះ ៕
