ស្របពេលដែលលេចមុខនៅក្នុងរឿង « រង់ចាំ » តារាសម្តែង តុប វិសាល បានបង្ហើបប្រាប់ថា ខ្លួនមានមុខជំនួញមួយចំនួននៅក្នុងដៃ បន្ទាប់ពីបានបញ្ចប់ការសិក្សាផ្នែកសេដ្ឋកិច្ចនៅប្រទេស ជប៉ុន រយៈពេល៤ ឆ្នាំ ។
តារាសម្តែងរូបសង្ហា តុប វិសាល បានផ្អាកពីអាជីពសិល្បៈអស់ពេលជាច្រើនឆ្នាំ បន្ទាប់ពីជាប់បន្តការសិក្សានៅប្រទេសជប៉ុន ផ្នែកសេដ្ឋកិច្ចរយៈពេល៤ ឆ្នាំ នៅទីនោះលោកទទួលបានបទពិសោធជាច្រើនក្នុងជីវិត ទាំងការរស់នៅ ការអប់រំ និង ចំណេះដឹង ។ តុប វិសាល បានប្រាប់ថា ជីវិត៤ឆ្នាំនៅស្រុកគេ មិនមែនជារឿងងាយស្រួលទេ លោកត្រូវតស៊ូប្រឹងប្រែងរៀនសូត្រផង និងឆ្លៀតពេលធ្វើការងារខ្លះដើម្បីបានប្រាក់ចំណូលចិញ្ចឹមជីវិត តែទោះជាយ៉ាងណាការតស៊ូរបស់លោកទទួលបានជោគជ័យ ហើយ ។
តុប វិសាល បានបន្តទៀតថា លោកទើបតែប្រលូកក្នុងសិល្បៈឡើងវិញបានត្រឹមតែមួយឆ្នាំប៉ុណ្ណោះ ក្រោយបញ្ចប់ការសិក្សា ពេលនេះលោកកំពុងមមាញឹកនៅក្នុងការថតភាពយន្តឱ្យផលិតកម្មក្នុងស្រុកជាច្រើន ជាក់ស្តែងក្នុងឆ្នាំ ២០២៥នេះលោកទទួលថតរឿងដុំនិងរឿងភាគជាបន្តបន្ទាប់ ក្នុងនោះរឿង « រង់ចាំ » ក៏កំពុងដាក់បញ្ចាំងនៅគ្រប់រោងភាពយន្តផងដែរ ។
ក្រៅពីសិល្បៈ លោក តុប វិសាល ក៏បានយកចំណេះដឹងរបស់ខ្លួនដែលសិក្សានៅប្រទេសជប៉ុន៤ឆ្នាំ ទៅបំពេញការងារផ្សេងៗដូចជាការងារបកប្រែភាសា និង បើកជំនួញផ្ទាល់ខ្លួនមួយចំនួន ដូចជាការបើកជាម៉ាត់ជាដើម.. ។ តុប វិសាល ថា ជីវិតមិនអាចពឹងពាក់ទាំងស្រុងលើអាជីពសិល្បៈបានទេ ត្រូវប្រឹងប្រែងធ្វើការងារបន្ថែម ទើបអាចសល់លុយបង្កើ់តគ្រួសារតូចមួយ ៕
