វង់ភ្លេងពិណពាទ្យនៅទឹកដីខេត្ត កំពង់ឆ្នាំង ពិតជាទទួលបានការចាប់អារម្មណ៍ខ្លាំងពីមហាជន។ ជាក់ស្តែងកាលពីថ្ងៃទី ១៨ខែ មករា ឆ្នាំ ២០២៥ កន្លងមកនេះ មន្ទីរវប្បធម៌និងវិចិត្រសិល្បៈខេត្ត កំពង់ឆ្នាំង បានរួមសហការជាមួយរដ្ឋបាលស្រុកកំពង់ត្រឡាច និងនាយកដ្ឋានសិល្បៈទស្សនីយភាពនៃក្រសួងវប្បធម៌និងវិចិត្រសិល្បៈ បានរៀបចំសិក្ខាសាលាស្តីពីវង់ភ្លេងពិណពាទ្យក្រោយប្រធានបទ « តួនាទីរបស់វង់ភ្លេងពិណពាទ្យ » ក្រោមអធិបតីភាពឯកឧត្តមបណ្ឌិត ហ៊ឺ វីរៈ ។
នៅក្នុងសិក្ខាសាលាស្ដីពីវង់ភ្លេងពិណពាទ្យ ក្រោមប្រធានបទ « តួនាទីរបស់វង់ភ្លេងពិណពាទ្យ» គឺរៀបចំឡើងក្នុងគោលដៅថែរក្សា លើកស្ទួយ និងផ្សព្វផ្សាយ ក៏ដូចជាតម្រង់ទិសដល់បងប្អូនសិល្បករ ដែលបានចាប់យកអាជីពសម្តែងភ្លេងពិណពាទ្យ នៅក្នុងស្រុកកំពង់ត្រឡាច ខេត្តកំពង់ឆ្នាំង ឱ្យបានយល់ដឹងកាន់តែច្បាស់អំពីការសម្តែងភ្លេងពិណពាទ្យឱ្យបានត្រឹមត្រូវតាមទំនៀមទម្លាប់ និងក្បួនច្បាប់ពីបុរាណរបស់ខ្មែរយើង។
ឯកឧត្ដមបណ្ឌិត ហ៊ឺ វីរៈ បានថ្លែងអំណរគុណដល់សិក្ខាកាមជាសិល្បករវង់ភ្លេងពិណពាទ្យ ដែលបានចំណាយពេលវេលាដ៏មានតម្លៃចូលរួមសិក្ខាសាលាដ៏មានសារៈសំខាន់នេះ។ ឯកឧត្តមបណ្ឌិត ថែមទាំងបានផ្តាំផ្ញើដល់បងប្អូនសិក្ខាកាមទាំងអស់ត្រូវយកចិត្តទុកដាក់ត្រងត្រាប់ស្ដាប់បទបង្ហាញពីព្រឹទ្ធាចារ្យ និងលោកគ្រូជំនាញ ដែលអញ្ជើញមកពីនាយកដ្ឋានសិល្បៈទស្សនីយភាពនៃក្រសួងវប្បធម៌និងវិចិត្រសិល្បៈ ដើម្បីដឹងកាន់តែច្បាស់ពីចង្វាក់ កម្រិតសំឡេង ក្បួនខ្នាត និងជាពិសេសពាក្យហៅបទភ្លេងក្នុងវង់ភ្លេងពិណពាទ្យ ដែលកែប្រែពីភាសាសៀម មកជាភាសាជាតិវិញ។
គួរបញ្ជាក់ផងដែរថា វង់ភ្លេងពិណពាទ្យ មានតួនាទីសម្រាប់ប្រគំថ្វាយដូចជា ព្រះរាជពិធីទទួលក្បួនទ័ព ព្រះរាជពិធីទ្វាទសមាស ព្រះរាជពិធីចុះផែ ព្រះរាជពិធីច្រត់ព្រះនង្គ័ល និងប្រគំក្នុងរបាំព្រះរាជទ្រព្យ ប្រគំក្នុងល្ខោនខោល ប្រគំក្នុងល្ខោនស្រមោលស្បែកធំ។ ល ។ សម័យបច្ចុប្បន្នវង់ភ្លេងពិណពាទ្យ បានមានវត្តមានប្រគំកំដរក្នុងកម្មវិធីបុណ្យសាសនា ដូចជាពិធីបុណ្យបំបួសនាគ បុណ្យបញ្ចុះខណ្ឌសីមា បុណ្យកឋិនទាន បុណ្យបច្ច័យបួន ពិធីបុណ្យសព និងប្រគំជូនក្នុងកម្មវិធីបុណ្យនានាផងដែរ ៕
