រាជនីក្រមា មាន សូនីតា បានប្រកាសជំហរជាថ្មីរបស់ខ្លួនថា នាងមិនមានគម្រោងនឹងចូលរួមប្រកួតនៅក្នុងកម្មវិធីប្រកួតសម្រស់ណាមួយទេ ដោយសារនាងចង់ទុកឱកាសឱ្យប្អូនៗជំនាន់ក្រោយវិញ ។
ថ្វីដ្បិតតែមានវ័យច្រើនបន្តិចក្តីតារាសម្តែង មាន សូនីតា ដែលត្រូវមហាជនដាក់រហ័សនាមថារាជនីក្រមានោះ នៅតែមានរូបសម្រស់ស្រស់សោភា និងគួរជាទីគយគន់ ជាពិសេសកេរ្តិ៍ឈ្មោះនិងកិត្តិយសរបស់នាងកាន់តែល្បីរន្ទឺខ្លាំងនៅក្នុងវិស័យសិល្បៈ រហូតធ្វើឱ្យមហាជនជាច្រើនបានសំណូមពរឱ្យនាង ចូលរួមប្រកួតប្រជែងនៅក្នុងកម្មវិធីប្រកួតសម្រស់ធំៗជាច្រើន ជាក់ស្តែងនៅពេលដែលចូលរួមជាភ្ញៀវកិត្តិយសនៅក្នុងកម្មវិធីបង្ហាញមុខ ND ថ្មីរបស់កម្មវិធី Miss Cosmo Cambodia កាលពីពេលថ្មីៗនេះ បានធ្វើឱ្យមហាជនជាច្រើនគិតថា តារាស្រីរូបនេះនឹងចូលរួមប្រកួតប្រជែងក្នុងកម្មវិធីនោះហើយ ។
ទោះជាយ៉ាងនេះក្តីកញ្ញា មាន សូនីតា បានបញ្ជាក់ច្បាស់ៗថា នាងមិនមានបំណងនឹងចូលរួមប្រកួតក្នុងវិស័យបវរកញ្ញានោះទេ នាងចូលរួមនាថ្ងៃនោះត្រឹមតែជាភ្ញៀវកិត្តិយសប៉ុណ្ណោះ ម្យ៉ាងវិញទៀតខ្លួនមានវ័យកាន់តែច្រើន ចង់ទុកឱកាសនេះសម្រាប់ប្អូនៗជំនាន់ក្រោយច្រើនជាង ។
កន្លងមកកញ្ញា មាន សូនីតា ធ្លាប់បង្ហើបប្រាប់ថា នាងស្រឡាញ់កម្មវិធី Miss Universe ណាស់បើមានឱកាសនាងនឹងពិចារណាមើល ។ សម្រាប់ឆ្នាំ២០២៥នេះ មាន សូនីតា សុំមិនគិតពីរឿងប្រកួតសម្រស់ អ្វីដែលសំខាន់សម្រាប់នាងនៅក្នុងពេលនេះ គឺប្រឹងពង្រឹងអាជីពសិល្បៈ និងមុខរបររកស៊ីរបស់ខ្លួនឱ្យដំណើរការល្អ និងមានទីផ្សារខ្ពស់ចំពោះវិស័យក្រមានៅក្នុងប្រទេស កម្ពុជា ។
មាន សូនីតា មានគម្រោងការងារធំៗជាច្រើននៅក្នុងឆ្នាំនេះទាំងការងារចេញទៅចូលរួមកម្មវិធីធំៗនៅក្រៅប្រទេស និងការងារក្នុងស្រុកដើម្បី Surprise អ្នកគាំទ្រ ។ ចំពោះរឿងស្នេហានាងនៅតែអះអាងថា ពុំទាន់រកគូស្រករឃើញ តែក្នុងចិត្តនាងចង់រៀបការឆាប់ៗដូចជាមិត្តភក្តិដែរ ៕
