ស្របពេលបើកបង្ហាញមុខមាត់ថ្មីរបស់ ND Miss Cosmo Cambodia កាលពីម្សិលមិញនេះ ND រូបនេះត្រូវបានគេស្គាល់ថាអ្នកនាងមិនត្រឹមតែស្អាត ឆ្លាត ថែមទាំងជាស្រ្តីខ្លាំងក្នុងវិស័យជំនួញនឹងធ្វើឱ្យកក្រើកវិស័យបវរកញ្ញានៅកម្ពុជា ។
ក្រោយពីទន្ទឹងរងចាំមើលថាតើនរណាជា ND ថ្មីកម្មវិធី Miss Cosmo Cambodia បន្ទាប់ពីអ្នកស្រី អ៊ឹម សុគន្ធា នោះ ពេលនេះបានចេញជាផ្លូវការហើយ អ្នកនាង Tiffany Vu គឺជា ND ថ្មីសម្រាប់កម្មវិធី Miss Cosmo Cambodia 2025 ។
នៅក្នុងសន្នីសីទសារព័ត៌មាននៃការចុះអនុស្សារណៈនៃការយោគយល់រវាង CEO of Miss Cosmo និងការបើកបង្ហាញវត្តមាននាយកគ្រប់គ្រងថ្នាក់ជាតិ អ្នកនាង Tiffany Vu កាលពីថ្ងៃទី ២០ ខែ មករា កន្លងមកនេះ ក៏មានវត្តមានកញ្ញា Ketut Permata ម្ចាស់មកុដ Miss Cosmo អន្តរជាតិចូលរួមផងដែរ ជាពិសេសវត្តមាន ព្រះនាងតូច នរោត្តម ចេនណា និងសិល្បករសិល្បការិនីជាច្រើនរូមទៀត ។
កញ្ញា អ៊ិន លក្ខិណា ដែលជាបវរកញ្ញាជាប់ក្នុងលំដាប់ Top 10 Miss Cosmo 2024 ក៏បានបង្ហាញនូវចំណាប់អារម្មណ៍របស់ខ្លួនថា នាងពិតជារំភើបចិត្ត និង រំពឹងថា ND ថ្មី នឹងនាំ កម្ពុជា ទៅកាន់ឆាកអន្តរជាតិក្នុងលំដាប់សំខាន់ៗជាក់ជាមិនខាន ។
អ្នកនាង Tiffany Vu នាយកគ្រប់គ្រងថ្នាក់ជាតិ Miss Cosmo Cambodia ត្រូវបានគេស្គាល់ថា ជាស្ត្រីខ្លាំងក្នុងវិស័យមុខជំនួញនិងជា CEO នៃក្រុមហ៊ុន Influence Media អ្នកនាងមានមុខជំនួញជាច្រើនទៀតនៅក្នុងដៃ ។ អ្នកនាង Tiffany Vu បានបញ្ជាក់នៅក្នុងសន្នីសីទសារព័ត៌មាននាថ្ងៃនោះថា មានចំណុចពិសេសជាច្រើនដែលធ្វើឱ្យអ្នកនាងសម្រេចទិញសិទ្ធ Miss Cosmo Cambodia ជាពិសេសគឺអ្នកនាងចង់នាំកម្មវិធី Miss Cosmo មកផលិតនៅ កម្ពុជា និងធានាបានថាកម្មវិធីមួយនឹងឆ្លុះបញ្ចាំងនូវតម្លៃ និងទំនៀមទម្លាប់ប្រពៃណីរបស់កម្ពុជានោះ ព្រោះអ្នកនាងគោរព និងឱ្យតម្លៃយ៉ាងជ្រាលជ្រៅចំពោះវប្បធម៌ និងប្រពៃណីដ៏សម្បូរបែបរបស់ប្រទេស កម្ពុជា ហើយការងារដែលចាំបាច់បំផុតរបស់ខ្លួនគឺធានាថា Miss Cosmo Cambodia ឆ្លុះបញ្ចាំងពីគុណតម្លៃទាំងនោះយ៉ាងពិតប្រាកដ ។
អ្នកនាង Tiffany Vu បានប្តេជ្ញាចិត្តថា នឹងធ្វើការនេះឱ្យបានល្អ ដោយផ្តោតទៅលើគោលដៅ ៣ ធំៗ ។ ការផ្តល់សិទ្ធិអំណាចដល់ស្ត្រីតាមរយៈការបណ្តុះបណ្តាល និងការអភិវឌ្ឍភាពជាអ្នកដឹកនាំ ការលើកកម្ពស់បេតិកភណ្ឌវប្បធម៌របស់កម្ពុជានៅលើឆាកអន្តរជាតិ និងការចូលរួមសហគមន៍ជាមួយនឹងគម្រោងសកម្មភាពដែលប្រកបដោយប្រសិទ្ធភាព។ គួបផ្សំនឹងផលិតកម្មលំដាប់ពិភពលោក យើងមានគោលបំណងចង់កំណត់ស្តង់ដារថ្មីមួយ សម្រាប់កម្មវិធីប្រកួតបវរកញ្ញាក្នុងប្រទេសកម្ពុជា ។
សម្រាប់បេក្ខភាពដែលចង់ក្លាយទៅជាម្ចាស់មកុដ Miss Cosmo Cambodia ២០២៥ អាចដាក់ពាក្យចូលរួមប្រកួតបាន ៕
